Rubavu: Isoko mpuzamipaka rya miliyoni 3$ ryitezweho kugabanya inzitizi mu bucuruzi

Yanditswe na Mukwaya Olivier
Kuya 22 Werurwe 2019 saa 08:32
Yasuwe :
0 0

Ubuyobozi bw’Akarere ka Rubavu, kuri uyu wa Kane bwashyikirijwe isoko mpuzamipaka ryari rimaze imyaka ibiri ryubakwa ku mupaka muto "Petite Barrière", uri muri aka karere.

Iri soko rizahuza abaturage b’Akarere ka Rubavu n’abo muri Repubulika Iharanira Demokarasi ya Congo (RDC), rizafasha abaturage wasangaga bikoreye imizingo bakayambukana kuko ubu bazajya basanga ibicuruzwa ku mupaka.

Umuyobozi wa Trade Mark East Africa mu Rwanda, Umutesi Patience, ari nabo batanze inkunga yo kubaka iri soko, avuga ko iki gikorwa kizakomeza mu rwego rwo gufasha ubuhahirane mpuzamipaka.

Ati “Iri soko rimaze imyaka ibiri ryubakwa, ryatwaye miliyoni eshatu z’amadolari harimo n’umuhanda twakoze kugira ngo tugabanye inzitizi mu bucuruzi”.

Iri soko rifite imyanya 192 harimo n’ububiko bugezweho n’ibyumba bikonjesha bitanu.

Trade Mark East Africa irateganya kubaka isoko nk’iri mu Karere ka Rusizi n’icyambu cya Nkora mu Karere ka Rutsiro.

Umuyobozi w’Akarere ka Rubavu, wungirije ushinzwe iterambere ry’ubukungu, Murenzi Janvier, avuga ko nk’akarere biyemeje kuba irembo ry’igihugu mu bucuruzi n’ubukerarugendo mu myaka itandatu.

Avuga ko iri soko ari kimwe mu bikorwa remezo bizatuma bagera kuri iyi ntego yabo.

Ati “Iri soko rizadufasha mu buhahirane n’abaturanyi ba Congo kuko ibicuruzwa bizajya biboneka hafi, bizongera kandi ibyo igihugu cyohereza hanze kuko harimo icyumba cyagenewe kunoza ibikorerwa mu Rwanda.”

Umuyobozi w’abikorera mu karere ka Rubavu Kayumba Nyota Jeannette, avuga ko iri soko rigiye korohereza abagore bakora ubucuruzi bwambukiranya umupaka bakoraga ingendo bikoreye imizigo.

Ati “Iri soko riziye igihe kuko hano mu Karere ka Rubavu twakira abaturanyi benshi bo muri Congo. Wasangaga abagore bakora ingendo ndende bajya mu mujyi gushaka ibicuruzwa, ubu barasubijwe kuko bazajya babisanga hano mu mupaka n’abanyarwandakazi na bo barasubijwe kuko bigiye guca ubucuruzi bw’akajagari aho wasangaga bihishahisha’’

Umunyamabanga uhoraho muri Minisiteri y’ubucuruzi n’inganda, Minega Sebera Michel, avuga ko aya masoko arimo kubakwa azafasha ubucuruzi mpuzamipaka, asaba abaturage kuyafata neza.

Ati “Aya masoko arimo kugenda yubakwa ku mipaka abaturage bazayungukiramo cyane kandi ni gahunda ya leta n’abafatanyabikorwa mu koroshya ubucuruzi buduhuza n’ibihugu duturanye”.

Iri soko ryo mu Karere ka Rubavu rizakoreshwa n’abaturage ibihumbi 55 bambukiranya umupaka muto uhuza u Rwanda na RDC.

Uretse iri soko ku nkengero z’ikiyaga cya Kivu, mu Murenge wa Nyamyumba harimo kubakwa icyambu kigezweho kizoroshya ubuhahirane hagati y’abanyarwanda n’Abanye-Congo, kizatwara miliyoni esheshatu z’amadolari, biteganyijwe ko izarangira mu 2020.

Akabari, icyumba cyo gukonjesha n'aho kurerera abana
Ahazacururizwa ibiribwa
Ahagenewe amabanki
Ahagenewe ibiro by'ivunjisha
Ahazajya harererwa abana bajyaga basigara ku mupaka
Icyumba cyo gukonjesha
Iri soko rizafasha abaturage bagera ku bihumbi 55
Murenzi Janvier ushinzwe iterambere ry'ubukungu mu Karere ka Rubavu
Umunyamabanga uhoraho muri Minisiteri y’ubucuruzi n’inganda, Minega Sebera Michel, avuga ko aya masoko arimo kubakwa azafasha ubucuruzi mpuzamipaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza