RIB yaburiye abagisambanya abana n’ababyeyi bagurana abana babo izindi nyungu

Yanditswe na Ferdinand Maniraguha
Kuya 24 Ukwakira 2020 saa 05:27
Yasuwe :
0 0

Urwego rw’Igihugu rushinzwe Ubugenzacyaha (RIB) rwaburiye abagabo bagifite ingeso yo gusambanya abana n’ababyeyi bahishira ababikoze bakurikiyemo inyungu, ko amategeko atazigera abihanganira.

Bitangajwe mu gihe mu gihugu hakomeje kumvikana izamuka ry’imibare y’abana basambanywa bagaterwa inda, bamwe bakava mu mashuri ubuzima bwabo bukangirika.

Umunyamabanga Mukuru wungirije wa RIB, Isabelle Kalihangabo, yavuze ko kurwanya abasambanya abana ari inshingano za buri wese, kandi abaturage bakihutira gutanga amakuru hakiri kare.

Mu butumwa yanyujije kuri Twitter, Kalihangabo yagize ati “Abana basambanyijwe ntibagaceceke cyangwa ngo bahishire ababahohoteye. Abo nta cyiza baba babashakira. Kubabeshyeshya ibintu by’akanya gato cyangwa kubatera ubwoba ngo utabarega, ntibikuraho ingaruka zo guhohoterwa ku mubiri no ku buzima bwabo bibatera. Ababikora bagomba kubihanirwa.”

Yavuze ko icyiza cyo kumenyekanisha amakuru nk’ayo ku gihe, ari uko byorohera ubutabera kubona ibimenyetso bifasha mu gutanga ubutabera.

Ati “Tugize Imana abo bagome bateshwa batarangiza abana kandi bakanahanwa. Niyo mpamvu kurinda abana ari ngombwa, hanagira ubegera agamije kubasambanya agahita afatwa. Ni nayo mpamvu gutanga amakuru ari ngombwa. Ni nayo mpamvu kandi twese hamwe tugomba gufatanya muri uru rugamba.”

Kalihangabo yavuze no ku ruhare rw’ababyeyi mu guhashya icyo cyaha, yihanangiriza ababyeyi banga gutanga amakuru ku bana babo basambanyijwe, bakurikiranye izindi nyungu.

Ati “Ababyeyi nabo bakwiye kurinda abana babo ihohoterwa cyangwa bafasha mu gufata no gukurikirana abahohoteye abana, aho kubishakiramo izindi nyungu, zaba izishingiye ku muco cyangwa izishingiye ku mikoro.Bakwiye kumenya kandi ko guhishira cyangwa kumvikana n’abo bangizi bihanirwa.”

Imibare y’abana basambanywa bagaterwa inda yagiye yiyongera mu myaka mike ishize. Mu mwaka wa 2016, abangavu basambanyijwe bagaterwa inda z’imburagihe mu gihugu hose bari 17849, mu 2017 baba 17337 naho muri 2018 bagera ku 19832. Kuva muri Mutarama kugera muri Kanama umwaka ushize, abangavu batewe inda bari 15656.

Hari ibimenyetso ko uyu mwaka iyo mibare ishobora kwiyongera cyane, bitewe ahanini n’ingaruka z’icyorezo cya Coronavirus cyatumye amashuri amara amezi hafi arindwi afunzwe, abana bari mu miryango.

Kalihangabo yavuze ko abagabo bafite ingeso yo gusambanya abana bayireka kuko amategeko azabibabaza.

Ati “Ikiruta byose ariko, ni uko abagifite ingeso yo gusambanya abana bayireka burundu kuko nta na rimwe batazahigwa ngo babazwe amabi baba bakoze.”

Igitabo cy’amategeko ahana ibyaha mu Rwanda mu ngingo ya 133 iteganya ko uhamijwe icyaha cyo gusambanya umwana ahanishwa igifungo kitari munsi y’imyaka 20 ariko kitarenze imyaka 25. Iyo gusambanya umwana byakorewe ku mwana uri munsi y’imyaka 14, igihano kiba igifungo cya burundu kidashobora kugabanywa kubera impamvu nyoroshyacyaha.

Umunyamabanga Mukuru wungirije wa RIB, Isabelle Kalihangabo yavuze ko kurwanya abasambanya abana ari inshingano za buri wese, kandi abaturage bakihutira gutanga amakuru hakiri kare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .