00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Abahinzi b’icyayi barijujutira ubuyobozi bwa Koperative idatanga umucyo ku nguzanyo bishyuzwa

Yanditswe na Muhire Desire
Kuya 11 Mutarama 2023 saa 07:22
Yasuwe :

Bamwe mu bahinzi b’icyayi bibumbiye muri Koperative ’RUTEGROC’ ikorera mu karere ka Rutsiro, barinubira uko bakatwa amafaranga yo kwishyura ideni Koperative yabo yafashe muri Banki Itsura Amajyambere (BRD).
Abaganiriye na IGIHE bavuga ko kwishyura ideni risaga miliyari 1.5 Frw batabyanze ariko bakanenga uburyo bikorwamo.
Bavuga ko buri munyamuryango akatwa amafaranga, ntabwirwe ingano y’ayo amaze gutanga n’ayo asigaje kwishyura, ibyo ngo bikabatera impungenge ko n’abazabakomokaho bashobora (...)

Bamwe mu bahinzi b’icyayi bibumbiye muri Koperative ’RUTEGROC’ ikorera mu karere ka Rutsiro, barinubira uko bakatwa amafaranga yo kwishyura ideni Koperative yabo yafashe muri Banki Itsura Amajyambere (BRD).

Abaganiriye na IGIHE bavuga ko kwishyura ideni risaga miliyari 1.5 Frw batabyanze ariko bakanenga uburyo bikorwamo.

Bavuga ko buri munyamuryango akatwa amafaranga, ntabwirwe ingano y’ayo amaze gutanga n’ayo asigaje kwishyura, ibyo ngo bikabatera impungenge ko n’abazabakomokaho bashobora kuzishyura iryo deni.

Ni inguzanyo yatanzwe kuva 2011-2013 bayihawe mu rwego rwo kwagura imirima y’ibyayi, bamwe muri bo bayikoresha ibindi, ndetse abandi bava muri uyi Koperative none byabaye ingorabahizi kwishyura iyi nguzanyo.

Ubonabaseka François yagize ati" Twagiye dufata inguzanyo, ariko kugeza ubu ntabwo tuzi aho inguzanyo igeze yushyurwa. Bavuga ko tugenda twishyura buhoro buhoro bakagira ayo bakata, ariko nta we uzi uko inguzanyo azishyura ingana, igihe bazatubwira ngo turekere aho nta cyo tuzi."

Akomeza agira ati" Ntabwo badusobanurira ngo wowe ufite inguzanyo iyi n’iyi, ugejeje aha wishyura, na twe ni ibintu bituyobera."

Aba banyamuryango basaba ubuyobozi bw’Akarere ka Rutsiro kubavuganira ku buyobozi bwa Koperative, buri munyamuryango akamenya inguzanyo asabwa kwishyura, n’igihe azaba yarangije kuyishyura.

Nzabanyurahe Saveri ati" Ingorane dufite ni uko bagiye baduha ifumbire, abandi bakabaterera icyayi byose ku nguzanyo, ariko iyo ugiye kugurisha icyayi bakubwira ko hari amafaranga bagukase, ntibakubwire umubare wayo n’igihe iyo nguzanyo izarangirira. Twe tubibonamo akarengane ndetse n’amanyanga y’abayobora Koperative yacu, twararenganye ni uko twabuze uturenganura."

Aloys Nzamwita uyobora RUTEGROC avuga ko ikibazo gikomeye bagize ari ubukangurambaga bwakozwe nabi kuko bamwe mu banyamuryango bayifashe nk’inkunga aho kuyifata nk’inguzanyo izishyurwa.

Abasaga 165 bafashe inguzanyo bahinga icyayi, nyuma barakirandura bateramo amashyamba, biteza igihombo kingana na miliyoni zisaga 126 Frw.

Ku kibazo cy’uko abanyamuryango bashinja ubuyobozi kudatanga umucyo ku cyo buri munyamuryango asabwa , yasubije ati" Koperative ni yo yafashe inguzanyo, umunyamuryango uri muri Koperative agomba kuyishyura, nitumara kwishyura abanyamuryango bazabimenya."

Umuyobozi w’Akarere ka Rutsiro ushinzwe amakoperative Eugenie Uwamahoro, yavuze ko nta gisubizo gihari cy’igihe iyi nguzanyo izarangirira kwishyurwa.

Ati" Umuntu wese uhinze Icyayi n’uteganya kugihinga muri aka gace iyo nguzanyo imujyaho, aba umwe mu bagomba kuyishyura, nta gisubizo gihari cy’igihe iyi nguzanyo izaba yamaze kwishyurwa."

Uyu muyobozi akomeza avuga ko igisubizo bagitegereje ku buyobozi bwo hejuru kuko Minisitiri w’untebe aherutse kubasura akumva iki kibazo ndetse ngo bakigejeje no ku badepite umwaka ushize ubwo basuraga uturere twose tw’Igihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .