Rulindo: Polisi yafatanye umusore igikapu cyuzuyemo urumogi agiye kurucuruza i Kigali

Yanditswe na IGIHE
Kuya 9 Ukuboza 2019 saa 08:43
Yasuwe :
0 0

Mu mpera z’iki cyumweru cyarangiye nibwo abapolisi bashinzwe umutekano wo mu muhanda bafashe umusore w’imyaka 23 y’amavuko, afite udupfunyika tw’urumogi 2000, afatirwa mu karere ka Rulindo mu murenge wa Bushoki, mu kagari ka Nyirangarama.

Umuvugizi wa Polisi mu Ntara y’Amajyaruguru CIP Alexis Rugigana, avuga ko uyu musore yari avuye mu karere ka Rubavu agiye mu mujyi wa Kigali, ubwo yari mu modoka itwara abagenzi mu buryo bwa rusange, yikanze abapolisi imbere mu muhanda asaba shoferi guhagarara akavamo.

CIP Rugigana yagize ati “Imodoka uriya musore yari arimo yageze mu kagari ka Nyirangarama yerekeza i Kigali noneho uriya musore yikangaga abapolisi imbere ahita aheka igikapu yari afite ava mu modoka atangira kugenda n’amaguru."

Abapolisi barimo gucunga umutekano wo mu muhanda babonye avuye mu modoka ahetse igikapu bagira amakenga baramuhamagara baramusaka basanga harimo udupfunyika tw’urumogi ibihumbi Bibiri.

Umuvugizi wa Polisi mu Ntara y’Amajyaruguru avuga ko uyu musore urumogi yari aruvanye mu karere ka Rubavu arujyanye mu mujyi wa Kigali aho yari afite abakiliya. Yakomeje asaba abantu gucika ku ngeso mbi yo gucuruza ibiyobyabwenge bagashaka indi mirimo bakora kandi yemewe n’amategeko.

Yagize ati "Uriya musore yakagombye gukora indi mirimo imubyarira inyungu kandi idafite ikibazo iteje mu muryango nyarwanda, ibiyobyabwenge byangiza ubuzima bw’ababikoresha kandi kubikoresha ni icyaha gihanwa n’amategeko, uriya musore ubu yafashwe agiye gufungwa, ni igihombo kuri we, umuryango we ndetse n’igihugu muri rusange."

Akimara gufatwa abapolisi bamushyikirije Urwego rw’Ubugenzacyaha (RIB) rukorera kuri sitasiyo ya Bushoki, kugira ngo akurikiranwe n’amategeko.

Itegeko riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni 20 Frw ariko atarenze miliyoni 30 Frw ku byerekeye ibiyobyabwenge bihambaye harimo n’urumogi.

Uyu musore yafatiwe kuri Nyirangarama aturutse i Rubavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza