Rubavu: Rurageretse hagati y’Akarere n’umwarimu ugashinja kwirukanwa binyuranye n’amategeko

Yanditswe na Mukwaya Olivier
Kuya 1 Nzeri 2020 saa 09:51
Yasuwe :
0 0

Umwarimu Rukundo Joseph yareze Akarere ka Rubavu agashinja kumwirukana binyuranyije n’amategeko ndetse akavuga ko yahohotewe na bamwe mu bayobozi bako.

Uru rubanza rwabereye mu Rukiko rwisumbuye rwa Rubavu kuri uyu wa Kabiri, tariki ya 1 Nzeri 2020.

Rukundo Joseph wigishaga muri GS Shwemu avuga ko ishingiro ry’ibibazo bye ari umwarimu wavanywe mu Karere ka Ngororero agahabwa umwanya we.

Ati “Natangiye akazi mu 2012 nigisha isomo rya Entepreneurship. Umwaka ushize mu kwezi kwa Gatatu nibwo nabonye Nkundimana Espérance wari ushinzwe Abakozi aje ansohora mu ishuri ndimo gukoresha ikizamini ambwira ko njya kuri GS Nkama ngezeyo umuyobozi waho ambwira ko atankeneye we yanditse asaba umwarimu wize indimi.’’

Yakomeje avuga ko yaje kwiyambaza Akarere ka Rubavu bamusubiza kuri GS Shwemu aho yahoze asanga isomo rye uwamusimbuye agihari.

Ati ‘‘Nongeye kwiyambaza akarere nsanga umushahara warahagaritswe naranirukanwe.’’

Me Rugwizangoga Marcellin umwunganira mu mategeko yungamo akavuga ko n’uburyo kwimurwa byakozwemo bitajyanye n’amategeko kuko nta baruwa yahabwaga.

Ati “Uwamariya Chantal ava Ngororero akaza gusimbura Rukundo nta baruwa imwimura yazanye nkuko biteganywa n’amategeko na Rukundo avanwa kuri GS Shwemu ajya kuri GS Nkama nta baruwa yahawe. Anagaruka ni telefoni gusa yakoreshejwe gusa ngo jya aha ni naryo pfundo ry’ibibazo byabaye nyuma byatumye Rukundo ahagarikwa mu kazi.’’

Me Batsinda Aline uburanira Akarere ka Rubavu avuga ko kwimurya byakurikije amabwiriza y’Ikigo gishinzwe Uburezi (REB).

Ati “Kwimurwa kwe byubahirije amabwiriza ya REB avuga ko mu gihe umwarimu atujuje amasaha asabwa yajyanwa aho azabasha kuyubahiriza kandi nyuma yo kwimurwa akajyanwa kuri GS Shwemu ntiyigeze ahagera akaba ari nayo mpamvu yirukanwe.’’

Rukundo Joseph yamusubije ko atigeze ata akazi kuko yahageze agasanga amasomo ye afitwe n’undi umuyobozi w’ikigo amubwira ko yakwigendera kuko nta mwanya ahafite.

Me Rugwizangoga Marcellin yasabiye umukiliya we avuga ko yirukanwe mu kazi bitemewe n’amategeko indishyi y’akababaro ingana na miliyoni 60 Frw n’igihembo cy’umwunganizi we.

Me Batsinda Aline uburanira akarere yasabye ko urukiko kwemeza ko yirukanwe bikurikije amategeko kandi ko n’indishyi asaba zidafite ishingiro.

Nyuma yo kumva impande zombi, Perezida w’Urukiko yemeje ko umwanzuro ku rubanza uzasomwa tarki 21 Nzeri 2020.

Akarere ka Rubavu kamaze iminsi gahagarika abakozi batandukanye abenshi bakaba baratangiye kwiyambaza inkiko ahanini ku makosa yakozwe n’ubuyobozi bwabanje.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .