RIB yatangiye kwegera ababyeyi ibasaba gutinyuka bakavuga abasambanya abana babo

Yanditswe na Hakizimana Jean Paul
Kuya 23 Ugushyingo 2020 saa 09:12
Yasuwe :
0 0

Urwego rw’Igihugu rw’Ubugenzacyaha, RIB, rwatangiye kwegera abaturage mu rwego rwo kubashishikariza kugira uruhare mu gukumira ibyaha byo gusambanya abana ndetse n’ihohoterwa muri rusange rubasaba gutinyuka bagatanga amakuru ku babigiramo uruhare.

Ni ubukangurambaga bwabereye mu Karere ka Nyagatare mu Murenge wa Tabagwe aho abakozi ba RIB babanje kwereka abaturage ibibi byo guhishira umuntu wahohoteye undi yaba ku mubiri nko gukubita no gukomeretsa, gukoresha imibonano mpuzabitsina abana n’ibindi.

Ku cyaha cyo gusambanya abana, imibare yo mu Ntara y’Iburasirazuba igaragaza ko kuva muri Nyakanga 2019 kugeza muri Kamena 2020, RIB yakiriye ibirego 1450 by’abangavu batewe inda.

Akarere ka Nyagatare niko gafite umubare munini kuko mu bangavu 1600 batewe inda, abagejeje ibirego muri RIB ni 288.

Umuvugizi w’Urwego rw’Ubugenzacyaha, Dr Murangira B. Thierry, yavuze ko ubu bukangurambaga bugamije kwegera abaturage bakabasanga aho batuye kugira ngo n’uwananiwe kujya gutanga ikirego bamwegere.

Ati “Ikigamijwe muri ubu bukangurambaga ubundi ni ukurwanya gusambanya abana, ni ubukangurambaga dufatanyije n’izindi nzego aho nka RIB turi gukoresha ziriya modoka zimeze nka ofisi aho tujya mu mirenge ya kure kugira ngo twakire ibibazo bishingiye ku gusambanya abana, abakozi ba RIB bandi baba bashishikariza ab’inzego z’ibanze n’abaturage kurwanya iki cyaha.”

Dr Murangira yakomeje avuga ko ibirego bitangwa n’abaturage byose bikurikiranwa ariko umwihariko uhari kuri ubu ngo ni uko bari gukurikirana cyane icyaha cyo gusambanya abangavu.

Ati “Twagerageje kwegera abantu kugira ngo bariya bantu baba bari kure tubegereze serivisi ari nako turwanya iki cyaha cyo gusambanya abana.”

-  Guhishira abatera inda abangavu biracyari ikibazo

Mu gihe cy’umwaka umwe mu Karere ka Nyagatare habarurwa abangavu 1600 batewe inda, abamaze gutanga ibirego muri RIB ni 288.

Dr Murangira yavuze ko guhishira abateye inda abangavu ari imbogamizi ikomeye ku bagenzacyaha muri iki gihe, asaba abayeyi gutinyuka bakagaragaza abatera inda abana babo.

Ati “ Imbogamizi zose zishingiye kuri uwo muco mubi wo guhishira abasambanya abana, ntabwo ari umwihariko kuri Nyagatare gusa ni mu Rwanda hose, urasanga abantu bafite umuco mubi wo guhishira abatera inda abangavu ndetse hari n’abagera aho bakunga uwasambanyije umwana n’umuryango we.”

Yasabye abaturage guhaguruka bakarwanya umuco mubi wo guhishira abasambanya abana ndetse bakanahishira ababasambanya, inzego z’ibanze zo zasabwe kuyobora abaturage kuri RIB kugira ngo hakurikiranwe ibibazo by’ihohoterwa baba bazigejejeho kuko ariyo ifite mu nshingano kubafasha.

Bamwe mu babyeyi basanga kugira ngo icyaha cyo gusambanya abana kigabanuke mu miryango hakwiriye gushyirwaho uburyo abana bakurikiranwa kuva ku Isibo kugera ku Mudugudu.

Mukarugwiza Claudine ati “Nk’igihe tugiye gukora inama y’Umudugudu hakagiye hakorwa urutonde rw’abana tuzi batitwara neza tukabakurikiranira mu Isibo, byatanga umusaruro noneho bamwe baba baramaze kubyara tugashyiraho itsinda ribakurikirana bo n’ababyeyi babo kugeza igihe bavugiye uwateye inda wa mwana.”

Kwibarira Habibu utuye mu Kagari ka Shonga we yavuze ko hakwiriye kongerwa imbaraga mu kwigisha abakiri bato umuco Nyarwanda, ababyeyi bitwara nabi bagakeburwa ngo kuko akenshi iyo urebye abangavu baterwa inda ukanareba imiryango baturukamo usanga nta muco iba igifite.

RIB ivuga ko mu bindi bitera ihohotera harimo amakimbirane yo mu muryango aho atuma ababyeyi batita ku bana bigaha icyuho abashaka kubahohotera.

Abavuga rikumvikana mu Murenge wa Tabagwe basabwe kugira uruhare mu gufatanya na leta kwerekana abasambanya abana
Intara y'Iburasirazuba niyo ibarizwamo abangavu benshi batewe inda
Abaturage bakirirwa mu biro biri mu modoka zigendanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .