RIB yafashe umugabo ukekwaho kwiba asaga miliyoni mu bubiko bw’ibitaro bya CHUB

Yanditswe na IGIHE
Kuya 10 Ugushyingo 2019 saa 06:46
Yasuwe :
0 0

Urwego rw’Igihugu rushinzwe Ubugenzacyaha (RIB) rwatangaje ko rwafashe umugabo wo mu Karere ka Huye ukekwaho kwiba amafaranga mu bubiko bw’ibitaro bya CHUB biherereye muri ako karere.

Ntawuhiganayo Narcisse yafashwe ubwo yageragezaga gusohoka mu gihugu, akaba yafatanywe 1.700.000 Frw.

Ibinyujije kuri Twitter, RIB yashimiye abantu bose batanze amakuru yatumye ukekwa afatwa.

Ingingo ya 166 mu gitabo cy’amategeko ahana ibyaha mu Rwanda, ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe ariko kitarenze imyaka ibiri n’ihazabu y’amafaranga y’u Rwanda atari munsi ya miliyoni imwe ariko atarenze miliyoni ebyiri, imirimo y’inyungu rusange mu gihe cy’amezi atandatu cyangwa kimwe gusa muri ibyo bihano.

Ibihano ku cyaha cyo kwiba byikuba kabiri iyo uwibye yakoresheje guca icyuho, kurira cyangwa yakoresheje igikoresho icyo aricyo cyose gifungura aho utemerewe kwinjira; kwiba byakozwe mu nzu ituwemo cyangwa isanzwe ibamo abantu cyangwa mu nyubako ziyikikije.

Byikuba kabiri kandi iyo kwiba byakozwe n’umukozi wa Leta yishingikirije imirimo ye cyangwa umuntu ushinzwe imirimo iyo ari yo yose ifitiye abaturage akamaro, uwakoze icyaha yiyitiriye izina cyangwa yitwaje ibimenyetso biranga umukozi wa Leta cyangwa by’umuntu ushinzwe umurimo rusange ufitiye abaturage akamaro abeshya ko yabitumwe n’urwego rwa Leta cyangwa iyo kwiba byakozwe nijoro.

Uwafashwe arakekwaho kwiba asaga miliyoni muri CHUB i Huye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza