00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Abantu 150 bafashwe bangiza inkengero z’Ikiyaga cya Kivu

Yanditswe na Nsanzimana Erneste
Kuya 7 Ukuboza 2022 saa 09:46
Yasuwe :

Mu rwego rwo kubungabunga amazi y’Ikiyaga cya Kivu n’urusobe bw’ibinyabuzima biyarimo Akarere ka Rutsiro gaherutse gukorera mu mirenge ikora ku Kiyaga cya Kivu irimo Boneza, Kigeyo, Gihango na Kivumu umukwabu wafatiwemo abantu bagera ku 150 bakora ibikorwa byagiza amazi y’iki kiyaga.

Umuyobozi w’Akarere ka Rutsiro Murekatete Triphose yabwiye IGIHE ko mu bafashwe harimo abakoreraga ubuhinzi ku nkengero z’ikiyaga batubahirije metero zagenwe.

Ati "Hari abantu bari batangiye guhinga ku Nkengero z’amazi, ku bufatanye n’inzego z’umutekano abo bantu barafashwe barahanwa kuko hari ibihano biteganywa ku muntu uba wangije inkengero z’amazi. Tugomba gukomeza ubufatanye twereka abaturage ko badakwiye guhinga ku nkengero z’amazi kuko bigira ingaruka ku mazi no ku binyabuzima birimo".

Abantu bafatiwe muri uyu mukwabu wakozwe mu mpera z’ukwezi gushize k’Ugushyingo harimo abantu 50 bo mu murenge wa Boneza, abantu 19 bo mu murenge wa Gihango, 43 bo mu murenge wa Kigeyo n’abantu 8 bo mu murenge wa Kivumu.

Abakuze baturiye inkengero z’Ikiyaga cya Kivu bavuga ko ubuso bw’iki kiyaga bugenda bugabanuka, bakagaragaza ko hari ibice byahindutse ubutaka bwumutse kandi byarahoze ari mu mazi y’Ikiyaga cya Kivu.

Iri gabanuka ry’ubuso bw’amazi y’Ikiyaga cya Kivu riterwa n’isuri ahanini ituruka ku bikorwa bya muntu birimo ubuhinzi n’ubucukuzi bw’umucanga bukorerwa ku nkombe z’iki kiyaga.

Rimenyande Onesphore, umusaza w’imyaka 62 wavukiye akanakurira hafi y’Ikiyaga cya Kivu mu karere ka Rutsiro, yabwiye IGIHE ko azi ubuso bwahoze ari mu mazi ariko ubu bukaba bwawahindutse ubutaka bwumutse.

Ati "Ubuso bw’Ikiyaga cya Kivu buragabanuka kuko isuri iyo imanuye ibitaka biraza bikitekera ahari amazi y’Ikiyaga hagahinduka ubutaka bwumutse".

Ikiyaga cya Kivu gifite ibilometero 90 by’uburebure n’ibilometero 50 by’ubugari. Gifite ubuso bwa km2 2700, nicyo kiyaga cya mbere kinini mu Rwanda kikaba icya 6 muri Afurika. Iki kiyaga gicumbikiye amoko menshi y’amafi, inyoni ndetse kibamo n’inzibyi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .