Rolande Pryce yagizwe umuyobozi wa Banki y’Isi mu Rwanda

Yanditswe na IGIHE
Kuya 2 Nzeri 2020 saa 03:16
Yasuwe :
0 0

Umunya-Jamaica, Rolande Pryce, yagizwe Umuyobozi wa Banki y’Isi mu Rwanda, aho yatangiye imirimo ye muri Kanama 2020 asimbuye Yasser El Gammal wari kuri uyu mwanya kuva muri Gashyantare 2016.

Pryce yari asanzwe akora muri Banki y’Isi kuva mu 2006 aho yabaye umujyanama wa Visi Perezida ushinzwe amategeko. Yahagarariye Banki y’Isi muri Amerika y’Amajyepfo na Carraibes, muri Afurika yo munsi y’ubutayu bwa Sahara no mu birwa bya Pacifique.

Yatanze inama mu by’amategeko mu bijyanye n’imari, ibikorwa remezo no mu nzego z’abikorera. Yakoreye mu bihugu bitandukanye birimo Sri Lanka, Maldives, u Burundi, Uganda na Tanzania.

Mbere yo kugirwa umuyobozi wa Banki y’Isi mu Rwanda, yakurikiranaga gahunda z’iyi banki muri Indonesia na Timor-Leste muri Aziya aho yari afite ibiro i Jakarta.

Pryce abaye umuyobozi wa Banki y’Isi mu Rwanda mu gihe iyi banki yamaze kwemeza gahunda y’ibikorwa byayo mu myaka itandatu iri imbere bigamije gufasha ibikorwa by’ibanze by’u Rwanda bikubiye muri gahunda ya guverinoma (NST).

Kuri ubu gahunda ya Banki y’Isi mu Rwanda irimo imishinga mikuru 16 yasezeranyije gutangamo miliyoni zirenga 1630$. U Rwanda kandi ruzagerwaho n’imishinga yo ku rwego rw’uturere ine ruzahabwamo miliyoni 240,30$.

Iyi mishinga igamije kugeza ku baturage batuye mu byaro ibikorwa remezo by’ibanze n’amashanyarazi, gushyigikira gahunda zo kuzamura imibereho myiza, imiyoborere y’imijyi ndetse no guhangana n’ingaruka za Coronavirus.

Mbere yo kujya gukora muri Banki y’Isi, Pryce yabaye umujyanama mu by’amategeko wa Guverinoma ya Jamaica by’umwihariko mu bijyanye n’amategeko n’ubucuruzi mpuzamahanga mu gihe cy’imyaka irenga 10. Yabaye kandi n’umwarimu wungirije muri Kaminuza ya West Indies.

Umunya-Jamaica, Rolande Pryce, yagizwe Umuyobozi wa Banki y’Isi mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .