Rubavu: Minisitiri Mutimura yafunze ishuri rya APEFE-Mweya

Yanditswe na Mukwaya Olivier
Kuya 8 Gashyantare 2019 saa 07:42
Yasuwe :
0 0

Minisitiri w’Uburezi, Dr Mutimura Eugène, yafunze Ikigo cy’Amashuri Abanza n’Ayisumbuye cya Apefe-Mweya kiri mu Murenge wa Gisenyi mu Karere ka Rubavu cyari kimaze iminsi kivugwamo ibibazo by’ubwumvikane buke hagati y’abagishinze.

Muri Kanama 2018 nibwo muri APEFE Mweya, hatangiye kuvugwa amakimbirane mu banyamuryango bayo, yatumye n’ubuyobozi bweguzwa ariko uw’ikigo akinangira.

Amakimbirane yagize ubukana nyuma ya raporo yakozwe igaragaza ko Umuyobozi w’ikigo, Ndakaza Laurent, yakoresheje nabi umutungo ufite agaciro ka miliyoni 60 z’amafaranga y’u Rwanda.

Mu rugendo arimo mu Karere ka Rubavu rugamije kureba uko uburezi butangwa, Minisitiri Mutimura kuri uyu wa 8 Gashyantare 2019, yakirijwe n’umwe mu barimu bigishije muri iri shuri akarengane yakorewe.

Ni ubutumwa bwagarutsweho mu nama Minisitiri Mutimura yagiranye n’abashinzwe uburezi mu mirenge n’abayobozi b’amashuri muri Rubavu.

Niyonsaba Sangwa Pascasie yavuze ko yirukanwe na APEFE Mweya, akitabaza inzego zitandukanye ariko ntibigire icyo bitanga.

Yabwiye IGIHE ko “Nabwiye minisitiri ikibazo cy’itotezwa njye n’abana banjye twakorewe. Umuyobozi yarabirukanye kandi bamfitiye amafaranga. Numvaga ikigo kitafungwa ahubwo kigasubizwa abagishinze kuko kugifunga bizagira ingaruka ku banyeshuri n’abarimu.’’

Niyonsaba yavuze ko abana be batanahawe indangamanota z’umwaka w’amashuri ushize.

Iyi nkuru yasembuye n’ibindi bibazo by’ubwumvikane buke buvugwa muri iri shuri, bituma Minisitiri Mutimura yanzura kurihagarika.

Ishuri rya APEFE Mweya ryafunzwe mu gihe Akarere ka Rubavu kari karihagaritse ku kwakira abanyeshuri biga mu mashuri yisumbuye mu mwaka wa 2019.

Umuyobozi Wungirije w’Akarere ka Rubavu ushinzwe Imibereho myiza y’Abaturage, Uwampayizina Marie Grace, yavuze ko “Twari twarabafungiye amashuri yisumbuye kubera imicungire mibi. Wasangaga hari ishuri ririmo abana babiri ukibaza ukuntu abarimu bazahembwa bikakuyobera.”

Iri shuri ryari risigayemo abanyeshuri 124 biga mu mashuri abanza.

Uwampayizina atangaza ko ku wa 9 Gashyantare 2019, hazaterana inama izahuza abayobozi n’ababyeyi izanzura aho abana bazakomereza amasomo.

Ndakaza Laurent wagundiriye ubuyobozi yavuze ko yatunguwe n’icyemezo cyo gufunga ishuri rya mbere.

Ati “Ntabwo bidushimishije kubera icyemezo kidutunguye kuko nta mpamvu igaragara. Kumva ikibazo cy’umwarimu wahagaritswe akavuga ko yahohotewe; ririya shuri iyaba yari azi amakuru yaryo, ryavuye kure mu 2014 ryari mu ya nyuma rigiye no gutezwa cyamunara, none ubu ryari irya mbere mu Murenge wa Gisenyi rikaba muri atatu ya mbere mu Karere ka Rubavu.”’

Yavuze ko ireme ry’uburezi abanyeshuri bashaka rihari, kuko ishuri ryahoze mu myanya ya nyuma ariko ngo igihembo rihawe ni uguhagarikwa.

Ku wa 26 Kanama 2018 nibwo abanyamuryango batoye Mukankaka Mariane ngo ayobore ikigo ariko Ndakaza yanze kuvaho byatumye havuka umwiryane mubashinze iki kigo bituma abana bahigaga bagenda bagabanuka.

Ikigo cy’Amashuri Abanza n’Ayisumbuye cya Apefe-Mweya kiri mu Murenge wa Gisenyi mu Karere ka Rubavu
Minisitiri Dr Mutimura yafunze APEFE Mweya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza