00:00:00 IGIHE NETWORK KN KINYARWANDA EN ENGLISH FR FRANCAIS

Rulindo: Ingo ibihumbi 12 zigiye guhabwa imbabura zigezweho mu kwirinda guhumanya ikirere

Yanditswe na Thamimu Hakizimana
Kuya 2 August 2022 saa 08:39
Yasuwe :

Ingo ibihumbi 12 zo mu Karere ka Rulindo zigiye guhabwa imbabura za cana rumwe zibungabunga ibidukikije mu rwego rwo kuzifasha kudakomeza kwicwa n’imyotsi no kwangiza ibidukikije.

Izi mbabura zizatangwa muri uku Kwezi kwa Kanama 2022 n’Ikigo Quality Engineering gisanzwe gifasha uturere kubungabunga ibidukikije.

Akarere ka Rulindo ni kamwe mu dufite imibare minini y’abaturage bateka bakoresheje inkwi mu buryo bwa gakondo bikagira ingaruka ku bidukikije.

Ni muri urwo rwego mu kwirinda ihumanya ry’ikirere, aka karere kashakishije abafatanyabikorwa ngo bagafashe kugabanya umubare w’abatari bake bagicana bakoresheje inkwi mu buryo bwa gakondo buzwiho ko buhumanya ikirere.

Izi mbabura zigiye gutangwa imwe ifite agaciro k’amadolari 35 ya Amerika [ibihumbi 35 Frw] n’ubushobozi bwo kugabanya imyuka ihumanya ikirere hejuru ya 60% ndetse akaba ari na yo mpamvu bagiye kuziha abo mu miryango itishoboye kugira ngo zibafashe kutacyangiza.

Umuyobozi Mukuru wa Quality Engineering, Umwizerwa Prosper, yavuze ko ku ikubitiro bagiye gutanga imbabura ibihumbi 12 ndetse iki gikorwa nikigenda neza bazongera bagatanga izindi zigera ku bihumbi 18.

Yagize ati “Biri muri gahunda yo kwirinda ibijyanye no guhumamya ikirere kuko byagaragaye ko mu Karere ka Rulindo hari umubare w’imiryango itishoboye myinshi igicana ikoresheje uburyo bwa gakondo ikoresheje inkwi.”

Yongeyeho ko mu gutanga izi mbabura hazashyirwaho itsinda ry’abazajya bagenzura ko abazihawe bazikoresha kugira ngo igihe zigize ikibazo bajye bahita bazikora, anashimangira ko bazajya bagirana amasezerano n’abazihawe mu kwirinda ko hari abazigurisha.

Umuyobozi w’Akarere ka Rulindo wungirije ushinzwe Iterambere ry’Ubukungu, Mutsinzi Antoine, yabwiye IGIHE ko izi mbabura bazitezeho umusaruro ugaragara.

Yagize ati “Tuzitezeho umusaruro kuko twari dufite imiryango igicana mu buryo bwa gakondo igahumanya ikirere kandi birumvikana ko yajyaga gutashya ikangiza amashyamba. Twizeye ko uwo mubare uzagabanuka na ba bana bataga umwanya bajya gushakisha inkwi mu mashyamba bakabona igihe cyo kwiga no gukora ibindi.”

Mutsinzi yasabye imiryango izahabwa izi mbabura kuzazifata neza ntizazigurishe nk’uko byagaragaye ku bazihawe mu Karere ka Rwamagana, anasaba abanyamabanga Nshingwabikorwa b’Utugari kuzirinda kuzifata ku nshuro ya mbere kuko atari bo zagenewe.

Abanyamabanga Nshingwabikorwa b'Utugari two mu Karere ka Rulindo basabwe kudafata izi mbabura bwa mbere
Ni igikorwa cyitabiriwe n'abanyamabanga Nshingwabikorwa b'Utugari twose tw'Akarere ka Rulindo
Umuyobozi wa Quality Engineering, Umwizerwa Prosper, avuga ko izi mbabura zizafasha mu kubungabunga ibidukikije
Umuyobozi w'Akarere wungirije ushinzwe Iterambere ry'Ubukungu, Mutsinzi Antoine, yavuze ko izi mbabura bazitezeho umusaruro ugaragara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .