Rusesabagina yarizize – Ubuhamya bwa Miheto warokokeye muri Hotel des Mille Collines

Yanditswe na IGIHE
Kuya 8 Nzeri 2020 saa 08:03
Yasuwe :
0 0

Tatien Ndolimana Miheto warokokeye muri Hotel des Mille Collines Jenoside yakorewe Abatutsi mu 1994, yatangaje ko Paul Rusesabagina uheruka gutabwa muri yombi yizize, ubwo yatangiraga kurwanya leta kubera kutanyurwa n’uwo yari we.

Yatangaje ko yasanze ari ngombwa kugira icyo avuga kuri Rusesabagina nk‘umuntu umuzi kandi babanye muri Hotel des Milles Collines, ariko ibikorwa bye bikaza gukabirizwa ko yabarokoye, benshi bakamwibeshyaho.

Miheto ni umwe mu bari bahungiye muri Hotel des Milles Collines n’umuryango we, akaba yaranayoboye komite y‘impunzi icyo gihe bitaga "Comité de crise."

Mu buhamya bwe, Miheto avuga ko muri Mille Collines hari hahungiye abantu benshi bo mu nzego zinyuranye, barimo abayobozi muri Leta, abanyapolitiki, abanyamategeko, abaganga, abacuruzi n’abandi, ku buryo mu gihe bahamaze bakoze ku buryo ibyaberaga mu Rwanda bimenyekana. Boherezaga ubutumwa hirya no hino ku Isi, bagasaba ubufasha bakoresheje telefone na fax.

Ati "Icyaje kutubabaza ni uko kuva Rusesabagina yahinjira, afata ubuyobozi bwa Hotel des Mille Collines, yaduhagarikiye itumanaho kuri Fax na telefone, mbese yaduhagarikiye icyizere cyo kubaho kuko twisanze tutakibashije gukomeza gutabaza hanze y’u Rwanda."

"Ibi ni ibintu bikomeye, kubivuga biroroshye ariko mu by’ukuri byari ukutwica urubozo; yanadukoreye kandi ibindi bibi byinshi birimo kudufungira amazi, dusigara dutunzwe n’ikiziba cya piscine ya hoteli."

Miheto avuga ko filime Hotel Rwanda yagaragaje Rusesabagina nk’igihangange yatumye benshi bamwibeshyaho, ku buryo mu gihe bamwe babaga bamushima, abarokokeye muri Mille Collines bo bababazwaga n’uko arimo “kudutobera amateka”

Miheto yavuze ko Rusesabagina ajya kumenyekana, hasohotse igitabo “We Wish to Inform You That Tomorrow We Will Be Killed With Our Families”, cyanditswe n‘Umunyamerika Philip Gourevitch, uri mu banditse bwa mbere ku mateka ya jenoside yakorewe Abatutsi.

Ngo yaje mu Rwanda nyuma gato ya jenoside, ajya ahantu henshi habereye ubwicanyi, aza no kubonana n’umudamu wari mu barokokeye muri Hotel des Mille Collines, amugeza no kuri Rusesabagina Paul n’umunyamakuru Thomas Kamilindi, abo batatu bamuha ubuhamya ku byabereye kuri Mille Collines.

Yaje kuva mu Rwanda ajya mu Bubiligi, nyuma aza gushakwa n’umuntu wamukinnyeho filime ifatwa nk’iyayobeje intekerezo za benshi.

Miheto avuga ko yatangiye kurwanya uburyo Rusesabagina yafatwaga mu 2001, kugeza muri uyu mwaka ubwo yatabwaga muri yombi.

Yagize ati “Ijambo ryanjye kwari ukuvuga ko twiruhukije, twishimiye ko nta mwanya, nta ngufu tuzongera gutwarwa n’ibikorwa bitwangiriza.”

Miheto avuga ko Rusezabagina yanze guhinduka kuko yakomeje kuba uwo yahoze ari we, akomera ku ngengabitekerezo y’amoko.

Ati "Abantu bose bamuzi batangazwa n’uko yitirirwa ibyo atakoze. Ariko iyo ataza gukomeza kuba uwo ari we, akemera bakamugira igitangaza akirira amafaranga ariko ntarengere ngo yumve ko bitamuhagije, akomeza igice cyanyuma gisoza jenoside aricyo cyo kuvuga ko mu by’ukuri atari Jenoside yakorewe abatutsi ahubwo ari intambara, ko ahubwo agomba kurwanya Leta iriho agashinga amashyaka ayirwanya, agashyiraho imitwe yitawaje intwaro igatera u Rwanda akica abanyarwanda."

Miheto avuga ko kuva Rusesabagina yatangira kugirwa icyamamare, yakunze kumubwira ko "Ntawe ukama inka ngo ayirye n‘inyama", bityo ko akwiye gucisha make akareka ibyo kurwanya leta.

Yakomeje ati "Nubwo yatuzonze, yatwishyuzaga kandi ba nyiri Hotel barabimubujije, jye sinshaka rwose kubiha agaciro kuko ibyo ni ibintu bito, igikomeye ahubwo ni uwo ari we. Ubu rero namubwira ngo uyo filimi yakinnye guhera igihe bamugize igihangange, bamubeshyera na we yibeshya, iyo filimi yarizinze.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .