Rulindo: Abari bafite ibikorwa byahagaritswe munsi y’Isoko rya Rusine barasaba ingurane

Yanditswe na Thamimu Hakizimana
Kuya 24 Gashyantare 2021 saa 05:47
Yasuwe :
0 0

Bamwe mu baturage munsi y’Isoko rya Rusine riherereye mu Murenge wa Masoro, Akarere ka Rulindo baravuga ko babuze aho babariza ikibazo cy’ingurane basezeranyijwe mu myaka itanu ishize ku bikorwa byabo byari byubatse ahiswe mu gishanga.

Abimuwe munsi y’iri Soko rya Rusine barenga 10, babwiye TV1 ko bari bafite inzu zo gucururizamo ndetse bamwe muri bo banahatuye mbere yo gusabwa kwimuka.

Bavuga ko mu 2015 imitungo bari bafite yari yarakorewe igenagaciro buri wese ahabwa urupapuro ruriho amafaranga azishyurwa ndetse icyo gihe ubuyobozi bw’Akarere ka Rulindo bwabasobanuriraga ko ari ukugira ngo iruhande rw’iryo soko haboneke umwanya wisanzuye.

Umwe ati “Batekereje gusenya inzu basanga atari ngombwa kugira ngo badusenyere badafite indishyi baduhaye ni ko gukora ibi byo kutubarira bemeza ko ibyo bikorwa byo hejuru ari iby’umuturage kubikuraho bareba aho bamwerekeza cyangwa bakamuha ingurane kugira ngo arebe ahandi yajya.”

Undi muturage yagize ati “Icyo gihe bari bambariye 3.800.000 Frw n’uko badusenyeye inzu nta kantu baduhaye kandi bari batubariye. Icyifuzo cyanjye rero ni uko kudusenyera inzu nta handi bagushyize dusanga twararenganijwe.”

Aba baturage bemeza ko bafite amakuru y’uko Akarere ka Rulindo kishyuye abantu babiri muri bo ku buryo bibaza impamvu bo batishyuwe.

Umuyobozi w’Akarere ka Rulindo wungirije Ushinzwe Ubukungu, Mulindwa Prosper,yavuze ko abaturage basabwe kwimurwa ari abari batuye hejuru y’umugezi wa Rusine mu gishanga.

Yavuze ko nta ngurane bari guhabwa kuko ubutaka bari batuyeho ari ubwa Leta dore ko nta n’ibyangombwa bari bahafitiye.

Ati “Naho ibyo kubabarira niba wibuka neza bari bafite inzu zishaje cyane zubakishishije ibiti nyinshi kandi duto duto kandi ubutaka zubatsweho atari ubwabo ari ubwa Leta. Iyo tujya mu byo kubaha amafaranga bari gukuramo udufaranga duke ahubwo bakajya kubaho nabi, ibyo ni ibya kera kandi ntabwo byigeze biba umwanzuro wa nyuma ni cya gihe abantu babaga bagikusanya ibitekerezo, tutararamara gufata umwanzuro wa nyuma.”

Meya w’Akarere ka Rulindo, Kayiranga Emmanuel yavuze ko abo baturage basabwe kwimuka ari abari batuye mu gishanga hejuru y’umugezi wa Rusine.

Yavuze ko abitiranya ubutaka bwubatsweho isoko rya Rusine n’ubw’abo baturage ntaho bihuriye kuko ubwubautsweho isoko bwo bwari ubwa Leta kandi nta n’abaturage bari babutuyeho.

Kuri abo baturage bavuga ko bari bemerewe amafaranga y’ingurane ngo bimuke mu gishanga, Meya Kayiranga yabihakanye, avuga ko nta ngurane bigeze bizezwa kuko batari guhabwa ingurane ku butaka bwa Leta buri mu gishanga, batanafitiye ibyangombwa.

Ati “N’inzu zabo ziracyahari uretse ko twababujije kuzikoreramo. Ubutaka ntabwo bwubatseho isoko […] Nta byangombwa bafite, babigira ku butaka bwa Leta se ? Aho isoko ryubatse ho ni ubutaka bwa Leta ijana ku ijana, nta n’umuturage wari uhatuye.”

Umugezi wa Rusine abo baturage bari baturiye ukunze kuzura mu gihe cy’imvura ukangiza ibikorwa bitandukanye birimo n’ubuzima bw’abantu.

Isoko rya Rusine riherereye ku muhanda Kigali-Gicumbi mu Murenge wa Masoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .