Rubavu: Imvura yasenye inzu 17 z’abaturage

Yanditswe na Mukwaya Olivier
Kuya 25 Werurwe 2020 saa 12:12
Yasuwe :
0 0

Imvura yaguye kuri uyu wa kabiri tariki 24 werurwe 2020, ahagana saa munani n’igice z’amanywa, yari irimo umuyaga mwinshi cyane wasenye inzu 17 z’abaturage mu Murenge wa Bugeshi mu Karere ka Rubavu.

Umuturage wo muri Bugeshi, Niyonzima Thomas, avuga ko basanzwe bamenyereye ko umuyaga ubatera cyane cyane mu gihe cy’imvura bitewe nuko batuye munsi y’ishyamba ry’ibirunga.

Ati “Hano dusanzwe tumenyereye umuyaga uza uturutse mu ishyamba ry’ibirunga, si ubwa mbere, iyo turi mu gihe cy’imvura ni ko bigenda inzu ziraguruka ukabona amabati mu kirere ameze nk’indege’’.

Umunyamabanga Nshingwabikorwa w’Umurenge wa Bugeshi, Rwibasira Jean Bosco avuga ko uyu muyaga nta muturage wahitanye uretse inzu zasenyutse cyane, yizeza gukorera ubuvugizi aba baturage basenyewe n’uyu muyaga.

Ati “Hano hashize iminsi hagwa imvura nyinshi, ejo imvura yari nkeya ariko irimo umuyaga wa serwakira ikaba yarasenye inzu 17, nta kindi cyangiritse uretse ibisenge n’ibikoresho byo mu rugo. Nta umuntu wahitanye turimo kuvugana n’ubuyobozi bw’akarere mu rwego rwo gushakira ubufasha abasenyewe.”

Mu gihe ubufasha butaraboneka iyi miryango 17 icumbikiwe mu ngo z’abaturage.

Imirenge ituriye ishyamba ry’ibirunga by’umwihariko iryo ku kirunga cya Kalisimbi ariyo; Bugeshi muri Rubavu na Kabatwa muri Nyabihu hakunze kugaragara imvura nyinshi n’umuyaga bisenya inzu bikanangiza imyaka y’abaturage .

Kuwa 3 Werurwe 2017 imvura irimo umuyaga yasenye inzu 26, ibikoni 11, ubwiherero 14 mu kagari ka Nyamirango mu midugudu ya Mareru na Mizingo yo mu murenge wa Kanzeze ndetse hakomereka abantu batatu. Ni nyuma y’uko hari iyari yasenye inzu 24 mu murenge wa Busasamana.

Inzu 17 zasenywe n'imvura yaguye ejo
Iyi mvura ntabwo yari nyinshi ahubwo yaguyemo umuyaga
Abaturage basenyewe n'iyi mvura bacumikiwe n'abaturanyi
Izi nzu zisenywa n'umuyaga uturuka mu ishyamba ry'ibirunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .