Rubavu: Polisi yafashe bane bakekwaho gukwirakwiza urumogi

Yanditswe na Bukuru JC
Kuya 27 Ugushyingo 2020 saa 07:17
Yasuwe :
0 0

Kuwa Kabiri tariki ya 24 Ugushyingo ishami rya Polisi rishinzwe kurwanya ibiyobyabwenge (ANU) rikorera mu Karere ka Rubavu ryafashe itsinda ry’abantu bane bakurikiranweho gukwirakwiza urumogi ahantu hatandukanye.

Hari umwe wafatanywe udupfunyika tw’urumogi ibihumbi 5, undi afatanwa udupfunyika 1,100 tw’urumogi, uwa gatatu afatanwa udupfunyika 400.

Umuvugizi wa Polisi mu Ntara y’Iburengerazuba, Chief Inspector of Police (CIP) Bonaventure Twizere Karekezi avuga ko gufatwa kw’aba bantu bose byaturutse ku makuru yatanzwe n’abaturage.

Yagize ati “Abaturage bo mu Murenge wa Rugerero mu Karere ka Rubavu, tariki ya 23 ugushyingo, baduhaye amakuru ko hari ukekwaho kuba afite urumogi acuruza. Tukimara guhabwa ayo makuru, abapolisi bo mu ishami rishinzwe kurwanya ibiyobyabwenge bahise bajyayo baramufata, bamusangana udupfunyika 400 tw’urumogi.”

CIP Karekezi akomeza avuga ko akimara gufatwa bamubajije aho akura urwo rumogi, avuga ko aruhabwa n’abantu babiri bo mu Murenge wa Bugeshi ndetse ko mu gihe yajyaga kurukurayo yahahuriye n’undi mugabo nawe wahakuye udupfunyika ibihumbi 2 tw’urumogi yari ajyanye mu Mujyi wa Kigali.

Yagize ati “Umwe muri aba bagize iri tsinda akimara kuduha ayo makuru, n’ubundi ishami rishinzwe kurwanya ibiyobyabwenge, ku wa Kabiri ryahise rijya mu murenge wa Bugeshi, Akagari ka Rusiza aho urucuruza atuye bamusanga mu kabari ke ari kumwe n’undi mugore uyu mugore afite udupfunyika 1,100 yari amaze kugura. Ako kanya abaturage bahise bahagera babwira abapolisi ko uwo mugabo asanzwe akekwaho gucuruza ibiyobyabwenge, abapolisi niko gusaka mu nzu ye basangamo udupfunyika ibihumbi bitanu tw’urumogi.”

Abafashwe bahise bajyanwa kuri sitasiyo ya Polisi ya Kanama aho bagiye gukorwaho iperereza n’urwego rw’igihugu rw’ubugenzacyaha (RIB) ruhakorera.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .