RRA yakusanyije imisoro ingana na miliyari 1461.3Frw mu 2019/20

Yanditswe na Cyprien Niyomwungeri
Kuya 2 Nyakanga 2020 saa 10:41
Yasuwe :
0 0

Ikigo cy’Igihugu gishinzwe imisoro n’amahoro (RRA), cyatangaje ko mu mwaka wa 2019/20 cyakusanyije miliyari 1461.3Frw, bikaba bingana na 93.2 ku ijana by’intego y’umwaka iki kigo cyari cyihaye yo gukusanya miliyari 1568.5Frw.

Komiseri Mukuru wa RRA, Bizimana Ruganintwali Pascal, yabwiye Televiziyo y’Igihugu ko kugera tariki 30 Kamena 2020, ubwo umwaka w’ingengo y’imari wa 2019/20 warangiraga, amafaranga atari imisoro yinjira mu kigega cya leta yakusanyijwe ari miliyari 19.3Frw.

Yakomeje avuga ko RRA yari ifite intego yo gukusanya miliyari 20Frw z’amafaranga adakomoka ku misoro, bivuze ko gukusanya aya mafaranga byageze kuri 96.8 ku ijana.

Ati “Mu by’ukuri umwaka wari ugoye, haba ku bagomba gusora ariko no ku basoresha kuko buriya iyo dukora akazi tutari kumwe n’abasora, biba bitoroshye”.

Ruganintwali yavuze ko iyo urebye umwaka ushize wa 2018/19 na 2019/20, biragaragara ko umusoro wakusanyijwe wiyongereyeho 4.5 ku ijana nubwo icyorezo cya COVID-19 gifite ingaruka nyinshi ku buzima n’ubukungu kitabusize inyuma.

Ati "Nubwo tutageze ku ntego twari twahawe bitewe n’ibihe bidasazwe twagize (COVID-19) ariko imisoro n’amahoro byakusanyijwe muri uyu mwaka byazamutse ku kigero cya 4.5% bigana na miliyari 62.3 Frw ugereranyije nayo twakusanyije mu mwaka wawubanjirije wa 2018/2019".

Ku bijyanye n’Imisoro yeguriwe inzego z’ibanze, RRA yari ifite intego yo gukusanya miliyari 67.2, hakaba harabonetse miliyari 60.5 bigana na 90%. Ugereranije n’imisoro yinjiye muri 2018/2019, iy’uyu mwaka yazamutse ku gipimo cya 1.5%.

Ruganintwali avuga ko nubwo habayeho icyorezo cya Coronavirus cyagize ingaruka ku bikorwa by’ubucuruzi, abasora bakomeje kubahiriza inshingano zabo bakaba bashimirwa cyane uburyo bakomeje gushyigikira iterambere no kwiyubakira igihugu.

Ati “Kubona abantu bari mu bibazo ariko bagasora bongera ku byo basoze umwaka ushize kandi nta kibazo cyari gihari, twebwe mu by’ukuri ni ikimenyetso gifatika ko ukwiyongera k’umusoro gushingiye ku myumvire no ku mihindukire y’abantu basora kandi babona ko gusora bagomba kubigiramo uruhare mu buryo bufatika bibwirije”.

Yakomeje agira ati “Ukwiyongera kwa 4.5 ku ijana ku musaruro twabonye umwaka ushize gufite impamvu muri uko kuzamura n’imyumvire y’abasora”.

RRA itangaza ko mu ngengo y’imari ya 2020/21 ingana na miliyari 3245.7 Frw, uruhare rw’umusoro ruri hafi 44.2 ku ijana. Ifite intego kandi yo kwinjiza miliyari 12 z’amafaranga adaturutse ku misoro.

Ruganintwali ati “Umusoro ubwawo dufite intego ya miliyari 1421.4Frw, ayo ni yo azava mu misoro turi gukusanya. Ni intego twavuga ko iri hasi iyo tuyirebera ku yo umwaka ushize, ariko ni ukubera uburyo ubukungu bwacu buzaba buhagaze kimwe n’ubwo ku Isi”.

RRA isobanura ko ikindi kizatuma intego igabanuka ari uko guverinoma yemeje ko abarimu bo mu mashuri yigenga bahembwa amafaranga atarenze ibihumbi 150Frw, basonerwa uwo musoro mu gufasha ibigo by’amashuri byigenga ndetse n’udupfukamunwa dukorerwa mu Rwanda hakaba haremejwe ko dukurirwaho umusoro ku nyongeragaciro (VAT).

Komiseri Mukuru wa RRA, Bizimana Ruganintwali Pascal, avuga ko intego y'umusoro uzakusanywa mu 2020/21 yagabanyijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .