Rubavu: Haravugwa abakobwa babeshywa akazi mu macumbi n’utubari, bagacuruzwa

Yanditswe na Mukwaya Olivier
Kuya 23 Ukwakira 2019 saa 02:19
Yasuwe :
0 0

Mu karere ka Rubavu haravugwa icuruzwa ry’abakobwa bavanwa mu bice by’icyaro no mu turere duhana imbibi n’umujyi wa Rubavu bijejwe akazi, bagera bakisanga barimo gucuruzwa mu tubari no mu nzu zicumbikira abantu.

Ubuyobozi bw’akarere ka Rubavu buvuga ko bugiye guhagurikira amacumbi n’utubari bazafatirwamo muri ibyo bikorwa, abo bigaragayeho bafungwe.

Ibi byagaragajwe mu bukangurambaga bugamije kurwanya icuruzwa ry’abantu bwakozwe kuri uyu wa Kabiri mu murenge wa Nyamyumba.

Abaturage baturuka mu mirenge itandukanye igize akarere ka Rubavu batanze ubuhamya bagaraza ko ikibazo cy’abana b’abakobwa bashorwa mu buraya fiteye inkeke.

Umwe mu bakobwa batanze ubuhamya, yavuze ko yakuwe mu cyaro azanywe gukora mu rugo akisanga akora mu kabari ategekwa no kuryamana n’abakiriya.

Ati’’Ngewe iwacu ni i Kayove naje banzanye bambwira ko nje gukora akazi ko mu rugo nisanga banshyize mu kabari. Ibyo ibyo gusambana ntabyo nari nzi iwacu. Umugore wanzanye yajyaga aryamana n’umugabo akambwira ngo nange nindyamane n’undi kugirango twinjize bakanyishyura na we nkamuhaho, nuko nisanze naratwaye inda’’.

Mukantwari (izina ryahinduwe) umubyeyi wo mu murenge wa Nyamyumba na we watanze ubuhamya yavuze uburyo umwana we yajyanywe gukora mu kabari bakamusaba kuryamana n’abakiriya yabyanga bakanga kumuhemba.

Yagize ati “Umukobwa wange afite imyaka 17. Mu kwezi gushize yabonye ndwaye narembye cyane ambwira ko abona ntazajya muha ibyo akeneye agiye kwishakira akazi ko mu kabari mu Rugerero. Ejobundi arangije ukwezi banga kumuhemba kuko shebuja yamusabaga kuryamana n’abakiriya kandi bamwe banarwaye indwara zandurira mu mibonano mpuzabitsina akabyanga nuko njyayo ndatongana baramuhemba arataha’’.

Umuyobozi w’akarere ka Rubavu wungirije ushinzwe iterambere ry’ubukungu, Nzabonimpa Déogratias agendeye ku buhamya bwatanzwe, yavuze ko bagiye gushakisha ahakorerwa icuruzwa ry’abakobwa abazabigagaraho bafatwe bahanwe.

Yavuze ko by’umwihariko bagiye kongera ubugenzuzi mu mahoteli no mu macumbi rusange ndetse no mu tubari.

Ati “Tugiye kongera imbaraga dukore ubugenzuzi mu mahoteri, mu macumbi no mu tubari. Ubwo baduhaye amakuru nitunabasanga iwabo bazayaduha neza bityo n’ababirimo bose bafatwe bahanwe nkuko biteganywa n’amategeko y’u Rwanda’’.

Imibare ya Minisiteri y’Uburinganire n’iterambere ry’umuryango igaragaza ko mu Karere ka Rubavu abangavu bagera kuri 630 batewe inda mu mezi icyenda ya 2019 bituma bagera ku 3035 mu myaka itatu ishize.

Umujyi wa Rubavu kubera urujya n'uruza n'ubukerarugendo ukunze kubamo amacumbi menshi , utubari n'amahoteli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza