RIB yibukije abanyamakuru gukora kinyamwuga ku bijyanye n’ihohoterwa rikorerwa abangavu

Yanditswe na Tuyishimire Raymond
Kuya 1 Ukwakira 2020 saa 10:08
Yasuwe :
0 0

Urwego rw’igihugu rw’ubugenzacyaha,RIB rwasabye abanyamakuru kujya bakora kinyamwuga mu gihe bari gutara no gutangaza inkuru zirebana n’ihohoterwa rikorerwa abana b’abakobwa .

Ibi bibaye mu gihe mu Rwanda hagiye humvikana abarenga ku mahame agenga umwuga w’itangazamakuru igihe batara cyangwa batangaza inkuru zitandukanye zirimo n’izi zerekeranye n’ihohoterwa rikorerwa abangavu.

Mu kiganiro inama y’igihugu y’itangazamakuru,MHC yagiranye n’inzego zirebwa no gukumira ikibazo cy’abana b’abangavu baterwa inda cyabaye ku wa 30 Nzeri hifashishijwe uburyo bw’ikoranabuhanga kubera icyorezo cya coronavirus , Umuyobozi w’ishami rishinzwe kurwanya ihohoterwa muri RIB, Murebwayire Shafiga , yasabye abanyamakuru kujya bibuka amahame agenga umwuga wabo igihe batara izi nkuru.

Bimwe mu bikorwa by’ubunyamwuga buke ngo bikunze kugaragara harimo gutangaza imyirondoro y’uwahohotewe, kwerekana amashusho ye no kuvuga amazina y’ukekwa igihe ataragera mu maboko y’inzego z’umutekano.

Agaruka ku kibazo cy’abanyamakuru badakora kinyamwuga, Murebwayire yagize ati "Usibye no kuba atari ubunyamwuga ahubwo baba basibanganya ibimenyetso , bikaba byaba intandaro yo gutinda cyangwa gutuma ucyekwa adafatwa."

Yongeraho ko icyo gihe umunyamakuru aba ateye ibibazo umwana aho kubikemura kuko asibanganya ibimenyetso. Murebwayire asanga hakwiye ubufatanye hagati y’uru rwego ndetse n’itangazamakuru .

Ati "Ubufatanye ni bwiza ariko iyo bwakozwe nabi , ntabwo bigenda neza ndasaba kujya mutanga amakuru mu buryo bufitiye umuryango nyarwanda akamaro."

Umuyobozi w’ inama y’ubutegetsi mu nama nkuru y’itangazamakuru, Eric Ndushabandi, yashimye abateguye ikiganiro, avuga ko bagiye kunoza imikorere y’abanyamakuru bafite ubunyamwuga buke mu gutangaza inkuru zijyanye n’ihohoterwa ry’abana b’abakobwa .

Umuyobozi mukuru ushinzwe iterambere ry’umuryango no kurengera abana muri Minisiteri y’Uburinganire n’Iterambere ry’Umuryango, Batamuliza Mireille, yavuze ko bagiye gukora ubushakashatsi bwimbitse kugira ngo bamenye impamvu ihohoterwa rikorerwa abangavu ridacika .

Ati "Ndashima uruhare rw’itangazamkuru mu gukumira iri hohoterwa,tugiye gukora ubushakashatsi bwimbitse tumenye impamvu iri hohoterwa ridacika."

Iki kiganiro kibanze ku mpamvu zitera ihohoterwa,ku ngamba zihari n’uruhare rw’itangazamakuru mu kurwanya gutwita kw’abangavu .

Mu mwaka wa 2016, abangavu basambanyijwe bagaterwa inda z’imburagihe mu gihugu hose bari 17,849, muri 2017 abangavu batewe inda z’imburagihe bari 17,337, muri 2018, umubare w’abangavu basambanyijwe bagaterwa inda wariyongereye ugera ku 19,832, mu gihe imibare y’abasambanyijwe bagaterwa inda hagati y’ukwezi kwa Mutarama na Kanama 2019 bari 15,656.

Imibare y’abangavu basambanyijwe bagaterwa inda z’imburagihe muri uyu mwaka wa 2020 ntiratangazwa, gusa ishobora kuzamuka ahanini bitewe n’umubare w’abana b’abakobwa batari ku mashuri kubera COVID-19, ibyo bigaha urwaho abasambanya mu gihe ababyeyi batabaye maso .

Bimwe mu binyamakuru byakunze gutungwa agatoki n’ibikorera kuri Youtube, aho bikunze gushijwa gukoresha abana b’abangavu batewe inda zimburagihe mu nyungu zabyo bwite.

Itegeko Nº68/2018 ryo kuwa 30/08/2018 riteganya ibyaha n’ibihano muri rusange, mu ngingo yaryo ya 123, umuntu uhamwe n’icyaha cyo gufata umwana ku ngufu ahanishwa igifungo kitari munsi y’imyaka 20 ariko nanone itarenga 25.Iyo ari mu nsi y’imyaka 14 akatirwa gufungwa burundu.

RIB yasabye abanyamakuru gukora kinyamwuga igihe batangaza inkuru kwihohotera rikorerwa abangavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .