00:00:00 IGIHE NETWORK KN KINYARWANDA EN ENGLISH FR FRANCAIS

Rotary Club Kigali yiyemeje gukorera ubuvugizi abarwaye Autisme mu Rwanda

Yanditswe na Ntabareshya Jean de Dieu
Kuya 24 Ukuboza 2022 saa 07:58
Yasuwe :

Rotary Club Kigali Mont Jali yatangaje ko igiye gukorera ubuvugizi abana bavukanye ikibazo cy’uburwayi bwa Autisme mu Rwanda mu rwego rwo kugira ngo barusheho kwitabwaho hakiri kare.

Ubundi Autisme ni indwara ifata umwana, ahanini igaragara atangiye kugira amezi umunani.

Umwana ufite ibimenyetso byayo cyangwa uyifite, agaragaza imyitwarire itandukanye n’iy’abandi, agakora ibinyuranye kuko aba atumva impamvu yabyo ndetse ishobora kuba yagira uruhare mu ididindira ry’ubwenge bigasaba kwitabwaho byihariye.

Mu Rwanda ntiharamenyekana imibare ihamye igaragaza abana bafite autisme, kuko abenshi ntibayisobanukiwe kandi ahanini usanga abamenya ko umwana ayifite ari bake cyangwa bakabimenya hashize igihe kinini.

Kuri uyu wa Gatanu tariki ya 23 Ukuboza 2022 Rotary Club Kigali Mont Jali yateguye gahunda yo gusangira n’abana bafite autisme bigishirizwa mu kigo cya Autisme Rwanda giherereye ku Gisozi mu Mujyi wa Kigali.

Umuyobozi Mukuru wa Rotary Club Kigali Mont Jali, Dr Habyarimana Jean Baptiste, yavuze ko uyu muryango ugiye gukora ubuvugizi ku bana bafite uburwayi bwa Autisme mu Rwanda kugira ngo bakurikiranwe kuko abenshi usanga batarayimenya.

Ati “Bimaze kugaragara ko aba bana bavukana iyo myitwarire idasobanutse dushobora gukora ubuvugizi mu Rwanda hakabaho ibigo byinshi nk’ibi, kugira ngo bijye gushaka abana mu ngo zabo ngo bibafashe hakiri kare. Mwabonye ko iyo bafashije umwana akiri muto imyitwarire ye bagerageza kuyishyira ku murongo ariko iyo amaze gukura biragorana.”

Yavuze ko ubusanzwe Rotary Club ikora ubuvugizi ku bikorwa bitandukanye cyane ko uyu muryango wagize uruhare rukomeye mu kurwanya indwara y’imbasa ku isi bityo ko na Autisme bayihagurukiye byatanga umusaruro.

Ati “Buriya Rotary yafashe ingamba zo kurandura imbasa mu isi bashaka inkingo banakora ku buryo aho imbasa iri ku isi ivamo, iyo ni gahunda yakoze kandi yayigezeho ifatanyije n’abafatanyabikorwa batandukanye dutekereza ko rero uburwayi nk’ubu bwa Autisme kubera ikibazo butera dushobora gufatanya gushaka ubushobozi ku buryo mu bihugu byose haboneka ibigo bifasha aba bana.”

Umuyobozi w’Ikigo Autisme Rwanda, Rosine Duquesne Kamagaju, yagaragaje ko kugeza ubu bafite abana bagera kuri 45 bafashirizwamo yemeza ko biri gutanga umusaruro.

Ati “Autisme ntabwo ikira ariko umuntu aragorora, dufite uburyo dukoresha kugira ngo aba bana ibyo bibazo bafite bakure bigenda bishira.”

Yagaragaje ko buri mwana yitabwaho mu buryo bwihariye kuko aba afite mwarimu we ku giti cye.

Kamagaju yasobanuye ko we na bagenzi be bashinze ikigo Autisme Rwanda nyuma yo kubona ko iyi ndwara ari ikibazo gikomeye bigendanye n’imyumvire ya bamwe mu banyarwanda rimwe na rimwe bayitiranya n’amarozi.

Umubyeyi urerera mu Kigo cya Autisme Rwanda, Jöhan Claude yagaragaje ko kuba umwana yakurikiranwa akiri muto bimufasha kugira icyerekezo cy’ejo hazaza kuruta uko yatereranwa.

Yagaragaje ko umwana we yageze muri iki kigo agafashwa kandi hari byinshi biri kugenda bihinduka.

Yasabye ababyeyi bafite abana barwaye Autisme gushaka uburyo bakurikiranwa aho kubatererana.

Ati “Hari igihe usanga mu muryango barimo gusubiranamo, umwe avuga ngo abo bazimu nabo mu muryango wa runaka. Hari igihe biteza umwiryane mu miryango ugasanga bagize ikibazo aho gushaka uburyo bwo gufasha aba bana. Iyo watewe ntimurebe uko mushyira imbaraga hamwe ngo murebe ikibazo kibugarije ahubwo mugasubiranamo, iba ari intangiriro nziza yo kugana habi.”

Nubwo ibi bigo bishimirwa uko bifasha aba bana, haracyari ibibazo birimo icy’amikoro kuko serivisi bahabwa zihenze cyane kandi no mu rugo haba hakenewe izindi nyunganizi zibafasha mu kubarera; yavuze ko banahabwa akato ndetse rimwe na rimwe ntibabone ubuvuzi buhagije.

Ababyeyi bishimira uko abana babo bagenda batera indi ntambwe
Bagaragariijwe uburyo abana bafite Autisme bashobora gufashwa
Iki gikorwa cyitabiriwe n'abantu batandukanye
Umuyobozi Mukuru wa Rotary Club Kigali Mont Jali, Dr Habyarimana Jean Baptiste yagaragaje ko bagiye gukorera ubuvugizi abafite ikibazo cya Autisme
Ikigo cya Autisme Rwanda gikorera ku Gisozi hafi na Fawe Girls School
Uwanyurwaga n'aho umwana ageze yafataga amashusho
Umuyobozi w’Ikigo Autisme Rwanda, Rosine Duquesne Kamagaju yagaraje ko gufasha aba bana bisaba gukora byihariye
Habayeho n'umwanya wo gusangira umutsima

Amafoto: Habyarimana Raoul


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .