00:00:00 IGIHE NETWORK KN KINYARWANDA EN ENGLISH FR FRANCAIS

Rwamagana: Bagiye kwiba ibyuma mu ruganda, umwe arahagwa

Yanditswe na Hakizimana Jean Paul
Kuya 4 August 2022 saa 10:21
Yasuwe :

Itsinda ry’abasore bo mu Karere ka Rwamagana ryagiye kwiba ibyuma bishongeshwa bigakorwamo ibikoresho birimo ferabeto (fer à béton), abarinzi barabarasa umwe arapfa, undi akomereka ku kuboko.

Byabaye kuri uyu wa Kane tariki ya 4 Kanama 2022, ku ruganda rwa SteelRwa rumenyerewe mu gukora ibyuma, mu Karere ka Rwamagana.

Umwe mu babibonye yabwiye IGIHE ko hari abasore bagera ku 10 bari barakoze igikundi ahantu SteelRwa Industries Ltd isuka imyanda y’ibyuma.

Ubuyobozi bwarahageze ngo burabirukana, banga kuhava biba ngombwa ko uruganda ruhashyira abashinzwe umutekano.

Ati "Abo basore rero bakoze igikundi bavuga ko bagiye guhangana n’abashinzwe umutekano mpaka bakabambura imbunda. Babanje kuhanywera inzoga nyinshi, batangira gutoragura amabuye barayabatera."

"Bigeze aho abasore babiri bavamo basatira ushinzwe umutekano batangira gushaka kumwambura imbunda, arabiyaka, arashe umwe isasu rimufata mu nda undi rimufata ku kuboko, abasigaye bahita biruka."

Umunyamabanga Nshingwabikorwa w’Umurenge wa Munyiginya, Niyomwungeri Richard, yabwiye IGIHE ko abo basore babanje kubwira abashinzwe umutekano ko imbunda bafite zirimo umwuka, ari nayo mpamvu babasagariye cyane.

Yavuze ko abayobozi mu nzego z’ibanze n’inzego z’umutekano bari bamaze gukorana inama eshatu n’abaturage, babasaba kwirinda kujya kwiba ibyuma uru ruganda ruba rwaguze. Ariko ngo abenshi babirengagaho bakongera bagasubirayo.

Yyavuze ko abo basore bari bageze aho batobora igipangu bakinjiramo ku ngufu.

Yakomeje ati "Turasaba abaturage kwirinda kwangiza ibikorwaremezo no kwirinda kwangiza iby’abandi, kuko amategeko abihanira."

Umurambo wa nyakwigendera wajyanywe mu bitaro bya Rwamagana, mu gihe uwakomeretse na yajyanywe kuvurirwa muri ibi bitaro.

Ibyuma bishaje ni imari ikomeje kubyazwa umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .