00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Arenga miliyoni 630Frw agiye gushorwa mu kubungabunga ibinyabuzima byo mu Kivu

Yanditswe na Nsanzimana Erneste
Kuya 21 Ukuboza 2022 saa 03:37
Yasuwe :

Abarobyi bo mu kiyaga cya Kivu bashimye umushinga wo kubungabunga ibinyabuzima byo mu kiyaga cya Kivu bavuga ko uziye igihe kuko umusaruro w’isambaza wagabanutse.

Babitangaje kuri uyu wa 20 Ukuboza 2022, ubwo mu karere ka Rutsiro hatangizwaga umushinga wo kubungabunga ibinyabuzima byo mu biyaga no guhangana n’imihindagukirikire y’ibihe.

Hitabatuma Sylvain, Perezida wa Koperative y’abarobyi bo mu murenge wa Musasa yavuze ko muri iyi minsi bari kuroba ibiro 250 mu gihe mbere isambaza zikiboneka barobaga ibilo 1500.

Ati “Isuri nayo iratwangiriza kuko isambaza zibyarira ku nkengero z’ikiyaga zije no kurya ibyatsi. Iyo hajemo imicanga n’isuri bituma isambaza zitororoka”.

Nzabandora Daniel uyobora koperative y’abarobyi bo mu murenge wa Gihango, yavuze ko kuba umusaruro w’isambaza waragabanutse isuri ibifitemo uruhare.

Ati “Umugezi wa Koko umanura isuri nyinshi, ndetse n’iyo urebye usanga itaka umanura ryaragiye risunika amazi y’ikiyaga cya Kivu. Uyu mushinga rero uzadufasha nk’abarobyi kuko isambaza zitazongera kubura aho zororokera”.

Umuyobozi w’imirimo rusange mu muryango wita ku bidukikije ( ARCOS ) Jaqueline Ntukamazina, yavuze ko batangiriye gukorera mu karere ka Rutsiro muri 2012, bahera ku kubungabunga ishyamba rya Gishwati Mukura, kuko babonaga hatagize igikorwa mu maguru mashya ryashiraho. Iryo shyamba ubu Leta yafasheho igice kimwe ikigira pariki.

Ati “Muri iki gihe icyo dushyizemo imbaraga ni ukubungabunga umuhora uri hagati y’iyi pariki n’Ikiyaga cya Kivu mu rwego rwo kugabanya isuri ijya mu kiyaga cya Kivu”.

Kamondo Stephanie, Umukozi w’Ikigo cy’Igihugu gishinzwe ibidukikije REMA, yagaragaje ko Ikiyaga cya Kivu ari ikigega cy’igihugu mu bijyanye n’umusaruro w’amafi kuko 70% by’umusaruro w’amafi mu Rwanda ava kiyaga cya Kivu.

Kamondo yagaragaje ko muri iki gihe iki kiyaga kibangamiwe n’isuri iva mu migezi ibiri y’ingenzi yisukamo ariyo Sebeya na Koko.

Ati “Amafi yororokera ku nkengero z’ikiyaga. Iyo hajemo isuri amafi abura aho yororokera, umusaruro ukagabanuka”.

Umuyobozi w’Akarere ka Rutsiro Murekatete Triphose yavuze ko uyu mushinga babona uzagira akamaro gakomeye kubera ko mu byo uzibandaho harimo no kubungabunga inkengero z’ikiyaga cya Kivu.

Ati “Harimo ahantu twari dufite n’ubundi ubona hari ikibazo, harimo abantu bahinga inkengero z’ikiyaga bikaba byagira n’ingaruka ku mafi cyangwa isambaza. Uyu mushinga uzaca ibyo bibazo kandi unongere umusaruro”.

Uyu mushinga uzaca amaterasi y’indinganire kuri hegitari 10, utere ibiti 90 000 bivangwa n’imyaka ku buso bwa hegitari 500 ndetse unashyire imbaraga mu kurwanya ibyonnyi hakoreshejwe imiti ituma ubusimba duhunga aho gukoresha itwica.

Ibikorwa biteganyijwe muri uyu mushinga bizatwara ibihumbi 560 z’amayero (arenga miliyoni 634Frw).

Arenga miliyoni 634Frw agiye gukoreshwa mu kubungabunga ibinyabuzima byo mu kiyaga cya Kivu
Hejuru 70% by'umusaruro w'amafi mu Rwanda ava mu Kiyaga cya Kivu
Muri uyu mushinga hazaterwa ibiti ibihumbi 90 bivangwa n'imyaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .