00:00:00 IGIHE NETWORK KN KINYARWANDA EN ENGLISH FR FRANCAIS

Rwamagana: Ibibazo by’ubutaka ku Muyumbu mu byahagurukije inzego

Yanditswe na Hakizimana Jean Paul
Kuya 3 August 2022 saa 08:46
Yasuwe :

Ibibazo by’ubutaka mu baturage bo mu Karere ka Rwamagana mu Murenge wa Muyumbu byahagurukije Umuvunyi Mukuru, abaturage basabwa kwirinda gusiragira mu nkiko ahubwo bakegera ubuyobozi.

Kuri uyu wa Gatatu, Umuvunyi Mukuru n’ubuyobozi bw’Akarere ka Rwamagana begereye abaturage bo mu Murenge wa Muyumbu, kugira ngo babakemurire ibibazo mu gihe cy’iminsi itatu.

Bazanasura indi mirenge irimo Fumbwe na Muhazi hagamijwe kumva ibibazo by’abaturage ndetse n’ibyifuzo byabo.

Ibibazo byinshi bakiriye ku Muyumbu babihaye umurongo, ibindi bakumvikanisha ba nyirabyo. Byose bikomoka ku butaka.

Urugero ni ikibazo cya Bahizi Jean Paul wavugaga ko yaguze ubutaka ku ibihumbi 15 Frw mu 2001, yabwibaruzaho undi agatanga ikirego ko yari yarabumwatiye, atigeze abumugurisha.

Iki kibazo cyatumye baburana mu nkiko zitandukanye, bananirwa kumvikana.

Kimwe n’ibindi byinshi byagarukaga ku butaka, hari higanjemo ibigaragara ko byakagombye kuba byararangijwe n’Abunzi, ariko abaturage kubera kutamenya amategeko no kwihutira kujya mu nkiko, bigatuma bibatwara amafaranga menshi.

Bahizi Jean Paul watangiye kuburana mu 2015 kugeza mu 2020, yashimiye Leta ku kuntu yagiye imuba bugufi, ubuyobozi bukamwumvikanisha n’umuturanyi we bari bafitanye ibibazo.

Yavuze ko yashoye miliyoni 2,8 Frw mu nkiko, aburana isambu.

Yavuze ko ahenshi yatsindwaga, ariko Leta ikaza kumuhuza n’uwo baburanaga, babumvikanisha kugeza ikibazo gikemutse.

Ati “Nagira inama abantu ko mbere yuko bajya mu manza bajya bicarana n’abo bafitanye ikibazo, byananirana bakagana ubuyobozi kuko kujya mu nkiko bikumaraho amafaranga.”

Umuyobozi w’Akarere ka Rwamagana, Mbonyumuvunyi Radjab, yavuze ko impamvu ku Muyumbu hari ibibazo byinshi by’ubutaka, ari uko mu myaka icumi ishize hari mu butaka buhingwa, ariko ubu ni mu butaka bwo guturwa.

Ibyo byatumye abantu benshi bahagana, bahagura ibibanza.

Mbonyumuvunyi yagiriye inama abaturage ko bashishoza mbere yo kugura ubutaka.

Ati "Icyo dusaba umuturage wese ugura ubutaka aho yaba aherereye hose, icya mbere ni ukureba ko uwo agura na we afite icyangombwa cy’ubutaka kandi kimwanditseho, icya kabiri ni ukubaririza niba nta yandi makimbirane aburi inyuma, kugira ngo bitazamubyarira ibibazo."

Umuvunyi Mukuru Nirere Madeleine, yasabye abaturage bagurisha ubutaka n’ababugura kujya bihutira guhinduranya ibyangombwa, kuko iyo bitinze bibyara amakimbirane.

Ati "Usanga umuntu agurishije, ntahererekanyije, wawundi wahaguze arongeye aragurishije ntahererekanyije, ugasanga ikibanza kiguzwe n’abantu batanu cyangwa inzu, batigeze bahinduranya, icyangombwa kicyanditse kuri wa wundi wa mbere."

"Ibyo rero bitera amakimbirane rimwe na rimwe ugasanga hajemo uburiganya. Abaturage twabagira inama yo kujya bahinduranya mu gihe bagurishije."

Umuvunyi Mukuru kandi yasabye abaturage kwirinda kwihutira kujya mu nkiko. Ngo bajye babanza begere ubuyobozi habeho ubuhuza, cyangwa bajye mu Abunzi mbere yuko bagera mu nkiko.

Ibyinshi mu bibazo usanga bibatwara amafaranga kandi byagakwiriye kurangirizwa mu buyobozi.

Abaturage bagize umwanya uhagije wo kugeza ibibazo ku buyobozi
Ibibazo by'ubutaka ni byinshi ku Muyumbu
Meya Mbonyumuvunyi aha umurongo ibibazo by'abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .