00:00:00 IGIHE NETWORK KN KINYARWANDA EN ENGLISH FR FRANCAIS

RRA yashyizeho uburyo bwo kwishyura imisoro n’amahoro hifashishijwe ikoranabuhanga

Yanditswe na Ntabareshya Jean de Dieu
Kuya 27 July 2022 saa 10:23
Yasuwe :

Ikigo cy’Imisoro n’Amahoro cyatangije uburyo bwo kwishyura imisoro n’amahoro hifashishijwe ikoranabuhanga mu rwego rwo korohereza abasora no gutanga serivisi zihuse kandi zihendutse.

Ibi byatangajwe mu itangazo ryashyizwe ku rukuta rwa Twitter rw’iki kigo, ryashyizweho umukono na Komiseri Mukuru wacyo Bizimana Ruganintwali Pascal.

Iri tangazo rivuga ko RRA yatangije gahunda yo kwishyura imisoro n’amahoro n’andi mafaranga atari imisoro hakoreshejwe ikoranabuhanga nk’ibyitezweho kwihutisha serivisi zatangwaga.

Uburyo bw’ikoranabuhanga buteganyijwe kuzajya bwifashishwa mu kwishyura imisoro n’amahoro, zirimo uburyo bwo gukoresha Mobile Money, Airtel Money, Internet Banking ndetse n’uburyo bwa Mobicash.

Nko ku bakoresha uburyo bwa Mobile money bazajya basabwa gusa gukoresha inzira za mobile money aho bakanda *182#, banyure kuri 3 ahanditse kwishyura aho bazajya basanga serivisi zitangwa n’ibigo bitandukanye bagahitamo RRA.

Ubusanzwe abishyura imisoro n’amahoro bakoreshaga ikoranabuhanga mu kumenyekanisha ingano y’imisoro n’amahoro ariko igihe cyo kwishyura cyagera bigasaba gutonda umurongo kuri za banki ibintu byadindizaga itangwa rya serivisi.

Ni ibintu byari biteje impungenge kuko nko mu matariki ya nyuma yo kwishyura imisoro kubona serivisi kuri banki byabaga ari ingorabahizi kuko habaga hari umurongo muremure w’abantu bahuriye ku kintu kimwe cyo kwishyura imisoro.

Muri iri tangazo ubuyobozi bwa RRA bwashyize ahagaragara, bwakanguriye abatanga imisoro n’amahoro n’andi mafaranga anyura muri RRA atari imisoro gutangira gukoresha ikoranabuhanga ndetse ko guhera ku wa 1 Nzeri 2022 uzaba atarabikora atazongera guhabwa zimwe muri serivisi.

Rikomeza riti “RRA irasaba abasora bose bishyura imisoro y’imbere mu gihugu, iya za gasutamo n’iyeguriwe inzego z’ibanze ko bagomba kujya bakoresha ubwo buryo bw’ikoranabuhanga mu kwishyura kuko uhereye tariki ya 1 Nzeri 2022 abatazabyubahiriza batazoroherwa mu kubona serivisi.”

Zimwe muri izo serivisi bizajya bigorana kuzibona hatabayeho kwishyura hifashishijwe ikoranabuhanga zirimo, ihinduranya ry’ibinyabiziga, icyemezo cyo kutabamo umwenda w’imisoro, Quitus Fiscal, AEO, ibizwi nka blue channel n’ubundi buyo bworohereza bwo muri gasutamo, ibyemezo byo gukora n’izindi.

Mu rwego rwokoroshya uburyo bwo kwishyura hakoreshejwe ikoranabuhanga RRA yahuje serivisi zayo n’iz’amabanki n’ibigo by’itumanaho bikorera mu Rwanda.

Ikigo cy’Imisoro n’Amahoro, RRA, mu mwaka w’ingengo y’imari wa 2020/2021 cyinjije mu isanduku ya leta imisoro ingana na miliyari 1654,5 z’amafaranga y’u Rwanda yifashishijwe mu kubaka ibikorwaremezo bitandukanye no kwishyura imishahara y’abakozi ba Leta.

RRA yashyizeho uburyo bwo kwishyura imisoro n’amahoro hifashishijwe ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .