Rwamagana: Amayobera ku bana batatu bapfuye bakurikirana mu kigo kimwe

Yanditswe na Hakizimana Jean Paul
Kuya 9 Gashyantare 2020 saa 11:38
Yasuwe :
0 0

Abana batatu bigaga ku rwunge rw’amashuri rwa Nyarusange ruherereye mu Murenge wa Muhazi mu Karere ka Rwamagana bapfuye bakurikirana mu byumweru bitatu, bitera amayobera abaturage bamwe bagakeka ko ari amarozi.

Mu ntangiriro z’iki gihembwe nibwo umwana wa mbere wigaga mu mwaka wa kane w’amashuri abanza yapfuye nyuma y’iminsi itanu afashwe n’indwara ababyeyi be bavuga ko batigeze bamenya. Nyuma y’icyumweru kimwe undi mwana wigaga mu mwaka wa Gatandatu w’amashuri abanza nawe yapfuye by’amayobera kuko ngo yari amaze iminsi itatu gusa arwaye.

Kuri uyu wa Kane nabwo hashyinguwe undi mwana wigaga mu mwaka wa kabiri w’amashuri yisumbuye kuri iki kigo na we akaba yarafashwe ku wa Gatanu w’icyumweru gishize, ajyanwa kwa muganga ku wa Gatandatu apfa ku wa kabiri nijoro.

Gasana Félicien ubyara uyu mwana witabye Imana, yabwiye IGIHE ko umwana we yamujyanye mu bitaro bya Rwamagana ngo akorerwe ibizami byose bishoboka abaganga bakamubwira ko nta ndwara n’imwe babona.

Yavuze ko umwana we yarukaga kandi akaribwa mu nda cyane.

Ati “Mu minsi nahamaze abaganga bamwitayeho bigaragarira amaso, bamufata ibizami byose bibaho ariko bikanga aho kugira ngo umwana ahembuke ahubwo ukabona birarushaho. Kuva tugeze kwa muganga ntiyongeye kuvuga no kumva wabonaga atumva.”

Yakomeje agira ati “ Ubwo rero twababazaga icyo arwaye bakatubwira ko nta burwayi babona, rimwe bapima bakabona impyiko ngo zazamutse ariko ntikibe aricyo kibazo cyatera mu nda, ubundi bakavuga ko ari umwijima nabwo bikanga. Yarinze avamo umwuka bataratubwira indwara arwaye.”

Gasana avuga ko nubwo atabyemeza neza, ngo akurikije ibimenyetso yagaragazaga bishoboka ko umwana we yaba yarazize amarozi.

Ati “ No kwa muganga babitubazaga kenshi ngo niba hari imiti y’Ikinyarwanda twamuhaye, tuti ntayo kuko umwana ntabwo yigeze arwara iminsi. Yafashwe kuwa Gatanu tujya kumuvuza ku wa gatandatu yarinze apfa tutongeye kumva ijwi rye gusa ukurikije ibimenyetso n’ibindi abana bapfuye bagaragaje turakeka amarozi kuko bose ntabwo barwaraga igihe.”

Undi muturage utifuje gutangaza amazina yavuze ko kuva umwaka ushize kuri iki kigo abana bakunda gupfa mu buryo bw’amayobera akifuza ko hakorwa iperereza rikagaragaza ukuri.

Ati “ Umwaka ushize hari umubyeyi wapfushije abana babiri b’inkurikirane nabo bigaga hano Nyarusange. Ikituyobera nuko bose ntawe ujya urwara iminsi irenga itanu tukumva ko bishobora kuba biterwa no kubaroga.”

Umuyobozi w’Ikigo cya G S Nyarusange Sibomana Jean Damamscene yabwiye IGIHE ko abana batatu bigaga kuri iki kigo bitabye Imana koko, ariko ngo ntiyahamya niba ari uburozi bazize.

Yagize ati “ Umwana witabye Imana umwe yigaga mu mashuri abanza haciyeho igihe, mwarimu yaramunzaniye ngo yarwaye duhamagara papa we ni umunyonzi araza aramutahana hashize iminsi nk’itanu twumva ngo umwana yitabye Imana, uyu mukobwa nawe amakuru narayamenye ko yarwaye bavuga ko afite ikibazo mu nda ariko kugeza uyu munsi ntacyo abaganga baratubwira.”

Yakomeje avuga ko kubarogera ku ishuri bitapfa gushoboka ati “ Kubarogera ku ishuri ntabwo bishoboka kuko abana biga mu mashuri abanza. Ntabwo barya mu kigo icyo gihe byaba ari ugukabya kuko abana baba baririye hamwe wenda hagafatwa ari benshi. Ibyo bivugwa bishobora kuba bikorerwa mu giturage.”

Umuganga wo mu bitaro bya Rwamagana wakurikiranye umwe mu bana baheruka kuhazana bakahapfira yabwiye IGIHE ko uwo mwana yitaweho nk’abandi barwayi gusa yemeza ko basanze impyiko n’umwijima bye byarangiritse.

Yavuze ibi biterwa akenshi no gukoresha imiti ya Kinyarwanda cyangwa umuntu akaba yariye cyangwa yanyoye uburozi cyangwa ibihumanya bishobora kwangiza umwijima n’impyiko.

Muri iki kigo abana batatu baherutse gupfa bakurikirana biteza amayobera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza