Rubavu: Ingo zisaga 8100 ziri guhabwa amashanyarazi ku muyoboro mushya

Yanditswe na IGIHE
Kuya 2 Ukuboza 2020 saa 09:38
Yasuwe :
0 0

Imiyoboro ikwirakwiza amashanyarazi yubakwa mu Mirenge ya Nyundo, Nyamyumba, Kanama, Rugerero na Nyakiriba mu Karere ka Rubavu ubu igeze ku musozo ndetse abaturage batangiye guhabwa amashanyarazi bayifatiyeho.

Umuyobozi w’Ishami rya Sosiyete y’u Rwanda Ishinzwe Ingufu (REG) mu Karere ka Rubavu, Butera Laurent, yavuze ko iyi miyoboro iri kubakwa i Rubavu izakwirakwiza amashanyarazi ku ntera y’ibilometero bisaga 109, ihe umuriro ingo 8,076.

Yagize ati “Uyu ni umushinga twatewemo inkunga na Banki y’Isi, ukaba warakorewe mu Karere ka Rubavu no mu Turere twa Burera na Rulindo. By’umwihariko hano muri Rubavu, uyu mushinga wibanze ku duce duherereye kure y’imiyoboro isanzwe y’amashanyarazi. Ubu ugeze kure kuko ingo nyinshi zamaze kubona amashanyarazi, kandi bitarenze uku kwezi k’Ukuboza, izi ngo zose ziteganijwe zizaba zamaze kuyahabwa.”

Butera avuga ko uyu mushinga uzarangira ingo zifite amashanyarazi i Rubavu zigeze ku ijanisha rya 86%, ubariyemo izifite amashanyarazi akomoka ku muyoboro mugari n’izikoresha akomoka ku mirasire y’izuba.

Ati “Uyu mushinga nurangira, tuzaba dusigaje guha amashanyarazi ingo zibarirwa hagati ya 14% na 15%. Dufite icyizere ko bitarenze umwaka wa 2024 tuzaba twarangije guha ingo zose umuriro, kuko ahantu dusigaje kugeza amashanyarazi ni hato kandi dufite imishinga myinshi izadufasha kubaka indi miyoboro.”

-  Abamaze guhabwa amashanyarazi baranyuzwe

Bamwe mu baturage bamaze kuganura ku mashanyarazi bahawe, bavuga ko bishimira intambwe bateye kuko bayitezeho byinshi kandi bakaba bavuye mu icuraburindi.

Ukozivuze Jean Claude utuye mu Mudugudu wa Bushari uherereye mu Murenge wa Nyamyumba, avuga ko batarabona umuriro w’amashanyarazi byabahombyaga byinshi.

Ati “Twasaga n’aho turi mu mwijima. Twakoraga urugendo rw’isaha kugira ngo tujye kwiyogoshesha. Nkanjye nari mfite inzu nubakaga, kugira ngo inzugi zingereho byarampenze cyane kuko nagiye kuzikoresha kuri “brasserie” (aha yavugaga kuri Bralirwa, Ishami rya Rubavu). Kuba tubonye umuriro biradushimishije cyane kuko ntituzongera guhendwa.”

Ukozivuze avuga ko aho baboneye umuriro, ubu babasha kureba televiziyo bakabona amakuru ku gihe.

Yakomeje avuga ko bafite ingamba zo kubyaza umuriro umusaruro bashyiraho inzu zogosha, imashini zisya, ibyuma bisudira, n’ibindi byose bizabafasha kwiteza imbere.
Mukaneza Agnes utuye mu Kagari ka Busoro, mu Murenge wa Nyamyumba na we yavuze ko amashanyarazi yahawe azamufasha kwiteza imbere.

Ati “Tutarabona umuriro w’amashyanyarazi abana bigiraga ku tubuji no ku dutadowa twa mazutu. Ariko ubu ibyo byarahindutse ndetse mfite mudasobwa mu rugo. Ntarabona umuriro ntabwo nashoboraga kuyikoresha. Abana banjye bagiye kujya bigira ku mashini mu rugo batagombye kujya kuyishakisha hirya no hino.”

Bakorahe Théoneste utuye mu Mudugudu wa Kiguna na we agira ati “Icya mbere abana bacu bagiye kujya bigira mu rugo. Icya kabiri umuriro uzatuma tubona urusyo hafi ndetse n’imashini isya imboga na soya. Urumva ko bizatubera byiza kuba umuriro utwegereye.”

Hitimana Prosper avuga ko umuriro uzafasha abana be gushaka imibereho bihangira imirimo.

Ati “Mfite abana barangije kwiga ariko batagira imirimo. Umwe yakogosha, undi akaba yadoda. Nk’ubu hari umwana w’umukobwa naguriye imashini yo kudoda, ariko kubera ko nta matara, ntiyabonaga uko areba nijoro ari kudoda kandi akeneye gukomeza akazi. Ubu rero abana banjye nzabasaba kwihangira imirimo, hanyuma mbafashe kubona ibikoresho bikenewe.”

Imibare igaragaza ko mu Rwanda, ingo zifite amashanyarazi muri rusange zisaga 56.7% harimo izigera kuri 41.3% zikoresha afatiye ku muyoboro mugari naho 15.4% zikaba zikoresha ayiganjemo akomoka ku mirasire y’izuba adafatiye ku muyoboro mugari.

Leta y’u Rwanda yihaye intego ko mu mwaka wa 2024 ingo zose zituye u Rwanda zizaba zifite amashanyarazi 100% harimo ingo 52% zizaba zifite amashanyarazi afatiye ku muyoboro mugari na 48% zizaba zifite amashanyarazi akomoka ku mirasire y’izuba.

Abaturage bamwenyuye nyuma yo gutangir gucana amashanyarazi begerejwe
Uyu mushinga uzarangira ingo zifite amashanyarazi mu Karere ka Rubavu zigeze ku ijanisha rya 86%
Imiyoboro izakwirakwiza amashanyarazi ku ntera ingana n’ibilometero bisaga 109
Mukaneza Agnes yishimiye ko abana be bazajya bigira kuri mudasobwa
Ukozivuze Jean Claude utuye mu Murenge wa Nyamyumba, avuga ko kutagira umuriro byabahombyaga byinshi
Umuyobozi w’Ishami rya Sosiyete y’u Rwanda Ishinzwe Ingufu (REG) mu Karere ka Rubavu, Butera Laurent, yavuze ko imiyoboro iri kubakwa i Rubavu izaha umuriro ingo 8,076

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .