00:00:00 IGIHE NETWORK KN KINYARWANDA EN ENGLISH FR FRANCAIS

Rotary Club igiye kugaba amashami mu turere twose mu Rwanda

Yanditswe na Mukahirwa Diane
Kuya 13 July 2022 saa 03:14
Yasuwe :

Kayitare Florent yatangiye inshingano zo kuyobora Rotary Club Kigali-Doyen, yiyemeza gukomeza ibikorwa by’ubugiraneza uyu muryango usanzwe ukora no gushyira imbaraga mu kongera abanyamuryango no kurushaho kugera mu turere hirya no hino mu gihugu.

Kayitare ni we watorewe kuyobora Rotary Club Kigali-Doyen mu gihe cy’umwaka, asimbuye Karema Carole wasoje manda ye. Uyu mugabo w’imyaka 52 yabaye perezida wa 56 wa Rotary Club Kigali-Doyen.

Ubwo yahererekanyaga ububasha na Karema yasimbuye, yavuze ko ibyo agiye gushyira imbere harimo kongera abanyamuryango no guhuza abasanzwe.

Yagize ati “Uyu mwaka dufite intego yo kongera abayoboke bakaba benshi, hari igihe abanyamuryango bagenda. Kubera ibibazo bitandukanye hari ushobora kugenda, rero tugomba kubasimbuza twongera benshi kandi n’abahari tugakomeza gukora ibikorwa bituma abantu baba hamwe kugira ngo tugere ku ntego twiyemeje yo kwita ku mibereho myiza y’abaturage.’’

“Ikindi nshyize imbere ni ugushinga izindi club, ubu turi icumi. Uyu mwaka turifuza ko twashyiraho izindi mu ntara ku buryo muri buri karere twagira club ya Rotary.”

Yakomeje avuga ko ibi bizajyana n’ibikorwa bisanzwe bya Rotary Club mu gukora ibikorwa by’ubugiraneza, bifasha ababaye.

Ati “Intego za Rotary ni ukwita ku buzima bw’abaturage haba mu buvuzi, uburezi, ibidukikije no guteza imbere ubukungu. Mu Rwanda ni byo dusanzwe dukora, abanyamuryango ba Rotary muri manda yanjye tuzarushaho gushyiramo imbaraga, ibi bikorwa bikomeze kugera ku baturage.”

Ku ruhande rw’abanyamuryango, bavuze ko banejejwe no kuba babonye umuyobozi mushya kandi bizeye ko azakomeza gushyira mu bikorwa ibyo basanzwe bakora.

Ndoba Mugunga yasabye umuyobozi mushya gushyira imbaraga mu rubyiruko cyane hibandwa ku kongerera abakobwa ubushobozi.

Ati “Uko mbibona, aho akwiye kwibanda cyane ni mu rubyiruko by’umwihariko rw’abakobwa kugira ngo batinyuke, club yacu yari imaze imyaka ibiri iyoborwa n’abagore na nyuma hazaza abandi.”

“Club yacu turi kongeramo amaraso mashya kandi mato, nk’ubu njyewe mazemo imyaka 25, ubu turimo turashyiraho abato kuri twe. Ni abato mu myaka ariko ni abafite inshingano zikomeye cyane bayobora n’abafite ibigo bikomeye. Igikwiye ni ugukomeza gushyiramo izo ngufu mu guha abagore n’abakobwa imbaraga.”

Rotary Club Kigali-Doyen yashinzwe mu 1966, kugeza ubu ifite abanyamuryango 42. Ni imwe muri Rotary clubs 10 zo mu Rwanda zirimo abanyamuryango barenga 200. Rotary y’u Rwanda ikorera munsi ya Rotary International igizwe na clubs zirenga 35.000 n’abanyamuryango barenga miliyoni 1,2 bakora ibikorwa by’ubugiraneza ku Isi.

Uyu muryango wita ku bikorwa by’imibereho myiza y’abaturage, uburezi, kubungabunga ibidukikije, kurwanya ubujiji n’ubukene, kwegereza ubuvuzi abaturage, kunoza imitangire y’amazi meza, guhangana n’ibyorezo, guhashya indwara y’imbasa no gufasha abababaye.

Kayitare Florent yambitswe umudali, anahabwa ibindi byangombwa byerekana ko yagizwe umuyobozi wa Rotary Club
Kayitare (iburyo) yahawe inshingano zo kuyobora Rotary Club Kigali-Doyen mu gihe cy'umwaka
Kayitare Florent yavuze ko agiye gushyira imbaraga mu kongera abanyamuryango ba Rotary Club mu Rwanda
Karema Carole yashimiwe ibikorwa yakoze mu gihe cy'umwaka yayoboye Rotary Club Kigali- Doyen
Kayitare yafashe ifoto ari kumwe n'umuryango we na bamwe mu banyamuryango ba Rotary Club Kigali-Doyen nyuma yo guhabwa inshingano nshya nk'umuyobozi
Byari ibishimo bikomeye ku banyamuryango ba Rotary Club Kigali-Doyen
Abanyamuryango ba Rotary Club Kigali-Doyen bitabiriye umuhango wimikiwemo umuyobozi wabo mushya ku bwinshi

Amafoto: Rwema Derrick


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .