Rutsiro: Batatu bafatiwe mu bucukuzi bw’amabuye y’agaciro butemewe

Yanditswe na IGIHE
Kuya 8 Kanama 2020 saa 08:06
Yasuwe :
0 0

Polisi ikorera mu karere ka Rutsiro mu murenge wa Rusebeya mu kagari ka Kabona yafashe uwitwa Yadufashije Jean Marie Vianney w’imyaka 27, Habiyambere Gaspard w’imyaka 32 na Yankurije Consolee w’imyaka 33 bari mu bucukuzi bw’amabuye y’agaciro butemewe.

Bafashwe tariki ya 6 Kanama, bafatirwa mu kirombe gicukurwamo amabuye y’agaciro mu buryo butemewe n’amategeko kuko cyari cyarafunzwe n’ubuyobozi bw’akarere kubera kitujuje ibisabwa n’amategeko.

Umuvugizi wa Polisi mu ntara y’Iburengerazuba, Chief Inspector of Police (CIP) Bonaventure Twizere Karekezi yavuze ko bariya bantu bafashwe bamaze gucukura itaka basigaje kujya kuriyungurura ngo bakuremo amabuye y’agaciro.

Yakomeje avuga ko buriya bucukuzi bunyuranyijwe n’amategeko bugira ingaruka ku buzima bw’ababujyamo ndetse no ku bidukikije by’aho bayacukura.

Ati “Bariya bantu birengagiza ko biriya birombe bishobora kubagwira bakahasiga ubuzima ndetse barangiza imirima y’abaturage. Iyo bamaze gucukura batunda itaka bakajya kuriyungururira mu migezi bigatuma yuzuramo ibyondo.”

Umuvugizi wa Polisi mu ntara y’Iburengerazuba yakomeje avuga ko usibye ingaruka biriya bikorwa bigira ku buzima bw’abantu ndetse no ku bidukikije, yavuze ko buriya bucukuzi bugira ingaruka ku bukungu bw’igihugu kuko butesha agaciro isoko ry’ubucukuzi bw’amabuye y’agaciro mu Rwanda.

CIP Karekezi yavuze ko hafashwe abantu 3 abandi 40 bariruka baracika, muri uyu murenge wa Rusebeya haravugwa ibirombe byinshi bicukurwamo amabuye y’agaciro mu buryo bunyuranyije n’amategeko, yavuze ko ibikorwa byo guhagarika ubu bucukuzi bizahoraho.

Itegeko N° 58/2018 ryo ku wa 13/08/2018 ingingo ya 54 ivuga ko Umuntu wese ushakashaka, ucukura, utunganya, ucuruza amabuye y’agaciro cyangwa kariyeri nta ruhushya, aba akoze icyaha. Iyo abihamijwe n’urukiko, ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano.

Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .