00:00:00 IGIHE NETWORK KN KINYARWANDA EN ENGLISH FR FRANCAIS

Rulindo: Hafashwe abarimo uwiyitaga umusirikare bagakwirakwiza urumogi

Yanditswe na IGIHE
Kuya 23 January 2022 saa 06:44
Yasuwe :

Ku mugoroba wa tariki ya 21 Mutarama na mu gitondo tariki ya 22 Polisi ikorera mu Karere ka Rulindo yafashe umugabo w’imyaka 40 na mugenzi we w’imyaka 43 bakwirakwiza urumogi.

Umwe yafatanwe udupfunyika tw’urumogi 144 naho mugenzi we afatanwa udupfunyika 200. Bafatiwe mu Murenge wa Shyorongi, Akagari ka Bugaragara, umudugudu wa Gatimba.

Umuyobozi wa Polisi mu Karere ka Rulindo, Chief Inspector of Police(CIP) Pacifique Gakwisi Semahame yavuze ko uwa mbere ubwo yafatwaga yabanje kubeshya abapolisi ko ari umusirikare mu ngabo z’u Rwanda(RDF), ndetse yari afite ikarita yacyuye igihe.

Yagize ati” Hari ku mugoroba wa tariki ya 21 Mutarama abapolisi bahagarika imodoka itwara abagenzi mu buryo bwa rusange yarimo umwe mu bafashwe. Bagiye kumusaka mu gikapu nk’abandi bagenzi arabyanga ngo we ntibamusake ni umusirikare, bamusohoye hanze bamwaka ibyangombwa basanga afite ikarita ya gisirikare yacyuye igihe mu mwaka wa 2018.”

CIP Semahame yakomeje avuga ko abapolisi bamaze kubona iyo karita bamugiriye amakenga, bamubaza ibibazo bitandukanye aza kuvugisha ukuri ko mu mwaka wa 2019 ubwo yari afite ipeti rya Caporal yafungiwe muri gereza ya gisirikare urukiko rwa gisirikare rumukatira igifungo cy’imyaka ibiri nabwo azize gukoresha urumogi.

Arangije igihano yahise yirukanwa mu gisirikare ariko atahana ikarita noneho atangira ubucuruzi bw’urumogi. Kuri iyi nshuro yafashwe aruvanye mu Karere ka Rubavu arujyanye mu mujyi wa Kigali.

Mu gitondo cyo kuri uyu wa Gatandatu tariki ya 22 Mutarama nibwo kuri iyi bariyeri iri mu Murenge wa Shyorongi hafatiwe undi mugabo afite urumogi udupfunyika 200. Na we yafatiwe mu mudoka itwara abagenzi mu buryo bwa rusange avuye mu Karere ka Musanze agiye mu Mujyi wa Kigali.

Umuyobozi wa Polisi mu Karere ka Rulindo yakanguriye abantu gucika ku ngeso yo gukoresha ibiyobyabwenge kuko byangiza ubuzima bw’ababikoresha ndetse bikaba intandaro y’ibindi byaha. Yabibukije ko ibihano ku cyaha cyo gukoresha ibiyobyabwenge biremereye, abakangurira kubireka bagashaka indi mirimo bakora yemewe n’amategeko.

Ati” Ibihano ku byaha byo gukoresha ibiyobyabwenge biraremereye cyane, usibye n’ibyo kandi ibiyobyabwenge byangiza ubuzima bw’ubikoresha ndetse bigahungabanya umutekano w’Igihugu. Uwa mbere azanakurikiranwaho icyaha cyo kwiyitirira urwego adakorera.”

Abafashwe bahise bashyikirizwa Urwego rushinzwe ubugenzacyaha (RIB) rukorera muri sitasiyo ya Polisi ya Shyorongi kugira ngo hatangire iperereza.

Iteka rya minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cy’urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange ingingo ya 279 ivuga ko umuntu wese utabigenewe, wivanga mu mirimo y’ubutegetsi ya gisivili cyangwa iya gisirikare cyangwa wiha gukora umwe muri iyo mirimo, wiyita umukozi wa Leta atari we cyangwa wambara ku mugaragaro umwambaro w’ubutegetsi, umwambaro uhuriweho n’abahuje umurimo, urwibutso cyangwa ikimenyetso, agambiriye kuyobya rubanda, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarenze imyaka itatu (3) n’ihazabu y’amafaranga y’u Rwanda atari munsi y’ibihumbi magana atatu (300.000 FRW) ariko atarenze ibihumbi magana atanu (500.000 FRW).


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .