Ruhango: Akarere kakunze kwisanga mu twa nyuma mu mihigo na gahunda z’iterambere, kuri ubu kifashe gute?

Yanditswe na Prudence Kwizera
Kuya 21 Ukuboza 2020 saa 07:35
Yasuwe :
0 0

Urebye mu myaka igera kuri itanu ishize ubona Akarere ka Ruhango karakunze kuza mu myanya ya nyuma mu kwesa imihigo no muri gahunda z’iterambere zitandukanye ariko mu 2019/20 kateye intambwe ijya mbere kaza ku mwanya wa 17.

Hasigaye amezi agera kuri arindwi ngo hatorwe abayobozi bashya kuko manda y’abayobozi b’uturere yatangiye mu 2016 iri kugera ku musozo.

Ibipimo bya vuba byerekana ko mu mwaka w’imihigo wa 2016/17, Akarere ka Ruhango kaje ku mwanya wa 28; mu 2017/18 kaza mu mwanya wa 29 naho mu mihigo iheruka ya 2019/20 kateye intambwe kajya imbere kaza ku mwanya wa 17.

Mu mwaka w’imihigo wa 2017/18 kaje ku mwanya ubanziriza uwa nyuma mu mihigo ndetse muri icyo gihe havugwaga ibibazo by’ubwumvikane buke n’amakimbirane hagati y’abari bagize komite nyobozi y’Akarere bituma Inama Njyanama ibeguza bose hatorwa abandi bashya.

Icyo gihe Minisiteri y’Ubutegetsi bw’Igihugu yinjiye mu kibazo cy’ubwumvikane buke bw’abari bagize komite nyobozi y’akarere ariko kubumvikanisha biranga.

Nyuma yo kubona ko imikoranire itari myiza hagati y’abo bayobozi ikomeje kudindiza iterambere ry’abaturage, byabaye ngombwa ko Inama Njyanama y’Akarere iterana ibasaba kwegura bakava mu nzira, bahita babishyira mu bikorwa nta kuzuyaza.

Ku wa 25 Gicurasi 2018 nibwo Habarurema Valens yatorewe kuyobora Akarere ka Ruhango yungirizwa na Rusiribana JMV ku mwanya wa Visi Meya ushinzwe ubukungu naho ushinzwe imibereho myiza y’abaturage aba Mukangenzi Alphonsine.

Icyo gihe uwari Umunyamabanga wa Leta muri Minisiteri y’ubutegetsi bw’Igihugu, Dr Mukabaramba Alvera, yabasabye gushyira hamwe no guhuza imbaraga bagakemura ibibazo biri mu Karere hagamijwe guteza imbere imibereho myiza y’abaturage.

Mu kiganiro aherutse kugirana n’Abanyamakuru, Umuyobozi w’Akarere ka Ruhango, Habarurema Valens, yabajijwe ibintu bitatu bikomeye yumva Komite Nyobozi y’ako karere yakoze mu myaka ibiri imaze.

Yasubije ko icya mbere ari imiyoborere ihamye; icya kabiri ari uko abaturage bishimye kandi bari gukora cyane naho icya gatutu ari ibikorwa remezo byubatswe n’ibiri kubakwa.

Habarurema yavuze ko afite ikipe idadiye kandi ikorana neza mu kuzamura imibereho myiza y’abaturage no guteza imbere akarere.

Ati “Icya mbere nkikubwire, ikiruta ibindi ni uko Akarere ka Ruhango [gafite] ikipe idadiye, dufite ikipe imeze neza. Guhera kuri Njyanama kumanuka kugera ku mudugudu umukozi wese ahugiye mu kazi, yishimiye akazi. Icyo ni icya mbere twagezeho kitari gihari. Uyu munsi rero ubuyobozi, imiyoborere, abakozi, umurava, ubushake icyo ni icya mbere tugezeho. Iyo twicaye na komite nyobozi turacyishimira cyane.”

Habarurema yavuze ko ubu abaturage biyumvamo ubuyobozi kuko iyo babwiyambaje bubakemurira ibibazo kandi nabwo bubegera bugamije kubafasha no kubunganira.

Ati “Abaturage bacu bamaze gusobanukirwa ko batwiyambaza, baduhamagara, icyo bakeneye mu buyobozi bagihabwa n’ubwo kubera ko bashobora kuba benshi bitaba 100% ariko uburyo dushaka gukemura ibibazo byabo barabyishimiye cyane. Icyo twaharaniraga rero, ineza y’Umunyarwanda irimo iregenda igerwaho.”

Akomeza avuga ko n’ubwo imyaka ibiri komite nyobozi imaze iyobora Akarere ka Ruhango ari mike ariko bamaze kubona ko abaturage bishimira serivise bahabwa.

Yakomeje agira ati “Twatangiye kuyobora hari ibikorwa remezo bitaruzura binafite n’imyenda igomba kwishyurwa, uyu munsi mu myaka ibiri tukaba tubirangije, haba ari ukubyuzuza haba ari no kubyishyura.”

Yatanze urugero ku miyoboro mishya y’amazi n’amashanyarazi avuga ko basanze ari imishinga iri mu nyigo barayirangiza.

Atanga urundi rugero ku kigo cy’urubyiruko ahubatswe hotel akavuga ko bayubatse muri iyi myaka ibiri; imihanda ya kaburimbo ya kilometero ebyiri hafi n’igice yubatswe n’umuyoboro w’amazi Shyogwe-Mayaga wavuguruwe.

Avuga kandi ko hari imiyoboro mishya y’amazi iri kubakwa kandi iri hafi kuzura izaha amazi imirenge ya Byimana, Bweramana n’igice cya Gitwe.

Ikindi bishimira ni ibyumba by’amashuri bigera kuri 553 n’ubwiherero burenga 1000 hirya no hino mu Karere.

Mu Karere ka Ruhango ibipimo byerekana ko mu 2016 abaturage bagerwagaho n’amazi meza bari ku kigero cya 18% kuri ubu bari kuri 65% n’aho amashanyarazi yari kuri 18% abayafite bageze kuri 45%.

Habarurema yavuze ko we n’abamwungirije batangiye manda muri Gicurasi 2018 hari imiryango igera ku bihumbi icyenda idafite ubwiherero bayifasha kububona n’ubwo hari ubwasenywe n’ibiza bugera kuri 20 bugiye kubakwa muri iyi minsi.

Hari kandi ubwiherero bugera kuri 200 butujuje ibisabwa nabwo bugiye kuvugururwa.

Imiryango igera ku bihumbi 25 yabanaga n’amatungo mu nzu yafashijwe kuva muri icyo kibazo, hasigaye igera kuri 250 nayo kandi iri gufashwa muri iki gihe.

Abana bari bafite imirire mibi mu 2018 bari kuri 41% ariko ubu abayisigayemo bagera kuri 29%. Mu guhangana n’ikibazo cy’abana bagwingiye, buri mukozi w’akarere na buri muyobozi yahawe umwana wo kwitaho.

Mu miryango 514 yasemberaga imyinshi yarubakiwe, hasigaye kubakira 20 gusa.

Umuyobozi w'Akarere ka Ruhango, Habarurema Valens, yavuze ko ikipe y'abakozi b'akarere idadiye

Ibintu bitatu bikwiye kwibandwaho

Umuyobozi w’Akarere ka Ruhango, Habarurema Valens, yavuze ko mu myaka ibiri amaze ayobora akarere hari ibintu bitatu yumva bikwiye kuzibandwaho n’abazayobora manda itaha. Avuga ko bashobora kuba bashya cyangwa se we na komite ye bakongera kugirirwa icyizere, bityo bizaterwa n’uko amatora azagenda.

Icya mbere asanga ari ugukomereza aho bageze mu miyoborere kuko bahishimiye; icya kabiri ni kwita ku baturage ku rwego rwo hejuru naho icya gatatu kikaba gukora ibikorwa bifatika biri mu mishinga yatangiye no kubyongera.

Ati “Turashaka kongera imihanda myinshi ya kaburimbo mu Mujyi wa Ruhango. Hakajya kaburimbo zizengurutse aka karere zikanamanuka kugera za Gatengezi zikambuka zikajya ku ibagiro, wasubira hirya mu mujyi iriya mihanda y’ibitaka yose tukareba ukuntu twayihuza kandi irimo kaburimbo.”

Mu bindi bikorwa remezo asanga hakwiye kuzitabwa ku mazi n’amashanyarazi ku buryo mu gihe kitarenze imyaka ibiri n’igice abaturage b’akarere ka Ruhango bazaba babifite ku kigero cya 100%.

Ikindi ni ukwita ku muhanda uva mu Mujyi wa Ruhango ujya i Gitwe ugakomeza i Kabagari ukambuka ujya i Karongi, ugashyirwamo kaburimbo kuko inyigo yawo yarangiye.

Ati “Mbese ni uguhindura isura y’Umujyi wa Ruhango n’amasantere akomeye, kongeramo imihanda no kuzaza amazi n’amashanyarazi.”

Hari abakinyotewe n’ibikorwa remezo

Bamwe mu baturage bo mu Karere ka Ruhango mu Murenge wa Kabagari babwiye IGIHE ko bishimira amazi meza n’amashanyarazi bahawe kuko byahinduye imibereho yabo. Mu byifuzo byabo bifuza ko ibyo bikorwa remezo byagezwa n’aho bitaragera kandi bakubakirwa n’isoko mu gasantere ka Munanira.

Mukantwari Marie Rose ati “Twavomaga mu bishanga amazi mabi akadutera inzoka n’impiswi, ariko ubu twabonye amazi meza ntabwo tukirwara kuko arimo umuti kandi turayateka. Twagiraga umwanda nyine ugasanga umuntu afite ibikoresho bitogeje, atoga atanamesa imyenda kuko kuvoma mu kabande byaratuvunaga.”

Ubuyobozi bubizeza ko ibyifuzo byabo bizakomeza kwitabwaho uko ubushobozi buzajya buboneka.

Bamwe mu bakozi b’Akarere ka Ruhango baganiriye na IGIHE bishimira imiyoborere myiza n’imikoranire hagati yabo na komite nyobozi ariko bakifuza ko Umuyobozi w’Akarere, Habarurema Valens, yareka imvuga bise ‘mbi’ akoresha.

Bavuga ko abatukira mu ruhame cyangwa akabanenga akoresheje amagambo atari meza bikaba byakurura umwuka mubi cyangwa bikabaca intege mu kazi kuko iyo bakoze neza badashimwa.

Umwe muri bo yagize ati “Meya ni umukozi ariko inenge afite ni uko avuga nabi akaba yatukira n’umuntu mu ruhame. Numva inama namugira ari ukureka imvugo mbi ahubwo umuntu yaba yateshutse ku nshingano akamugira inama nk’umuyobozi aho kumutuka no kugaragaza kamere mu kazi.”

Bemeza ko igihe amaze nk’umuyobozi w’akarere yazanye impinduka nziza mu mikorere, imibereho myiza y’abaturage n’iterambere bitandukanye n’uko mbere byahoze.

Umuyobozi wungirije ushinzwe iterambere ry'ubukungu mu Karere ka Ruhango, Rusiribana JMV
Umuyobozi wungirije ushinzwe imibereho myiza y’abaturage mu Karere ka Ruhango, Mukangenzi Alphonsine

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .