Rubavu: Umuyobozi w’ishuri akurikiranyweho gusoma umunyeshuri w’imyaka 10

Yanditswe na Mukwaya Olivier
Kuya 20 Nzeri 2019 saa 08:22
Yasuwe :
0 0

Murigande Fulgence w’imyaka 37 wari umuyobozi w’ikigo cy’amashuri abanza cya Complexe Scolaire de la Fraternite mu Karere ka Rubavu, arashinjwa gufata umwana w’umukobwa w’imyaka 10 akamusomera mu biro.

Ibi byabaye kuri uyu wa Kane mu masaha ya ya saa mbiri za mu gitondo ubwo uwo mwana yinjiraga mu biro by’umuyobozi w’ishuri agiye gufata ibikoresho.

Bikimara kuba, umwana yahise ataha ajya kubwira ababyeyi be nuko bitabaza ubuyobozi.

Uyu muyobozi w’ikigo yahise abyemera nuko ashyikirizwa sitasiyo ya Gisenyi y’Urwego rw’Igihugu rw’Ubugenzacyaha (RIB).

Umunyamabanga Nshingwabikorwa w’umurenge wa Gisenyi, Uwimana Vedaste yemeje aya makuru ko bagiriye inama umubyeyi yo kwiyambaza RIB.

Ati “Umubyeyi yaturegeye atubwira ko umuyobozi w’ishuri ashaka gusambanya umwana we hanyuma tumugira inama yo kwiyambaza RIB .”

Ingingo ya 133 y’igitabo cy’amategeko ahana ibyaha mu Rwanda ivuga ko umuntu wese ukorera ku mwana kimwe mu bikorwa bishingiye ku gitsina bikurikira, aba akoze icyaha.

Ibyo ni ugushyira igitsina mu gitsina, mu kibuno cyangwa mu kanwa k’umwana;gushyira urugingo urwo arirwo rwose rw’umubiri w’umuntu mu gitsina, cyangwa mu kibuno cy’umwana no gukora ikindi gikorwa cyose ku mubiri w’umwana hagamijwe ishimishamubiri.

Iyo abihamijwe n’urukiko, ahanishwa igifungo kitari munsi y’imyaka makumyabiri ariko kitarenze imyaka makumyabiri n’itanu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza