RRA yahembye abasora neza mu Burengerazuba, abakinyereza imisoro baragawa

Yanditswe na Nshimiyimana Pascal
Kuya 13 Ugushyingo 2019 saa 04:26
Yasuwe :
0 0

Ikigo cy’Igihugu cy’Imisoro n’Amahoro (RRA) cyashimiye abatanze neza imisoro mu Ntara y’Uburengerazuba mu mwaka wa 2018, barimo imiryango, ibigo, amahoteri n’abantu ku giti cyabo.

Umunsi Mukuru wo gushimira Abasora b’indashyikirwa mu Burengerazuba wizihirijwe mu Karere ka Rusizi ku wa 12 Ugushyingo 2019.

Ku nshuro yawo ya 17 wahawe insanganyamatsiko igira iti “Dusore neza, twubake u Rwanda twifuza”.

Bamwe mu basora bo mu Ntara y’Uburengerazuba bavuga ko hari igihombo giterwa na bamwe mu bakinyereza imisoro binyuze mu bucuruzi bwa magendu no guhunga gutanga inyemezabwishyu zemewe.

Imwe mu mpamvu ishingirwaho harimo kuba iyi ntara ikora ku mipaka ihuza u Rwanda na Repubulika Iharanira Demokarasi ya Congo, bituma hakigaragara abambutsa ibicuruzwa birimo imyenda ya caguwa, inzoga, ibitenge n’ibindi mu buryo bwa magendu.

RRA ntacyo itangaza ku mubare mbumbe w’amafaranga leta ihombera muri ubwo bucuruzi bwa magendu ariko ishimangira ko bitura hasi umubare w’umusoro wakagombye kwinjizwa, bikanadindiza iterambere rusange ry’abaturage n’igihugu muri rusange.

Abacuruzi baganiriye na IGIHE bavuga ko ibyo bikorwa bya magendu bibangamira ubucuruzi bwabo.

Mudaheranwa Amani Casimir yavuze ko uwacuruje magendu kuyivaho biba bigoranye kuko iba imeze nk’uburozi yariye.

Yakomeje ati “Mu by’ukuri umuntu yakora kandi akunguka adakoze magendu. Twebwe rero biratubangamira kuko niba yanyujije ibicuruzwa mu mazi adatanze umusoro, araza akamanura ibiciro twe bikadutera igihombo kuko tuba twatanze imisoro.”

Komiseri Mukuru wa RRA, Bizimana Ruganintwari Pascal, mu butumwa bwe yasabye abacuruzi bagitsimbaraye ku kunyereza imisoro kubireka kuko bibahombya, bikanadindiza iterambere rusange ry’igihugu.

Yavuze ko ibi ari ibisigisigi bigomba kugororoka mu mitangire y’imisoro. Yagize ati “Nubwo mubona imisoro igihugu cyinjiza igenda yiyongera bigaragara, haracyari ibisigisigi bigitsimbaraye ku muco mubi wo kunyereza imisoro.’’

“Aha turavuga ba bandi badatanga inyemezabwishyu zemewe za EBM aho aba anyereza imisoro ku buryo bitura leta mu gihombo ndetse bikanagira ingaruka ku iterambere ry’igihugu.’’

Yavuze ko ku bambutsa ibicuruzwa mu buryo bwa magendu hari ingamba zafashwe mu guhangana na bo.

Ati “Ingamba twafashe zirimo guteza icyamunara ibicuruzwa bya magendu kimwe n’ibinyabiziga tuzajya dusanga zibitwaye cyangwa bigasubizwa aho byaturutse.”

Mu Ntara y’Uburengerazuba hahembwe abasora 15 basoze neza muri uyu mwaka barimo babiri [Diyosezi Gatolika ya Nyundo na Sinayobye Sylvestre] bazashimirwa ku rwego rw’igihugu.

Mu bashimiwe harimo Umurava Sacco (Nyabihu), Ecole Secondaire APARPE (Nyabihu), Motel La Corniche, Kinunu Wonders (Rutsiro), Cormorant Ltd, Kivu warehousing, Diyosezi Gatolika ya Cyangugu, Inkunga Finance PLC na Mukantabana Espérance.

Guverineri w’Intara y’Uburengerazuba, Munyantwari Alphonse, yavuze ko inzego z’ibanze zitazareberera buri wese ushaka guhombya leta yishora muri magendu.

Ati “Hagiye gukazwa ingamba zo kurwanya ubu bucuruzi ariko hanakorwa ubukangurambaga mu kugaragariza abaturage akamaro k’imisoro mu mibereho y’igihugu.’’

Mu mwaka wa 2018/2019 intego ku misoro Intara y’Uburengerazuba yagombaga kwinjiza yayigezeho ku kigero cya 102.2% arenzeho miliyari 30.8% mu yari ateganyijwe. Yabonye inyongera ya 13.6% ugerereranyije n’umwaka wari wabanje wa 2017/2018.

RRA yatangaje ko mu mwaka wa 2018/19 cyinjije miliyari Frw 1,422.9 ku ntego ya miliyari 1,392.1 Frw cyari gifite bituma kirenzaho miliyari 30.8 Frw angana na 102%.

Kugeza ubu imisoro ifite uruhare rwa 54.1% mu ngengo y’imari y’igihugu, mu gihe nko mu 1998 yari 36.3%. Muri uwo mwaka u Rwanda rwinjije miliyari 62.8 Frw mu misoro.

Umunsi Mukuru wo gushimira Abasora b’indashyikirwa mu Burengerazuba wizihirijwe mu Karere ka Rusizi
Komiseri Mukuru wa RRA, Bizimana Ruganintwari Pascal, yakebuye abacuruzi bagitsimbaraye ku kunyereza imisoro kuko bidindiza iterambere rusange ry’igihugu
Iki gikorwa cyitabiriwe n'abantu batandukanye
Guverineri w’Intara y’Uburengerazuba, Munyantwari Alphonse, yavuze ko inzego z’ibanze zitazareberera abishora muri magendu
Meya w'Akarere ka Rusizi, Kayumba Ephrem (ibumoso), ahembwa umwe mu basora witwaye neza
Nyuma y'iki gikorwa hafashwe ifoto y'urwibutso irimo abayobozi bitabiriye iki gikorwa n'abahembwe bose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza