00:00:00 IGIHE NETWORK KN KINYARWANDA EN ENGLISH FR FRANCAIS

RRA yakanguriye abarebwa n’imisoro yeguriwe inzego z’ibanze kuyitanga ku gihe

Yanditswe na IGIHE
Kuya 23 Mutarama 2023 saa 08:31
Yasuwe :

Ikigo cy’Imisoro n’Amahoro, RRA, cyibukije abarebwa n’imisoro yeguriwe inzego z’ibanze kwihutira gusora irimo uwo ku mutungo utimukanwa, uwo ku nyungu z’ubukode n’umusoro w’ipatanti.

RRA yatangaje ko itariki ntarengwa yo kuba iyo misoro yose yishyuwe ari iya 31 Mutarama 2023.

Imisoro yishyuzwa iri mu bwoko butandukanye irimo uwo ku mutungo utimukanwa, umusoro w’ipatanti n’uwo ku nyungu z’ubukode.

  Umusoro ku Mutungo Utimukanwa

Umusoro ku mutungo utimukanwa ugizwe n’ibice bibiri birimo uwo ku nyubako n’uwo ku butaka.

Umusoro ku mutungo utimukanwa w’umwaka wa 2022, wagombaga kurangirana na 31 Ukuboza 2022 ariko Leta yawongereyeho ukwezi kumwe ku gihe wagombaga kurangiriraho ukaba uzageza ku wa 31 Mutarama 2023 mu gufasha abarebwa na wo kuwishyura neza.

Komiseri wungirije ushinzwe Abasora, Uwitonze Jean Paulin, yavuze ko abasora bakwiye kudapfusha ubusa amahirwe bahawe ahubwo bakwiye kuwishyura kare batazacibwa amande y’ubukererwe.

Ati “Ntabwo icyo dushyira imbere ari uguhana, ariko dusaba abarebwa n’umusoro uwo ari wo wose kurangiza inshingano hakiri kare.”

Yakomeje avuga ko iminsi 30 yiyongereye ku gihe abarebwa n’Umusoro ku Mutungo utimukanwa ari iyo kubafasha kubikora neza banubahiriza impinduka ziri ku bipimo byawo.

Umusoro ku butaka wifashisha ibipimo byakoreshejwe mu kumenyekanisha umusoro wa 2021. Ibipimo biri hagati ya 0 n’amafaranga 80 kuri metero kare, bitewe n’aho ubutaka buherereye n’icyo bwagenewe gukoreshwa.

Avuga ku musoro ku nyubako n’ibipimo byawo, Karasira Ernest, Komiseri wungirije ushinzwe Intara n’Imisoro yeguriwe inzego z’ibanze avuga ko ibipimo by’uyu mwaka ari 1% by’agaciro ku isoko k’inyubako yagenewe guturwamo; 0,5% ku nyubako z’ubucuruzi na 0,1% ku nyubako zagenewe inganda, iz’ibigo by’ubucuruzi bito n’ibiciriritse n’izagenewe ibindi bikorwa.

  Umusoro ku Nyungu z’Ubukode

Igipimo cy’umusoro ku Nyungu z’Ubukode kiba ari 0% ku nyungu z’ubukode ku mwaka ziri hagati y’ifaranga 1 n’amafaranga ibihumbi 180; kikaba 20% ku nyungu z’ubukode ku mwaka ziri hagati y’amafaranga 180.001 na Frw 1.000.000; mu gihe inyungu z’ubukode ku mwaka ziri hejuru y’amafaranga miliyoni imwe zibarirwa umusoro ku gipimo cya 30%.

Gusa inyungu z’ubukode zisoreshwa zigaragazwa hamaze kuvanwa ku nyungu mbumbe 50% bifatwa nk’amafaranga akoreshwa mu gufata neza uwo mutungo, hongeweho inyungu nyakuri ku nguzanyo ya banki yishyuwe guhera igihe ubukode bwatangiriye mu gihe cy’umusoro. Ibi ariko bikorwa igihe umutungo ukodeshwa wabonetse ku nguzanyo ya banki.

  Umusoro w’Ipatanti

Umusoro w’Ipatanti utangwa n’umuntu wese utangije igikorwa cy’ubucuruzi mu karere aherereyemo.

Igihe cy’umusoro w’Ipatanti gitangira ku wa 1 Mutarama kikarangira ku wa 31 Ukuboza. Iyo ibikorwa by’ubucuruzi bisoreshwa bitangiye nyuma y’ukwezi kwa mbere k’umwaka, usora atanga Umusoro w’Ipatanti ungana n’amezi y’umwaka asigaye kugira ngo umwaka urangire, habariwemo n’ukwezi ibikorwa byatangiyemo.

Ibipimo by’umusoro w’ipatanti birebwa ukubiri birimo ibigendera ku bikorwa bibyara inyungu byanditse ku musoro ku nyongeragaciro, TVA. Ipatanti itangwa hashingiwe ku gicuruzo ku mwaka. Kuri ibi bikorwa by’abanditse muri TVA, ipatanti iba iri hagati y’ibihumbi 60 Frw n’ibihumbi 250 Frw.

Ibindi bikorwa bisigaye bibarirwa ipatanti hashingiwe ku ho bikorera. Hashobora kuba mu cyaro, mu mijyi cyangwa mu Mujyi wa Kigali. Ipatanti kuri ibi bikorwa iba iri hagati y’ibihumbi 4 Frw n’ibihumbi 40 Frw ku mwaka.

Mu kumenyekanisha no kwishyura imisoro y’inzego z’ibanze hifashishwa ikoranabuhanga unyuze ku rubuga rwa RRA: www.rra.gov.rw, ukajya ahanditse “Menyekanisha imisoro yeguriwe uturere”, ubundi ugakanda ahanditse imisoro. Hahita hafunguka akadirishya usabwa kuzuzamo TIN n’ijambo banga ukagenda ukurikiza amabwiriza.

Kwishyura iyi misoro yose bikorwa mu buryo bw’ikoranabuhanga aho uwamaze gukora imenyekanisha akabona nimero yo kwishyuriraho yifashisha Mobile Money, MobiCash, Internet Banking cyangwa Mobile Banking akarangiza izo nshingano.

Imisoro ishyirwaho n’itegeko kandi ni ryo riyikuraho ari na yo mpamvu uritatiriye abihanirwa.

Umusoro utishyuriwe igihe ubarwaho inyungu ya 1.5%. Inyungu z’ubukerererwe zibarirwa ku kwezi, nta gukomatanya, bahereye ku munsi ukurikira uwo umusoro wagombaga kwishyurirwaho kugeza ku munsi w’ubwishyu na wo ubariwemo.

Uretse inyungu igomba kwishyurwa, hagomba no gutangwa inyongera ingana na 10% by’umusoro ugomba gutangwa. Icyakora, iyo nyongera ntishobora kurenga amafaranga ibihumbi 100 Frw.

Igihano cya 40% by’umusoro ugomba gutangwa gihanishwa usora wese utaratangiye imenyekanisha ry’umusoro ku gihe n’uwatanze amakuru atari yo.

RRA yakanguriye abarebwa n’imisoro yeguriwe inzego z’ibanze kuyitanga bitarenze ukwezi kwa Mutarama 2023

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .