RGB yashimye icyemezo cyo guha abagore inkoni y’ubushumba, ibasaba impinduka mu muryango

Yanditswe na IGIHE
Kuya 21 Ukwakira 2019 saa 08:49
Yasuwe :
0 0

Umukuru w’Urwego rw’Igihugu rw’Imiyoborere (RGB) yashimye intambwe yatewe n’Ishyirahamwe ry’Amatorero y’Ababatisita mu Rwanda (AEBR) ryimitse bwa mbere abagore 13 mu nshingano za gipasiteri.

Ibi birori byabereye ku Cyicaro Gikuru cya AEBR ku Kacyiru ku wa 20 Ukwakira 2019. Byanahuriranye no gusengera abagabo batanu bahawe inshingano zo kuba abepisikopi.

Uyu muhango wabaye ku nshuro ya mbere, byasabye gutegereza imyaka 55 AEBR igeze mu Rwanda na 52 ihakorera byemewe n’amategeko.

Witabiriwe n’abayobozi batandukanye mu nzego za leta nka Senateri Mureshyankwano Marie Rose, Umuyobozi Mukuru w’Ikigo cy’Igihugu gishinzwe Igororamuco, Bosenibamwe Aimé ndetse n’abanyamadini barimo Umuvugizi wa ADEPR, Rev. Karuranga Ephrem n’Umuyobozi wa Women Foundation Ministries na Noble Family Church, Apôtre Alice Mignonne Kabera.

Umukuru w’Urwego rw’Igihugu rw’Imiyoborere, RGB, Dr Usta Kaitesi, yatangaje ko bashimishijwe n’intambwe AEBR yateye yo kwimika ku nshuro ya mbere abashumba b’abagore.

Mu butumwa bwe yabasabye guharanira kuzana impinduka mu itorero no muri sosiyete Nyarwanda muri rusange.

Yagize ati “Buriya abagore Imana yatugize abapasiteri kuva kera. Ubutumwa bwa mbere tubugira iyo dutwite, nibwo Imana yaduhaye icyo cyubahiro, murabizi ko n’Umwami wacu Yesu Kirisitu yabanye natwe mbere y’uko abana namwe mwese. Uretse igihe yabanye n’Imana mu ijuru, ageze ku Isi yamaze amezi icyenda abana n’umubyeyi nkatwe.”

Yatanze ingero nyinshi zo muri Bibiliya aho abagore bagize uruhare mu guhindura ubuzima bw’abantu ku buryo abimitswe bagomba kubigiraho.

Yagize ati “Ndashima ababyeyi, ba pasiteri uyu munsi itorero ryashyize ku mugaragaro kwemera ibyo mwakoze byinshi, mwakoze ibikorwa byinshi bidashingiye ku mwanya w’umurimo mwarimo, ahubwo bishingiye kuri bwa bushake bwo kuzana impinduka aho muri n’aho mukorera.”

“Uyu munsi babibukije ko muri imbata, kandi abo tubereye imbata ni Abanyarwanda. Icyo dusabwa umunsi ku munsi ni ukurangwa n’ibikorwa bihindura ubuzima bwabo bibakura mu buzima babayeho bibashyira mu bwiza kurushaho.’’

Abagore bahawe inshingano n’abagabo bimitswe basabwe kuba inyangamugayo mu byo bakora na serivisi baha abayoboke bose.

Pasiteri Kantengwa Jacqueline uyobora AEBR Kayenzi mu Murenge wa Rugarama mu karere ka Gatsibo mu Ntara y’Uburasirazuba yavuze ko yishimiye inshingano yo kuba umupasiteri.

Ati “Ni iby’igiciro kuba Imana iguhamagarira gukora umurimo wayo. Nabyifuje kera gukorera Imana nkagenda nanabisengera ariko sinari nzi ko nagera kuri iyi ntera, nakundaga kuramya Imana, guhimbaza, gusenga no guhura n’abantu b’Imana.’’

Itorero rya AEBR rimaze imyaka 50 mu ivugabutumwa mu Rwanda, ryakoze ibidasanzwe mu madini y’abakirisitu aho usanga inshingano za gishumba ziharirwa abagabo gusa. Ryashimwe kuba mu murongo wa Leta y’u Rwanda wo kubaka inzego z’ubuyobozi mu byiciro byose.

AEBR ni itorero ryageze mu Rwanda mu 1964 riturutse muri Repubulika Iharanira Demokarasi ya Congo. Ryabonye ubuzima gatozi mu 1967, kuri ubu rifite abakirisitu basaga 257 000 bayobowe n’abapasiteri basaga 150 bavuga ubutumwa bwiza bwo kugaruka kwa Yesu.

Ku nshuro ya mbere, abagore bo mu Itorero rya AEBR bahawe inshingano za gipasiteri
Abagore 13 barambitsweho ibiganza basengerwa ku nshingano z'ubushumba mu Itorero rya AEBR
Umuvugizi Mukuru wa AEBR, Bishop Ndagijimana Emmanuel, ageza ubutumwa ku bitabiriye uyu muhango
Umukuru wa RGB, Dr Usta Kaitesi, yasabye abapasiteri n’abepisikopi ba AEBR kuba inyangamugayo mu nshingano zabo
Ku nshuro ya mbere himitswe abepisikopi mu itorero AEBR rimaze imyaka isaga 50 rikorera ku butaka bw'u Rwanda
Senateri Mureshyankwano Marie Rose ari mu banyacyubahiro bitabiriye uyu muhango
Abagabo batanu bahawe inshingano yo kuba abepisikopi bari basanzwe ari abayobozi ba rejiyo zigize AEBR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza