Rubavu: Polisi yafashe umusore wibaga insinga z’amashanyarazi

Yanditswe na IGIHE
Kuya 18 Ukwakira 2019 saa 10:27
Yasuwe :
0 0

Polisi y’u Rwanda ikorera mu karere ka Rubavu mu murenge wa Mudende iravuga ko tariki ya 15 Ukwakira yafashe umusore w’myaka 18 y’amavuko. Uyu musore yafatanwe ikizingo cy’insinga z’amashanyarazi gifite metero 80.

Uyu musore ubusanzwe akora umurimo wo gutwara abagenzi ku igare, ari nabwo yafashwe azihetse ku igare, yavuze ko yari azivanye ku musuderi mu murenge wa Mudende mu karere ka Rubavu azishyiriye umuntu uzigura uba mu murenge wa Kabatwa mu karere ka Nyabihu.

Umuvugizi wa Polisi mu Ntara y’Iburengerazuba Chief Inspector of Police (CIP) Emmanuel Kayigi avuga ko ikigo gishinzwe gukwirakwiza amashanyarazi mu gihugu(REG) cyari kimaze iminsi kivuga ko hari abantu bakata insinga zikwirakwiza amashanyarazi mu murenge wa Mudende bigatuma abaturage babura umuriro.

CIP Kayigi avuga ko Polisi ikimara kumenya ayo makuru yahise itegura igikorwa cyo kuzafata abantu baba bakora ibyo byaha.

Yagize ati “Hari hashize iminsi dufite amakuru ko hari abaturage babura umuriro biturutse ku bantu bakata insinga bakajya kuzigurisha. Twahise dutegura igikorwa cyo gushakisha abo bantu nibwo twafatanaga uriya musore insinga zifite metero 80 atazifitiye ibyangombwa, kandi adashobora no gusobanura aho azikuye.”

Umuvugizi wa Polisi mu Ntara y’Iburengerazuba akomeza avuga ko izo nsinga zigaragara ko zakaswe ahantu, bihurirana n’uko REG yari yaratanze amakuru ko insinga babuze, zagiye zikatwa n’abantu batazwi bigatuma haba ibura ry’umuriro mu baturage.

CIP Kayigi yaboneyeho gukangurira abaturage kujya bakora amarondo kugira ngo birindire umutekano, ariko nanone abasaba gufata neza ibikorwa remezo leta iba yabagejejeho, bagira abo babona cyangwa bakeka ko babyangiza bakihutira gutanga amakuru.

Yagize ati “ubundi abantu bakora biriya bintu babikora nijoro, turasaba abaturage gukaza amarondo. Ikindi kandi abaturage tubashishikariza gufata neza ibikorwaremezo leta iba yabagejejeho bakareka kubyangiza.”

Yakomeje agaragaza ko umuntu wangiza ibikorwa remezo wese ari umugizi wa nabi utifuza iterambere leta y’u Rwanda igeza ku baturage. Asaba buri muntu wese kugira uruhare mu kugaragaza bene abo bantu.

Uyu musore yashyikirijwe urwego rw’igihugu rw’ubugenzacyaha kuri sitasiyo ya Busasamana kugira ngo akurikiranwe mu butabera.

Itegeko nº68/2018 ryo ku wa 30/08/2018 riteganya ibyaha n’ibihano muri rusange mu ngingo yaryo ya 166 ivuga ko Umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2) ,ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza