00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Baratabariza Ikigo Nderabuzima kigiye gusenywa n’umugezi

Yanditswe na Nsanzimana Erneste
Kuya 10 June 2022 saa 08:50
Yasuwe :

Abaturage bivuriza ku Kigo Nderabuzima cya Rutsiro giherereye mu Murenge wa Manihira, batewe impungenge n’umugezi wa Kanyankima unyura iruhande rw’iki Kigo bagasaba ko hagira igikorwa mu maguru mashya utaragisenya.

Umugezi wa Kanyankima unyura hagati y’Umudugudu wa Rufungo n’umudugudu wa Kimpongo. Ubusanzwe uyu si umugezi munini ariko iyo imvura yaguye amazi aba menshi agasatira inyubako z’iki Kigo Nderabuzima.

Nzabagerageza Aimable uturiye iri vuriro yabwiye IGIHE ko mu gihe hatagira igikorwa mu maguru mashya, uyu mugezi warisenya bakazabura aho bivuriza.

Ati "Impungenge dufite ni uko mu minsi iri imbere Kanyankima izaba yasenye kiriya Kigo Nderabuzima tukabura aho twivuriza, serivisi z’ubuvuzi zigahagarara.”

Mu myaka itatu ishize, biturutse ku mvura nyinshi yari yaguye muri aka gace uyu mugezi wateje umwuzure amazi yinjira muri iki kigo yangiza ibikoresho n’aho abakozi barara.

Umuyobozi wacyo Ntakuvuganeza Thomas yemeje ko amazi yigeze kwinjira mu kigo akagiza ibikoresho.

Ati "Dufite impungenge ko umugezi wazatwara Ikigo Nderabuzima, ugasanga n’ubuzima bw’abantu bubigendeyemo".

Umuyobozi w’Akarere ka Rutsiro, Havugimana Etienne yabwiye IGIHE ko Ikigo Nderabuzima cya Rutsiro kiri mu manegeka kubera umugezi ukomeje kugisatira, gusa ngo bari gushaka uko cyakwimurwa kikanazamurirwa urwego kigahabwa abaganga b’inzobere.

Ati "Ni Ikigo Nderabuzima mu by’ukuri gikwiye kwimuka kandi kizagira akamaro kanini bitewe n’aho giherereye".

Ikigo Nderabuzima cya Rutsiro cyakira abaraturage bo mu mirenge ya Rusebeya, Murunda, Manihira yo mu Karere ka Rutsiro n’umurenge wa Sovu wo mu Karere ka Ngororero. Biteganyijwe ko inyubako nshya izimurirwamo servisi zitangirwa muri iki kigo izatwara asaga miliyoni 200.

Abaturage basaba ko mu gihe ubushobozi bwo kwimura, iri vuriro butaraboneka haba hubatswe urukuta rw’amabuye rwabuza amazi kongera kwinjira mu kigo mu gihe haba hongeye kugwa imvura nyinshi kitarimurwa.

Iki Kigo Nderabuzima bivugwa ko imvura iramutse yongeye kugwa ari nyinshi kitarimurwa gishobora gusenywa n'umugezi
Aka kagezi ubusanzwe ni gato ariko iyo haguye imvura nyinshi karuzura amazi akinjira mu Kigo Nderabuzima cya Rutsiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .