00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Minisitiri Gatabazi yahumurije abaturage bagaragaje impungenge zo kubura ibiribwa

Yanditswe na Mukwaya Olivier
Kuya 24 Nyakanga 2021 saa 05:48
Yasuwe :
0 0

Ministiri w’Ubutegetsi bw’Igihugu, Gatabazi Jean Marie Vianney, yahumurije abaturage bo mu Karere ka Rubavu bari bamaze iminsi bafite impungenge zo kubona ibiribwa muri ibi bihe ako Karere kari muri Guma mu Rugo.

Mu minsi ishize abaturage batandukanye bo mu Karere ka Rubavu bagaragaye bavuga ko bashonje cyane bityo batagishoboye kubahiriza amabwiriza yo kwirinda icyorezo cya Covid-19, kuko nta waguma mu rugo ashonje. Uretse ababivuze mu itangazamakuru, hari n’abaturage bahamagaye telefoni Minisitiri Gatabazi yatanze.

Bivugwa ko kimwe n’utundi turere twose turi mu bihe bya Guma mu Rugo, Leta yari yateguye ibiribwa bizahabwa abaturage ba Rubavu ndetse bamwe muri bo bari bamaze kubona ibiribwa.

Ku rundi ruhande, nyuma yo kumva impungenge z’aba baturage, Minisitiri w’Ubutegetsi bw’Igihugu yohereje intumwa muri aka karere, kugira ijye gusuzuma imiterere y’ikibazo cy’abantu batarabona ibiribwa kandi Leta yarabitanze ndetse anahumurize abaturage basaga nk’abibaza uko bazabaho.

Itsinda ryoherejwe na Minisitiri Gatabazi ryari rikuriwe na Gakire Bob, Umuyobozi Mukuru muri Minisiteri y’Ubutegetsi bw’Igihugu, Ushinzwe Imiyoborere no Kwegereza Ubuyobozi Abaturage, aho ryasuye abaturage bagaragaye bataka inzara, rigasanga bose barahawe ibyo kurya nk’uko byari biteganyijwe.

Mu kiganiro na IGIHE, yavuze ko igikorwa cyo gutanga ibiribwa mu baturage ba Rubavu cyagenze neza muri rusange, asaba abaturage bafite ikibazo kujya begera inzego za Leta zikabasha kuko ibiryo bihagije byateganyijwe.

Ati “Abaturage barishimye, wenda bafite impungenge ko ibiryo bishobora gushira, ariko icyo twababwira ni uko niyo byashira, aho kugira ngo umuntu amare umunsi atariye, yajya ahamagara ubuyobozi kugira ngo atabarwe kuko ibiryo bihagije birahari, igisabwa ni ukubimenyesha kare kugira ngo umuturage abihabwe atarasonza.”

Uzamukunda Aisha wo mu Murenge wa Rubavu ni umwe mu bari bagaragaye bavuga ko bafite ikibazo cy’inzara, akaba yaramaze kubona ibiribwa bizamutunga n’umuryango we muri ibi bihe bya Guma mu Rugo.

Yagize ati “Ndashima Leta kuko yampaye ibyo kurya, ubu turi gucana kandi kuko mfite abana bari gukora ibizamini bya Leta, ubu bari kuva mu rugo bariye, ndashima Leta cyane.”

Nteziryayo Emmanuel yashimye Minisitiri Gatabazi wohereje intumwa kureba ikibazo cy’abaturage b’i Rubavu, ati “Natunguwe n’uko nimero yatanze ikora kandi uyihamagaye wese akabona ubufasha akeneye.”

Akarere ka Rubavu kari mu turere umunani n’Umujyi wa Kigali byari byashyizwe muri gahunda ya Guma mu Rugo kubera ubwiyongere bukabije bw’icyorezo cya Covid-19.

Minisitiri Gatabazi yohereje itsinda ryagiye guhumuriza abaturage bari bafite impungenge zo kuzabura ibiribwa bibatunga muri ibi bihe bya Guma mu Rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .