00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Imbamutima z’abagore 300 bafashijwe na ’KOICA UPG-Kira Wigire’ gusezerera ubukene

Yanditswe na Nsanzimana Erneste
Kuya 16 June 2022 saa 08:58
Yasuwe :

Abagore 300 bayoboye ingo mu mirenge ya Mushubati na Gihango yo mu Karere ka Rutsiro, bagaragaje ko bamaze kwiteza imbere binyuze mu bufasha bahawe n’Umushinga ‘KOICA UPG- KIRA WIGIRE’.

KOICA UPG Kira Wigire ni umushinga wa KOICA ushyirwa mu bikorwa na World Vision. Mu kwezi kwa gatatu umwaka ushize, ni bwo Umuryango World Vision wegereye aba bagore, bari baratakaje icyizere kubera ubukene ubigisha guhinga kijyambere no kwizigamira.

Uyu muryango wakodeshereje buri mugore muri aba umurima wo guhingamo imboga n’imbuto, ubaha imbuto n’ibikoresho by’ubuhinzi birimo amasuka, rozwari, rato, n’igikoresho cya parasitike cyo gusaruriramo imboga n’imbuto.

Mukabalisa Angelique, umushinga "Kira Wigire" wasanze yaritakarije icyizere ndetse yari afite gahunda yo kujya gusaba akazi ko mu rugo. Nyuma y’inama n’ubufasha yahawe yahinze imboga n’imbuto ajya no mu matsinda yo kwizigamira.

Uyu mugore wo mu Mudugudu wa Gitega, Akagari ka Mageragere, Umurenge wa Mushubati, binyuze mu musaruro yakuye mu buhinzi bw’imboga n’imbuto yabashije kwigurira ihene zirindwi, nazo ageze aho arazigurisha agura inka.

Ati "Ndahinga ngasagurira amasoko, rimwe na rimwe nkajya no gucuruza ibyo naranguye. Buri cyumweru mbasha kwizigama ibihumbi bitanu, ku bwizigame ngizeho ibihumbi 120 Frw. Ndifuza ko ejo hanjye haba heza cyane.”

Mu bufasha uyu mushinga ugenera abafatanyabikorwa bawo, harimo 7000 Frw kuri buri umwe mu bagize umuryango. Aya mafaranga amaze gutangwa inshuro icyenda.

Nzamukosha Eugénie wo mu Mudugudu wa Gishushu, Akagari ka Bugina, Umurenge wa Gihango, yabaga mu nzu y’amatafari itagira inzugi, ahakabaye inzugi harunzemo amatafari. Abana be bahoraga basiba ishuri kubera kuvayo rimwe na rimwe bakabura ibyo kurya.

Uyu mubyeyi inzu ye yamuteraga ipfunwe ku buryo hari ubwo umuntu yamucagaho yamubaza niba ari iwe, akamusubiza ko iwe ari hakurya ku wundi musozi.

Kubera ko afite umuryango w’abantu barindwi, kuri ya mafaranga 7000 Frw agenerwa buri umwe mu bagize umuryango bamuhereye rimwe amezi abiri afata ibihumbi 70 Frw.

Aya mafaranga ni yo yahereyeho atangira gucuruza imineke n’ibitoki, igitoki yakirangura 5000 Frw, akungukaho 3000 Frw. Ayo yungutse yakuragaho ayo akemuza utubazo, andi akayizigama mu itsinda.

Mu mpera z’umwaka ushize itsinda abamo ryagabanye afitemo ibihumbi 120 Frw yongeraho andi ibihumbi 80 Frw yakuye mu mboga agura inka.

Uyu mugore kuri ubu afite inka eshatu kuko yari asanganywe iya girinka ndetse no mu kwezi gushize akaba aherutse kugura indi nka ayikuye mu kwizigama amafaranga akura mu buhinzi no mu gucuruza ibitoki.

Ati "Mbere nari mbayeho nabi na mituweli kuyitanga natangaga igice nkabura ayo nongeraho na ya yandi agahinduka impfabusa ariko ubu iy’umwaka utaha narangije kuyishyura, nayishyuye mu kwezi kwa gatatu nishyurira umuryango wose.”

Uyu munsi Nzamukosha abasha kwishyurira abana be ishuri, akababonera ibikoresho by’ishuri, yavuguruye inzu ye kandi afite ihene n’ingurube.

Nyabyenda Jacques, umwe mu bafashamyumvire mu iterambere mu Mushinga Kira Wigire yavuze ko aba bagore kuva uyu mushinga watangira bamaze kwizigama miliyoni zisaga 25 Frw.

Muri iyi miryango 300, harimo imiryango 40 imaze kwigurira inka, imiryango 59 yamaze kwigurira imirima yo guhinga, 71 yiguriye ihene, imiryango 48 yaguze ingurube, imiryango ibiri yaguze imashini zidoda, umuryango umwe waguze igare ryo gutwaraho imyaka, naho imiryango 109, yikodeshereje ubutaka bwo guhinga bwiyongera kuko World Vision yayikodeshereje imyaka irindwi.

Umuyobozi wa World Vision mu Karere ka Rutsiro na Ngororero, Uwiragiye Raymond, yavuze ko mu byo uyu mushinga ugamije harimo kurwanya igwingira, no guhindura imyumvire y’abaturage bakamenya ko kuva mu cyiciro cy’abakene bakajya mu cy’abakire ari ibintu bishoboka.

Ati "Turifuza ko mugenda mukaba umusemburo wa ba bandi basigaye hariya mubana mu muryango, mugahindura imyumvire y’abantu, bakamenya ko kuva mu cyiciro kimwe akajya mu kindi bishoboka. Turabasaba gukomeza kuba umusemburo w’iterambere aho mutuye kuko iyo uteye imbere wenyine hari ibindi bibazo uba wikururira.”

Ubuyobozi bw’Inzego z’ibanze bukorana n’aba baturage umunsi ku wundi bubatangira ubuhamya, bukavuga ko mbere byari bigoye kubabona muri gahunda za Leta nk’Umuganda, mituweli , Ejo Heza, inama n’ibindi ariko ngo ubu basigaye babyitabirira kurusha abandi.

Umujyanama wa Komite Nyobozi y’Akarere ka Rutsiro, Jean Baptiste Uwihanganye, wahagarariye Umuyobozi w’aka karere mu gikorwa cyo kugaragaza ibimaze kugerwaho mu mushinga Koica UPG- Kira Wigire, usigaje umwaka n’igice ngo ugere ku musozo yavuze ko hari impinduka nyinshi zigaragara muri iyi miryango 300 iyobowe n’abagore.

Ati "Ugize ngo urabasuye usanga abana babo bari kujya ku mashuri, ugasanga bafite itungo baryitayeho, ugasanga abana babo ku ishuri bafite ibikoresho, ugasanga mu ngo zabo bafite akajerekani bashyiramo amazi atetse bakanywa amazi meza, ku mubiri wabo batangiye gucya pe.”

Biteganyijwe ko uyu mushinga uzatwara 1.345.000$, gusa abaturage n’ubuyobozi bw’inzego z’ibanze bifuza ko uyu mushinga wakongererwa igihe, ukanaguka ukagera no ku bandi baturage kuko kuri ubu ukorera mu mirenge ibiri muri 13 igize igize Akarere ka Rutsiro.

Aba bagore 300 bafashijwe gusezerera ubukene binyuze mu mushinga ‘KOICA UPG- KIRA WIGIRE’
Bishimira intambwe bamaze gutera, aho kuri ubu babasha gutunga ingo zabo ntacyo babuze
Aba bagore bamaze guteza imbere ubuhinzi bw'imboga mu Karere ka Rutsiro
Umusaruro bejeje bawujyana ku isoko bakabona amafaranga yo kugura ibindi bakeneye
Bimwe mu byabakuye mu bukene ni ubuhinzi bw'imboga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .