Rotary Club Kigali Doyen yishyuriye mituweli abaturage 2000 b’i Nyamirambo

Yanditswe na Tuyishimire Raymond
Kuya 1 Ukuboza 2020 saa 09:31
Yasuwe :
0 0

Abanyamuryango ba Rotary Club Kigali Doyen bishyuriye ubwisungane mu kwivuza abaturage 2000 batuye mu Murenge wa Nyamirambo mu Karere ka Nyarugenge.

Rotary Club Kigali Doyen kimwe n’izindi clubs eshanu zikorera mu Rwanda ibarizwamo abagiraneza bitangira guhuza ubufasha mu guhangana n’ibibazo Isi ifite nko gukemura amakimbirane, kurwanya ubujiji n’ubukene, kunoza imitangire y’amazi meza, kurwanya ibyorezo no guhashya indwara y’imbasa binyuze mu gutanga urukingo no gufasha abababaye.

Uyu muryango wakusanyije miliyoni esheshatu z’amafaranga y’u Rwanda ari nayo yifashishijwe mu kwishyurira mituweli abaturage batishoboye b’i Nyamirambo mu Mujyi wa Kigali.

Umuyobozi ushinzwe Umutungo muri Rotary Club Kigali Doyen, Kaburame Julien, yabwiye IGIHE ko bahisemo gufasha ab’i Nyamirambo kuko benshi mu bahatuye batari bafite ubwisungane mu kwivuza.

Yagize ati “Twatanze ubwisungane tugendeye ku bakennye kurusha abandi kuko hari abatari babona ubwo bushobozi bwo kwiyishyurira ubwisungane mu kwivuza.”

Muri gahunda zayo zihoraho zo gufasha abatishoboye kwiteza imbere, Rotary Club Kigali Doyen irateganya gukomeza gufasha n’abaturage bo mu bindi bice by’igihugu.

Umuyobozi Nshingwabikorwa w’Akarere ka Nyarugenge, Ngabonziza Emmy, yavuze ko bafashije abaturage bo mu Murenge wa Nyamirambo bitewe no kuba harimo abagizweho ingaruka na COVID-19, batakaza imirimo bituma badashobora kwiyishyurira mituweli.

Yagize ati “Muri iki gihe cya Coronavirus ni uko harimo abataye imirimo cyane, byatumye kwishyura ubwisungane bigorana ku buryo benshi ubu aribwo bagenda bazanzamuka.’’

Ngabonziza yasabye abahawe ubufasha gukomeza kugira uruhare mu rugendo rwo kwigira.

Yagize ati “Turabasaba gukomeza kwigira no kwishakamo ibisubizo nubwo muri iki gihe bavugaga bati byari byatugoye nyuma yo kubura akazi no kubura ibyo dukora.’’

Igihembwe cya mbere cy’umwaka w’ingengo y’imari wa 2020/2021 hagati ya Nyakanga na Nzeri 2020, cyasojwe abaturage bamaze gutanga ubwisungane mu kwivuza ku kigero cya 80,1%; ubu bageze kuri 82.1%. Amafaranga angana na miliyari 23.7 Frw niyo yishyuwe n’abanyamuryango ba mituweli.

Muri uyu mwaka, Rotary Club Kigali Doyen yatanze inkunga ibikorwa bitandukanye birimo kugenera abo mu Rutsiro udupfukamunwa 4000; yahaye Ibitaro bya Kaminuza bya Kigali (CHUK) n’Ibyitiriwe Umwami Faisal inkunga ya miliyoni 13 Frw; yahaye RBC ingana ya litiro zisaga 900 z’imiti isukura intoki n’ibikoresho by’isuku birimo ‘kandagira ukarabe’ 160, bya miliyoni 12 Frw. Yanatanze inkunga ya miliyoni 3 Frw yo gushyigikira Umuryango w’Ubugiraneza ‘Solid Africa’ wita ku barwayi batagira kivurira bagafashwa kubona amafunguro.

Rotary Club Kigali Doyen ni imwe muri club esheshatu zikorera mu Rwanda, zirimo iya Musanze, Kigali Mont Jali, Kigali Virunga, Gasabo na Butare zibarizwamo abanyamuryango 122.

Sebera Eddy wahoze ari Perezida wa Rotary Club Kigali Doyen ubu ni Visi Perezida akaba anashinzwe Ibikorwa muri uyu muryango
Umuyobozi Nshingwabikorwa w’Akarere ka Nyarugenge, Ngabonziza Emmy, yavuze ko bafashije abaturage bo mu Murenge wa Nyamirambo bitewe no kuba harimo abagizweho ingaruka na COVID-19
Umwe mu banyamuryango ba Rotary Club Kigali Doyen, Ida Alexandra, mu bitabiriye iki gikorwa
Rotary Club Kigali Doyen yakusanyije miliyoni 6 Frw yifashishijwe mu kwishyurira mituweli abaturage batishoboye b’i Nyamirambo
Rotary Club Kigali Doyen yishyuriye mituweli abaturage 2000 b’i Nyamirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .