Rubavu: Umunye-Congo yafatanywe Coltan yahishe ahaterekwa moteri mu modoka

Yanditswe na IGIHE
Kuya 26 Mutarama 2020 saa 08:27
Yasuwe :
0 0

Ishami rya Polisi rishinzwe kurwanya magendu ku bufatanye n’irishinzwe umutekano ku mipaka bafatiye mu Karere ka Rubavu mu Murenge wa Gisenyi ahazwi nko kuri Grande Barrière, umugabo w’umunye-Congo apakiye mu modoka amabuye y’agaciro ya magendu yo mu bwoko bwa Coltan.

Uyu mugabo w’imyaka 40 amaze imyaka itatu atuye mu Rwanda mu Karere ka Rubavu. Yafatanwe ibiro 155 by’amabuye yo mu bwoko bwa Coltan y’umweru.

Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko iyo modoka yafatiwe ku mupaka w’u Rwanda na Repubuka Iharanira Demokarasi ya Congo ku mugoroba ahagana saa mbiri z’ijoro.

Yafashwe ku bufatanye bw’abapolisi bakorera kuri uyu mupaka nyuma yo kugirira amakenga iyi modoka bakayihagarika.

Yagize ati “Ubu hari amayeri abatwara magendu mu modoka cyane cyane inshya basigaye bakoresha ugasanga imodoka munsi bayometseho ikindi cyuma kugira ngo babone aho bapakira magendu. Iyi modoka yageze kuri abo bapolisi bayigirira amakenga kuko babonaga ingano yayo yiyongereye niko kumuhagarika barayisaka.”

Yakomeje agira ati “Ubwo bari barimo bayisaka yatangiye no gutitira nyuma nibwo baje gusanga ayo mabuye yayapakiye mu kizuru ahasanzwe haba moteri.”

CIP Karekezi akomeza avuga ko uwo mugabo yemereye abapolisi ko ayo mabuye ari magendu yahawe n’umuturage w’ i Goma amusabye kuyamujyanira iwe mu Karere ka Rubavu.

Umuvugizi wa Polisi mu Ntara y’Iburengerazuba yaburiye abagifite umutima wo kurangura no gucuruza magendu ko bakwiye kubicikaho kuko amayeri n’uburyo bwose bakoresha batazabura gutahurwa.

Ati “Abakishora muri ubu bucuruzi bibwira ko bahimbye amayeri mashya ngo ntibafatwa baribeshya kuko uburyo bwose batwaramo magendu cyangwa bayicuruzamo, Polisi n’abafatanyabikorwa bayo bari maso.”

Yibukije abaturage muri rusange kujya bihutira gutanga amakuru y’aho babonye magendu kuko igira ingaruka ku muryango nyarwanda, aho usanga imisoro iba inyerejwe kuri ibyo bicuruzwa ariyo yubaka igihugu.

Aya mabuye n’imodoka byashyikirijwe ishami rya Polisi rishinzwe kurwanya magendu (RPU) n’aho uyu mugabo ashyikirizwa urwego rw’igihugu rw’ubugenzacyaha RIB kuri sitasiyo ya Gisenyi.

Ingingo ya 54 mu itegeko no 58 ryo ku wa 13/08/2018 rigenga ubucukuzi bw’amabuye y’agaciro na kariyeri rivuga ko gukora ibikorwa by’ubucukuzi bw’amabuye y’agaciro cyangwa kariyeri nta ruhushya, iyo uwabikoze abihamijwe n’urukiko, ahanishwa igifungo kitari munsi y’amezi abiri ariko kitarenze amezi atandatu n’ihazabu y’amafaranga y’u Rwanda atari munsi ya miliyoni imwe ariko atarenze miliyoni eshanu cyangwa kimwe gusa muri ibyo bihano.

Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza