RIB yasabye urubyiruko kuburira abasambanya abangavu bagendeye ku gihagararo

Yanditswe na Hakizimana Jean Paul
Kuya 28 Ugushyingo 2020 saa 11:49
Yasuwe :
0 0

Urwego rw’Igihugu rw’Ubugenzacyaha, RIB, rwasabye urubyiruko rw’abakorerabushake kuburira bagenzi babo basambanya abangavu bagendeye ku gihagararo nyamara bafite imyaka iri munsi ya 18 kubireka kuko uzajya abifatirwamo azajya ahanwa.

Ibi byagarutsweho ubwo hasozwaga ubukangurambaga bw’iminsi ine RIB yakoreye mu Karere ka Nyagatare mu mirenge itandukanye yiganjemo iri kure ya sitasiyo zayo, abakozi b’uru rwego baramanuka bakumva ibibazo by’abaturage cyane cyane ibishingiye ku ihohoterwa.

Ubwo ubu bukangurambaga bwasozwaga, abakozi ba RIB baganirije urubyiruko rw’abakorerabushake b’i Nyagatare kugira ngo baburire bagenzi babo bijandika muri ibi byaha ndetse runabafashe kwigisha n’abandi baturage.

Umuvugizi wa RIB, Dr Murangira B. Thierry, yavuze ko impamvu bahisemo gukoresha urubyiruko ari uko ruri mu rwitabazwa mu bikorwa bitandukanye kandi bikagenda neza.

Ati “Tubafiteho icyizere cy’uko iyo bitabajwe iteka bagakoreshwa neza usanga batanga umusaruro ugaragara, hari urubyiruko rero unasanga muri ibi byaha. Turashaka ko uru rubyiruko rugenda rukabwira rugenzi rwarwo ko ziriya nzira zitagendwa, ibintu byo gusambanya abana ni inzira zitagendwa bayirinde, umwana ntabwo apimirwa ku gihagararo, umuntu wese ufite imyaka 18 aba akiri umwana.”

Yavuze ko icyaha cyo gusambanya abangavu gikorwa imiryango ikagihishira nyamara bakabivuze uwabikoze akabiryozwa kuko guhishira ariko kuvamo ibindi bibazo bishingiye ku makimbirane yo mu miryango.

Ati “Ubu turi kwigisha ariko hari n’igihe kizagera abantu bagahanwa cyane cyane bamwe baba bagize uruhare mu kunga, hari n’ababihishira kuko baba batewe ubwoba cyane cyane ababyeyi babuza abana babo kurega.”

Bamwe mu rubyiruko rw’abakorerabushake bavuze ko kwigisha bagenzi babo bishoboka cyane kuko basanzwe bahurira mu bikorwa bitandukanye.

Bikorimana Jean de Dieu yavuze ko biteguye gufatanya n’izindi nzego mu gukumira inda ziterwa abangavu ngo nk’abantu basanzwe begereye urubyiruko cyane bazakoresha uburyo bwo guhanahana amakuru ku bishora mu busambanyi byaba ngombwa bakitabaza abantu bakuru bakabagira inama.

Bagambe Joseph uri muri Komite y’Urubyiruko rw’Abakorerabushake mu Karere ka Nyagatare yavuze ko bagiye gutangira gukorana n’Urwego rw’Ubugenzacyaha mu kuruha amakuru babona hasi mu midugudu kugira ngo icyaha cyo gusambanya abana kigabanuke.

Ati “Ahari ikibazo hari ubwo tuba tuhazi, hari ubwo wamenyaga nk’amakuru ntugire ubushake cyane mu kuyatanga ariko ubu tugiye kongera imbaraga mu gukumira iki cyaha nitugira n’abo tumenya basambanya aba bana tubatange.”

Ubu bukangurambaga bufite insanganyamatsiko igira iti “Uruhare rwa buri wese mu gukumira icyaha cyo gusambanya umwana”, buzanagezwa mu tundi turere tugize igihugu.

Kuva muri Nyakanga 2019 kugera muri Kamena 2020 mu Karere ka Nyagatare abangavu 1600 batewe inda, abagera kuri 288 ni bo batanze ibirego muri RIB.

Urwego rw’Igihugu rw’Ubugenzacyaha, RIB, rwasabye urubyiruko rw’abakorerabushake kuburira bagenzi babo basambanya abangavu
Urubyiruko rwiyemeje gutanga amakuru ku bo bakekaho uruhare mu gusambanya abangavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .