00:00:00 IGIHE NETWORK KN KINYARWANDA EN ENGLISH FR FRANCAIS

Rusizi: Poste de Santé yo ku kirwa cya Gihaya imaze imyaka itatu idakora

Yanditswe na Nsanzimana Erneste
Kuya 28 Ukuboza 2022 saa 09:50
Yasuwe :

Abatuye ku kirwa cya Gihaya mu murenge wa Gihundwe mu karere ka Rusizi barasaba guhabwa umuforomo ku ivuriro rito (Poste de santé) bubakiwe rikaba rimaze imyaka itatu ridakora.

Kuba ivuriro ridakora bagaragaza ko bituma hari ubwo bishyura 5000Frw y’urugendo rwo mu mazi kugira ngo bagere ku ivuriro.

Amavuriro mato ni gahunda yashyizweho na guverinoma y’u Rwanda mu rwego rwo korohereza abaturarwanda kubona ubuvuzi hafi.

Ivuriro rito rya Gihaya kuva ryubakwa muri 2019, ntabwo rirabona umuforomo wo kurikoreramo.

Uzamushaka Costasie utuye mu mudugudu wa Budorozi avuga ko hari abagore babyarira mu nzira kubera ko bakora urugendo rurerure kugira ngo bagere ku ivuriro.

Ati “Biratugora nk’iyo tujyanye umubyeyi kwa muganga hari igihe abyarira mu nzira bakaduca 5000Frw y’amande y’uko atabyariye kwa muganga. Abayobozi barabizi, iyo tubabajije bavuga ko bazaduha abaganga ariko baratinze”.

Nyirahabufite Francine avuga ko iyo ari ku manywa ubwato bubishyuza amafaranga 300Frw kugira ngo bambuke ariko ngo iyo hari umurwayi ukeneye kujya kwa muganga abasabe bamuca 5000Frw kugira ngo bamwambutse.

Ati “Hari n’igihe mu Kivu haba harimo umuyaga mwinshi, umurwayi akareba akavuga ngo aho kugira ngo mpfire mu Kivu reka ntegereze ugasanga abyariye mu nzira bakamuca amande y’uko atabyariye kwa muganda. Icyifuzo cyacu ni uko batuzanira abaganga hano kuri poste de santé ya Gihaya”.

Umujyanama w’Ubuzima ushinzwe abagore batwite kuri iki kirwa, yabwiye IGIHE ko hari umubyeyi aherutse guherekeza amujyanye ku kigo nderabuzima, babura ubwato bubambutsa.

Ati “Byageze aho uwo mubyeyi abyarira mu nzira, agiye kwa muganga gukingiza bamuca amande y’uko atabyariye kwa muganga. Turasaba ko baduha umuganga kuri ino poste de santé, kuko mu gihe cyashize bakoze inama bavuga ko bagiye kuhashyira umuriro w’amashyanyarazi bakanahohereza umuganga wo kuhakorera.”

Aba baturage bavuga ko kuba ubwato bubishyuza 300Frw kugira ngo bubambutse bagere ku kigo nderabuzima, bituma hari abaturage barembera mu rugo.

Umuyobozi wungirije w’Akarere ka Rusizi ushinzwe ubukungu n’iterambere , Louis Munyemanzi avuga ko bari bafite gahunda yo kubanza gukemura ikibazo cy’umuriro hanyuma bakoherezayo n’umuforomo.

Ati “Umuntu yakurikirana akamenya impamvu umuforomo ataboneka ngo ageyo, kuko ubwo duherukayo hari ibintu byinshi twari twasize dutunganyije ubwo haba haravutsemo ikibazo cyo kudakurikirana neza ngo umuntu amenye ko biri gukora uko bikwiye”.

Ikirwa cya Gihaya gituyeho abaturage barenga 1300 naho ivuriro rya Gihaya ryari ryubatswe mu rwego kwegereza ubuvugizi abatuye kuri iki kirwa rimaze imyaka 3 ridakora.

Mu karere ka Rusizi hamaze kubakwa poste de sante 55 izikorerwamo neza 18, naho izigera kuri 37 biteganyijwe ko zigomba gukorerwaho n’abaforomo bavuye ku kigo nderabuzima ari naho abaturage binubira ko bazigeraho bakabura abaforomo bo kubavura.

Abatuye ku kirwa cya Gihaya bavuga ko ubuyobozi bumaze igihe bubizeza ko hagiye kuboneka umuforomo uzakorera kuri poste de sante ya Gihaya ariko ngo amaso yaheze mu kirere
Abatuye ku Kirwa cya Gihaya barembera mu ngo kuko Ikigo nderabuzima cyabo kiri kure
Abatuye ku kirwa cya Gihaya babura aho bivuriza kuko poste de sante bubakiwe imaze imyaka itatu idakora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .