Rubavu: Abasenyerwaga na Sebeya batangiye guhabwa inka 475

Yanditswe na Mukwaya Olivier
Kuya 21 Mutarama 2021 saa 02:41
Yasuwe :
0 0

Abaturage bo mu Tugari dutatu twa Karambo, Nkomane na Rusongati mu Murenge wa Kanama mu Karere ka Rubavu barishimira inka 72 bahawe n’Umushinga Ubungabunga Icyogogo cya Sebeya, aho zahawe abakene bari mu cyiciro cya mbere n’icya kabiri.

Inka zahawe abaturage ni intangiriro kuko muri uyu mwaka w’ingengo y’imari wa 2020/2021, inka 475 zizahabwa abaturage bo mu Mirenge ya Kanama, Nyundo na Nyakiriba; kuri ubu haracyari inka 342 zigomba kugezwa ku baturage.

Uretse guhabwa inka, abarenga ibihumbi umunani bamaze guhabwa akazi mu bikorwa byiganjemo gukora amaterasi mu Karere ka Rubavu.

Umwe mu baturage bahawe inka binyuze muri uyu mushinga, Nzabandora Théoneste, yavuze ko aya matungo azafasha imiryango yabo kugera ku iterambere rirambye.

Yagize ati “Ndi mu bantu bakorewe amaterasi mu murima wanjye ndetse ndi mu bantu bahawe akazi mu kuyakora. Dukeneye ko rero ubutaka bwacu buzaba bukomeye budatwarwa n’isuri, bunatanga umusaruro kandi ibi twarangije kubigeraho kuko twanahawe inka zizaduha ifumbire.”

“Uyu munsi nashimishijwe no kwisanga ku rutonde rw’abaturage bahabwa inka. Imiryango yacu izaba ifite imbaraga zo kwihuta mu iterambere kubera ko tugiye guca ukubiri n’imirire mibi.”

Nzabandora yakomeje avuga ko Gahunda ya ‘Girinka’ izamubera isoko yo gukirigita ifaranga bivuye mu musaruro w’amata azajyana ku isoko.

Nyirambabazi Valentine na we yahamije ko agiye kwiteza imbere by’umwihariko ahereye ku muryango we.

Yagize ati “Ifumbire izava ku nka nahawe izajya imfasha mu kubyaza umusaruro uturima tw’igikoni natangiye.”

Nyirambabazi n’abandi bahawe inka bashimiye Guverinoma y’u Rwanda ikomeje kubitaho, aho Umugezi wa Sebeya wabatezaga ibibazo umaze kubungabungwa ku buryo bugaragara.

Umuyobozi Mukuru Wungirije w’Ikigo cy’Igihugu gishinzwe Umutungo Kamere w’Amazi mu Rwanda, Niyotwambaza Hitimana Christine, yavuze ko ibikorwa byinshi muri uyu mushinga bigamije gukura abaturage mu bukene no kubungabunga ibidukikije.

Ati “Uyu munsi izi nka zatanzwe binjyujijwe muri gahunda ya Girinka yatangijwe na Perezida wa Repubulika tukaba twizera ko zigiye guha abaturage ifumbire, imirima yabo yakozwe mu materasi amaze gucibwa ibone ifumbire yongera uburumbuke bw’ubutaka bwabo. Ibi bizaba imwe mu ntwaro zikomeye zizadufasha kubungabunga Icyogogo cya Sebeya.

“Ndasaba ubufatanye bwa buri wese kugira ngo uyu mushinga uzagende neza kandi uzagere ku ntego zawo, cyane cyane duhashya isuri n’imyuzure byakomeje kwibasira abaturiye Umugezi wa Sebeya.”

Charles Karangwa uhagarariye Umuryango Mpuzamahanga wita ku Kubungabunga Ibidukikije mu Rwanda (IUCN) yavuze ko iyo abaturage bakuwe mu bukene, bakigishwa ibyiza byo kubungabunga ibidukikije kandi bakabigiramo uruhare, bitanga umusaruro haba mu kubungabunga ibidukikije ndetse no guteza imbere imiryango yabo.

Umushinga Ubungabunga Icyogogo cya Sebeya ushyirwa mu bikorwa na Guverinoma y’u Rwanda ibinyujije mu Kigo gishinzwe Umutungo Kamere w’Amazi mu Rwanda (RWB) gifatanyije n’Umuryango Mpuzamahanga wita ku Kubungabunga Ibidukikije (IUCN) n’Umuryango w’Abaholandi ugamije Iterambere (SNV) ndetse n’Uturere ku nkunga ya Leta y’Abaholandi.

Uyu mushinga ukorerwa mu Turere twa Rutsiro, Ngororero, Nyabihu na Rubavu.

Abaturage bahawe inka bavuze ko zigiye kubafasha mu kuzamura imibereho yabo
Muri iyi gahunda hazatangwa inka 475
Uyu muhango witabiriwe n'abayobozi batandukanye bafite aho bahuriye n'Umushinga wo kubungabunga Icyogogo cya Sebeya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .