Rtd Major Mudathiru yatunguwe n’uburyo u Rwanda rwakiriye ’adui’ warwo

Yanditswe na Rabbi Malo Umucunguzi
Kuya 28 Ukwakira 2019 saa 02:50
Yasuwe :
0 0

Rtd Major Habib Mudathiru wari uyoboye abarwanyi ba P5 bayoborwa na Kayumba Nyamwasa, yabwiye urukiko ko yatunguwe n’uburyo we na bagenzi be bafunzwemo, kuko bahawe ibikenerwa byose byemererwa imfungwa mu Rwanda.

Yabivuze nyuma y’uko umucamanza w’Urukiko rwa Gisirikare, kuri uyu wa Mbere yari amaze kwemeza ko Rtd Major Mudathiru na bagenzi be 24 bareganwa bafungwa ukwezi by’agateganyo, mbere y’uko urubanza rwabo rutangira mu mizi.

Baregwa kwinjira mu mutwe w’ingabo utemewe, ubugambanyi mu cyaha cyo kugirira nabi ubutegetsi buriho, kugirana umubano na Leta y’amahanga hagamijwe gushoza intambara no kurema umutwe w’abagizi ba nabi.

Mudathiru aburana yemera ibyaha byose ndetse akabisabira imbabazi, ari nabyo urukiko rwashingiyeho rutegeka ko afungwa by’agateganyo, kuko ari ikimenyetso gikomeye gituma hakekwa ko ibyaha aregwa yabikoze.

Yabwiye urukiko ati “Nibyo ntawakwishimira gufungwa, nta nubwo twakwishimira kudahanwa kuko umuco wo kudahana ni mubi, ibyo ntacyo mbivugaho rwose. Gusa njyewe ni ikintu cyo gushima. Mbere na mbere ndashaka gushimira Leta y’u Rwanda uburyo badufashemo n’uburyo tubayeho, turabibashimira cyane kubera ko iyo ufashwe ukitwa ’adui’, mu bindi bihugu uba utotezwa.’’

‘‘Nkaba nshimira Leta y’u Rwanda irangajwe imbere na Nyakubahwa Perezida wa Repubulika, uburyo badufashemo, butandukanye n’ahandi uko mbizi. Aho dufungiwe ni byo koko hakwiriye ikiremwamuntu, uburyo dufashwemo nta totezwa, nta yicarubozo turakorerwa, njye rwose nkaba mbishimira ubuyobozi bwa Military Police.’’

Rtd Major Mudathiru yakomeje avuga ko yifuza gushimira ababunganira mu mategeko nubwo uyu munsi batari mu rukiko, ku bwitange bagaragaje bakababuranira nta kiguzi batanze.

Yakomeje ati “Icya nyuma navuga, ndashimira bagenzi banjye imyifatire yabo muri iki cyiciro cya mbere, berekanye icyubahiro imbere y’ubucamanza, mbashimira ko no mu cyiciro cya kabiri bazabigaragaza. Ibisigaye byo ni ukubishyira mu biganza by’Uwiteka, kuko (Imana) ni yo izi icyo izaba idukorera imbere.’’

Mudathiru wahoze mu Ngabo z’u Rwanda, RDF, Ubushinjacyaha buvuga ko amaze gusezererwa, mu 2013 yerekeje muri Uganda ari naho yahuriye na Maj Robert Higiro wo muri RNC akamuha ubutumwa bwa Kayumba Nyamwasa, ko bafite umutwe wa politiki ariko bashaka no gukora igisirikare cyawo muri RDC, bityo we n’abandi basezerewe mu ngabo yashaka, bakwishyira hamwe bakawuyobora.

Inzego za Gisirikare za Uganda zafashije Mudathiru guhabwa ibyangombwa by’impunzi, ndetse yimurirwa mu nkambi ya Arua kugira ngo abe ari ho bategurira imigambi yabo neza.

Ku wa 20 Nyakanga 2017 nibwo Rtd Maj Habib na Capt Sibo Charles bafashijwe na Sunday Charles, Mateka usanzwe ari umuhungu wa General Mateka wo muri Uganda, bavuye muri icyo gihugu banyuze muri Tanzania, bakomereza mu Burundi mbere yo kwinjira muri RDC banyuze muri Tanganyika.

Ku mupaka w’u Burundi ngo bakiriwe n’abakuriye inzego z’iperereza mu gisirikare cy’icyo gihugu, barimo Colonel Ignace Sibonama ushinzwe iperereza rya gisirikare (Chief J2) na Major Bertin ushinzwe iperereza ryo hanze.

I Bujumbura ngo baraye muri Hotel Transit, ari naho hacumbikirwaga abantu benshi bajya muri RNC. Nyuma ngo Kayumba Nyamwasa yahamagaye Sibo Charles na Major Habib kuri Skype, ababwira ko mu mwanya babonana n’abayobozi ba Gisirikare mu Burundi, ati “Muvugane bikeya kuko ibyinshi twarabirangije.”

Ngo yababwiye ko bahabwa imbunda n’amasasu n’inzira yo gucishamo amakurutu y’Abanyarwanda bari i Burundi, n’inzira yo kunyuzamo abarwayi igihe badashoboye kuvurirwa mu nkambi yabo.

Bahuye na Colonel Ignace Sibomana na Major Bertin bari kumwe na Colonel Nyamusaraba, Umunyamulenge uyobora umutwe witwara gisirikare wa Ngomino.

Ikiganiro bagiranye ngo bemeranyije ko imyitozo ya P5 igizwe ahanini n’Abanyarwanda, bazajya bayikora bitwikiriye inyeshyamba za Ngomino za Col Nyamusaraba, bazaba benshi bakazajya mu nkambi yabo.

Nyuma y’icyumweru kimwe iyo nama ibaye ngo Colonel Sibomana na Maj Bertin, bahaye imodoka n’uburinzi igikundi cya Major Habib n’amakurutu bari kumwe, babageza kuri Tanganyika, bambukira mu bwato bagera muri RDC. Bagezeyo basanga baje kwakirwa n’abandi basanzweyo.

Mu gushyira mu bikorwa ibyo bemerewe, bagenda ngo bahawe SMG 13, LMG eshatu, MMG imwe, ibikarito bine by’amasasu ya SMG na sheni eshatu z’amasasu ya NMG.

Umushinjacyaha Major Dennis Ruyonza yavuze ko nyuma yo gushinga P5, Kayumba yaje kugira Colonel Nyamusaraba umuyobozi w’ibikorwa byose, yungirizwa na Sibo Charles naho Habib Mudathiru ashingwa ibikorwa n’imyitozo.

Nyuma ngo Kayumba yahamagaye Habib kuri telefoni ikoresha icyogajuru, amusaba ko batekereza uko bahindura aho bakorera, ngo bave muri Kivu y’Amajyepfo bajye ku mupaka wa Uganda kuko babonaga u Burundi butabaha inkunga bihagije. Ngo bagombaga no guhura n’umutwe wa RUD Urunana.

Muri uwo mugambi ngo bakoresheje 12000 USD yoherejwe na Ben Rutabana kuri Western Union i Bujumbura. Muri Gicurasi uyu mwaka nibwo bimutse, bageze Kalehe baza guhura n’umutwe wa MRCD iyoborwa na Gen Irategeka, bababwira ko ngo bo batangiye akazi muri Nyungwe.

Bamaze kuruhuka ngo bakomeje urugendo “rutabahiriye na gatoya” kuko bageze muri Gatoyi i Masisi, bahuye n’ibico byinshi bya FARDC, bararaswa, bamwe barafatwa abandi bishyikiriza Ingabo za Loni za Monusco.

Abashoboye kurokoka ngo bagiye bamanika amaboko, kugeza ubwo Leta ya Repubulika Iharanira Demokarasi ya Congo yabashyikirije u Rwanda. Abenshi bahuriza ku kuba barashyikirijwe u Rwanda ku wa 18 Kamena 2019.

Rtd Major Habib Mudathiru atwikiriwe umutaka n'abasirikare ba RDF ku rukiko rwa Gisirikare i Nyamirambo kuri uyu wa Mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza