00:00:00 IGIHE NETWORK KN KINYARWANDA EN ENGLISH FR FRANCAIS

Rusizi: Havuguruwe imiyoboro izafasha abasaga 200 000 kubona amazi meza

Yanditswe na Nsanzimana Erneste
Kuya 21 Ukuboza 2022 saa 02:24
Yasuwe :

Abaturage barenga ibihumbi 200 bo mu mirenge 14 mu turere twa Nyamasheke na Rusizi ubu bari mu byishimo nyuma yo guhabwa amazi meza bakaruhuka imvune n’ibihombo.

Muri gahunda ya Guverinoma yo kwihutisha iterambere mu myaka irindwi, Perezida wa Repubulika y’u Rwanda Paul Kagame yasezeranyije Abanyarwanda ko bitarenze 2024 bose bazaba bafite amazi meza 100%.

Ibi binavuze ko mu cyaro umuturage azaba abona amazi muri mitero zitarenze 500 naho mu mijyi ntizirenge metero 200.

Kugira ngo ibi bigerweho, Ikigo gishinzwe amazi isuku n’isukura WASAC, cyashyize ingufu mu kubaka inganda z’amazi n’imiyoboro yayo ari nako kivugurura ishaje.

Nyuma yo gusanga akarere ka Rusizi gatuwe n’abaturage benshi bataragerwaho n’amazi meza kandi ari kamwe mu mijyi yunganira Kigali, WASAC yahubatse uruganda rutunganya amazi.

Urwo ruganda rwa Mwoya rwubatse mu Murenge wa Butare, rukaba rufite ubushobozi bwo gutanga metero kibe 3000 z’amazi ku munsi. WASAC kandi yavuguruye imiyoboro y’amazi yari yarangiritse mu rwego rwo kwegereza amazi abaturage.

Ni mu mushinga wari ugamije gukemura ikibazo cy’amazi make mu bice bitandukanye by’akarere ka Rusizi no mu nkengero.

Uyu mushinga washyizwe mu bikorwa ku nguzanyo ya Banki Nyafurika Itsura Amajyambere ( AFDB),wabaye igisubizo ku baturage bo mu Mirenge ya Giheke, Kamembe, Gihundwe, Mururu, Muganza, Rwimbogo, Bugarama, Nyakabuye, Gikundamvura, Butare na Bweyeye yo mu Karere ka Rusizi n’abo mu Mirenge ya Kirimbi, Gihombo na Mahembe yo mu Karere ka Nyamasheke.

Umuyobozi muri WASAC ushinzwe imishinga, Rwibasira Xavier yavuze ko uyu mushinga ari umwe mu mishinga yashyizwe mu bikorwa mu rwego rwo kwegereza amazi meza abatuye mu mijyi itandatu yunganira Kigali.

Ati“Abaturage turabasaba ubufatanye mu kubungabunga ibikorwaremezo by’amazi begerejwe.Nk’uko twafatanyije mu gushyira mu bikorwa uyu mushinga, iriya mirimo nibo bayikoze babonyemo amafaranga mu buryo bw’akazi hubakwa iriya miyoboro. Ni ibikorwa bakwiriye gufata neza kuko ni ibyabo”

Nsengiyumva Amos wo mu mudugudu wa Nyehonga, Akagari ka Ryankana, Umurenge wa Bugarama avuga ko mbere yo guhabwa amazi meza bavomaga amazi y’umugezi wa Ruhwa n’uwa Rubyiro, bayanywa akabaterwa indwara.

Ati “Hari igihe umugezi wabaga wuzuyemo ibitaka n’ibyatsi tugapfa kunywa kubera ko nta kundi twari kubigenza. Kuva batwegereza amazi meza nta bantu bagikunze kundwara inzoka nk’uko mbere byari bimeze”.

Nsengiyumva Philemon wo mu Murenge wa Butare, avuga ko batarabona amazi meza bicaga akazi bagiye kuvoma, ariko ngo ubu igiceri cya 20Frw kiba gihagije bakabona amazi meza hafi yabo batavunitse.

Ati “Iyo wajyaga mu kazi byagusabaga gutaha kare kugira ngo uze kubona uko ujya mu kabande kuzana amazi. Umubyizi ntabwo wabonekaga neza kuko ubwo niba nari butahe saa saba hari igihe natahaga saa sita”.

Nsengimana avuga ko kwegerezwa amazi byabafashije kongera isuku kuko abafite inzu zirimo sima n’amakaro basigaye bakoropa buri munsi mu gihe mbere bakoropaga nka rimwe mu cyumweru.

Ati “Mbere umuntu yogaga uyu munsi akirenza undi munsi atoze kugira ngo arebe ko amazi akoresha yagabanuka.Kuri ubu dukaraba buri munsi kuko ijerekani igura 20 Frw kandi ntiwayikaraba wenyine ngo uyirangize”.

Mubemaso Eraste ufite restaurant mu Mudugudu wa Kareba, Akagari ka Gaterera mu murenge wa Butare, yavuze ko bataregerezwa amazi ku kwezi yavomeshaga ibihumbi 60Frw ariko ubu ngo ku kwezi yishyura amafaranga atarenze ibihumbi bitandatu .

Mubemaso akomeza avuga ko kwegerezwa amazi byanamufashije kongera isuku yaba iy’ibikoresho ndetse n’iy’aho akorera.

Abatishoboye begerejwe amazi mu ngo nta kiguzi

Muri uyu mushinga wo kwegereza amazi abatuye akarere ka Rusizi abatishoboye bagera kuri 740 bagerejwe amazi meza mu ngo ku buntu. Icyo bazakora ni ukwishyura amazi bakoresheje.

Ubusanzwe kugira ngo umuturage ageze amazi mu rugo iwe asabwa kwishyura amafaranga ibihumbi makumyabiri (20,000 Frw) y’ifatabuguzi, ndetse no kwigurira ibikoresho .

Mukamajoro Liberatha, utuye mu mudugudu w’abasigajwe inyuma n’amateka, mu kagari ka Cyangugu mu Murenge wa Kamembe, avuga ko mbere kubona amazi byabagoraga.

Ati “Ubu dufite ibyishimo twabonye amazi turoga tukamesera n’abana nta kibazo dufite, mwarakoze kuduha amazi”.

Mukarutabana Sauda ati “Nta cyizere twari dufite ko amazi azatugeraho mu rugo kuko nta bushobozi twari dufite bwo kugira ngo tubone amazi”.

Umuyobozi wungirije w’Akarere ka Rusizi ushinzwe ubukungu n’Iterambere Ndagijimana Louis Munyemanzi, yavuze ko uyu mushinga wo kwagura imiyoboro y’amazi no kubaka uruganda rwa Mwoya watumye igipimo cy’ababona amazi meza muri aka karere kiva kuri 68% kigera kuri 80%.

Ati “Biriya bice bya Butare, Nyakabuye, Gikundamvura na Bweyeye ni mu misozi ihanamye bavomaga ibishanga, ariko uyu munsi baravoma ku mavomo yabegerejwe. Uriya muyoboro ujya gutangira kubakwa twakanguriye abaturage kuzawufata neza kuko n’umuyoboro wahenze igihugu n’uyu munsi nibyo tubakangurira, kuwurinda no kuwufata neza”.

Umushinga wo kwagura no kuvugurura imiyoboro y’ amazi mu karere ka Rusizi no mu nkegero zako watangiye gushyirwa mu bikorwa muri Kamena 2019 urangira muri Mata 2022, utwaye hafi miliyari 10 z’amafaranga y’u Rwanda.

Abatishoboye bahawe amazi meza nta kiguzi
Abavomaga umugezi wa Rubyiro na Ruhwa begerejwe amazi
Umushinga wo kwegereza amazi meza abaturage ba Rusizi na Nyamasheke wubatse ibigega 49
Kwegerezwa amazi meza byabafashije kongera isuku
Umuyobozi w'uruganda rwa Mwoya avuga ko uru ruganda rufite ikoranabuhanga rigezweho
Uruganda rw'amazi rwa Mwoya rutunganya metero kibe 3000 ku munsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .