RIB yerekanye abarimo uwahoze ari umupolisi bakekwaho ubwambuzi biyitiriye inzego za Leta

Yanditswe na Ishimwe Deborah
Kuya 10 Nzeri 2020 saa 01:16
Yasuwe :
0 0

Urwego rw’Igihugu rushinzwe Ubugenzacyaha (RIB), rwataye muri yombi abagabo batatu barimo n’uwahoze ari umupolisi akaza kwirukanwa, bakekwaho gukora ibyaha by’ubwambuzi bushukana biyitiriye inzego za Leta.

Umuvugizi wa RIB w’umusigire, Dr Murangira Thierry, yavuze ko babiri mu bafashwe babeshya umuturage kuzamufunguriza umugabo we ufunzwe, naho undi umwe yafashwe yizeza umuturage kumufasha kuzajya mu butumwa bw’amahoro mu mahanga.

Yagize ati “Babiri bafashwe basaba amafaranga ibihumbi 400 umugore ufite umugabo ufunzwe azira kwiba Sima zakoreshwaga hubakwa amashuri bamwizeza kumufunguza. Naho undi afite umwihariko kuko yahoze muri polisi y’u Rwanda aza kwirukanwa kubera amakosa aza no gufungwa azira icyaha nk’iki yakoze cy’ubwambuzi bushukana, we akaba yarafashwe yakira amafaranga ibihumbi 70 by’umuturage amwizeza kuzamufasha kujya mu butumwa bwo kugarura amahoro mu mahanga.”

Yakomeje avuga ko aba bantu bose bakurikiranyweho ibyaha bibiri, icyo kwihesha ikintu cy’undi no kwiyitirira urwego rw’umwuga badakora.

Umwe mu bakekwaho ibi byaha yavuze ko yaguye mu mutego atabizi.

Yagize ati “ Umuntu yampamagaye ambwira ko ari umukozi wa RIB ansaba amakuru ku muturanyi wanjye ngo amufunguze, nanjye niruka njya kumureba nzi ko ndi kumufasha baravugana. None dore bamfunze ngo ndazira gufatanya n’abatekamutwe bakambura umugore we.”

RIB yasabye abaturarwanda kujya bagira amakenga igihe hagize ubasaba amafaranga abizeza kubakorera ikintu runaka, ababwira ko ubutabera butagira inzira y’ubusamo.

Abafashwe barimo uwahoze ari umupolisi wirukanywe azira ubwambuzi
Umuvugizi wa RIB, Dr Murangira Thierry yagiriye inama abanyarwanda yo kutanyura inzira y'ubusamo bashaka ubutabera, aburira n'abashakira amaronko mu bwambuzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .