RURA yabujije radio na televiziyo kongera kwamamaza ibikorwa by’ubuvuzi

Yanditswe na Mukaneza M.Ange
Kuya 19 Gashyantare 2019 saa 05:26
Yasuwe :
0 0

Urwego rw’igihugu ngenzuramikorere (RURA), rwasabye radio na televiziyo zikorera mu Rwanda guhagarika kwamamaza no gutambutsa ibiganiro byamamaza ibikorwa by’ubuvuzi.

Ubutumwa RURA yanyujije kuri Twitter kuri uyu wa 19 Gashyantare 2019 buvuga ko hashingiwe ku ngingo ya 21 y’amabwiriza agenga serivisi z’ isakazamakuru mu Rwanda, “RURA irasaba amaradio n’amateleviziyo guhagarika kwamamaza, no kunyuzaho ibiganiro byamamaza ibikorwa by’ubuvuzi.”

Ivuga ko biri mu rwego rwo gushyira mu bikorwa amabwiriza ya Minisiteri y’ubuzima abuza kwamamaza ibikorwa by’ubuvuzi, n’ibiganiro bitemewe.

Ingingo ya gatatu y’aya mabwiriza ya Minisiteri y’Ubuzima ivuga ko “Umuntu wese abujijwe kwamamaza imiti n’ibikorwa by’ubuvuzi mu buryo bw’amashusho, mu biganiro, mu bitabo, mu muhanda ukoresheje indangururamajwi n’imbuga nkoranyambaga.”

Itangazamakuru rikora mu buryo ubwo aribwo bwose kandi ryabujijwe gutangaza ibikorwa byo kwamamaza imiti n’ibikorwa by’ubuvuzi keretse mu gihe ushaka serivisi agaragaje icyangombwa cya Minisiteri ifite ubuzima mu nshingano kibimwemerera.

Ni mu gihe ingingo ya kane yo ivuga ko “bibujijwe gutanga ibiganiro byerekeye ubuvuzi udahagarariye Minisiteri ifite ubuzima mu nshingano zayo, ikigo, urwego cyangwa ivuriro byemewe n’iyo Minisiteri kandi udafite uburenganzira bwanditswe bwatanzwe n’ubuyobozi bwa Minisiteri, ikigo cyangwa ivuriro byemewe na Minisiteri.”

Mu kiganiro aherutse kugirana n’inzego zitandukanye zirimo n’itangazamakuru, Minisitiri w’Ubuzima, Diane Gashumba, yavuze ko nubwo biriya bikorwa bitemewe, byari bimaze gufata indi ntera mu bitangazamakuru no ku mbuga nkoranyambaga.

Ati “Hari nk’abo njya numva ngo bavura inyatsi, abagore babuze abagabo bakabashakira abagabo, ubwo buvuzi ntabwo tuzi mu gihugu cyacu.”

Minisiteri y’Ubuzima ivuga ko ibihano ku barenze kuri ariya mabwiriza bizajya bitangwa na RURA ifite mu nshingano kugenzura imikorere y’ibitangazamakuru mu Rwanda.

Radio ni bumwe mu buryo bukoreshwa cyane mu kwamamaza ibikorwa by'ubuvuzi mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza