Ruhango: Umuturage yasabwe kwitaba ubuyobozi yitwaje ibyangombwa byafashwe nk’amananiza

Yanditswe na Thamimu Hakizimana
Kuya 23 Ukwakira 2019 saa 03:52
Yasuwe :
0 0

Ndayambaje Shabani utuye mu Kagari ka Nyamagana, umurenge wa Ruhango mu Karere ka Ruhango, yandikiwe n’ubuyobozi bw’akagari bumusaba kubwitaba yitwaje ibyangombwa byinshi ku buryo byafashwe nk’amananiza.

Ibyangombwa yasabwe kwitwaza birimo mituweli, ikarita y’umuganda, icyemezo cy’irondo, icyemezo cy’ubwiherero bwuzuye,Icyemezo cy’uko ufite akarima k’igikoni n’icyangombwa kigaragaza ko adacuruza ibinyobwa bitemewe.

Iyi hamagaza Ndayambaje yayandikiwe ku wa Kabiri tariki ya 22 Ukwakira 2019, asabwa kwitaba kuri uyu wa Kane tariki 24 Ukwakira.

Iyo nyandiko yakwirakwijwe ku mbuga nkoranyambaga, bamwe bagaragaza ko bidakwiriye kuko ari amananiza.

Umunyambanga Nshingwabikorwa w’Aka ka Nyamagana, Gahamanyi Nathanael, yatangarije IGIHE ko iyi hamagaza bayanditse mu rwego rwo guhwitura abaturage.

Ati “ Imiterero y’iyo hamagaza ndayizi gusa ikiba kigamijwe ni amakuru kuko buriya iyo icacacanye bigira icyo bihindura cyane ko umuyobozi w’akagari n’umwungirije bataba bashobora kunyura mu ngo zisaga 4000 ngo bamenye niba abaturage bujuje ibyo byose.”

Yongeyeho ko iyo umuturage yitabye bagasanga hari ibyo atujuje biri mu byo yatumwe ntacyo bamutwara ahubwo bamugira inama yo kubyuzuza.

Umunyamabanga Nshingwabikorwa w’Umurenge wa Ruhango, Nemeyimana Jean Bosco, we avuga ko atari uko umuturage yagakwiye guhamagazwa, ariko ashimangira ko biba biri muri gahunda yo kwibutsa umuturage inshingano ze.

Ati “ Siko yakagombye kuba ikoze nta n’ubwo bamutumirije ibintu bihambaye wenda hari ibyo ubuyobozi bushaka kumugiraho inama, hanyuma urabona biriya bintu bagiye bashyiramo harimo mituweli, akarima k’igikoni no kudacuruza ibiyobyabwenge mu yandi magambo ni nko kwibutsa umuturage inshingano ze.”

Yongeyeho ko na we iyo hamagaza yayibonye aganira n’Umunyamabanga Nshingwabikorwa w’Akagari ka Nyamagana wayanditse, amubwira ko ari bwo buryo amaze imyaka ine akoresha mu rwego rwo kugira ngo yibutse abaturage nshingano zabo.

Ubuyobozi bw’akarere ka Ruhango bwatangaje ko buri gukurikirana icyo kibazo kuko ibyakozwe bitemewe n’amategeko.

Bwavuze ko ibyo byangombwa ntaho biteganywa. Nyuma yo gukurikina ngo buzafata umwanzuro ukwiriye.

Hamagara yandikiwe umuturage n'akagari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza