RGB yashimiye KOICA ubufatanye mu iterambere ry’u Rwanda

Yanditswe na Mfitumukiza Moïse
Kuya 26 Ukwakira 2017 saa 09:36
Yasuwe :
0 0

Urwego rw’Igihugu Rushinzwe Imiyoborere(RGB) rwashimiye Umuryango mpuzamahanga w’Abanya-Koreya y’Epfo, Korea International Cooperation Agency (KOICA), ku bwitange bwawo mu guteza imbere igihugu mu ngeri zitandukanye ndetse runasaba ko watangira gukorana n’abikorera.

Hari mu muhango wo gusuzuma ibyagezweho muri uyu mwaka no kwigira hamwe ibizakorwa mu myaka iri imbere, wabaye kuri uyu wa 26 Ukwakira 2017.

Umuyobozi wari uhagarariye RGB, Kamasa Rugamba Emmanuel yashimiye KOICA kuba yarahisemo gukorera mu Rwanda anayisaba gukomeza ubufatanye mu mishanga itandukanye itegurwa na Leta.

Yagize ati ”Ibikorwa bakora ni ibijyanye n’ibyo u Rwanda rwifuza birimo kubaka amashuri, guteza imbere ubumenyi n’ikoranabuhanga, kandi ingengo y’imari ya Leta nyiyahaza amashuri yose nubwo ishyiramo amafaranga menshi. Kugira abafatanyabikorwa badufasha muri urwo rwego ni iby’agaciro kanini cyane, niyo mpamvu tubashimira kuba baraje gukorana natwe, kandi ibyo bakoze birivugira.”

Yakomeje agira ati:”Mu bindi tubifuzaho harimo kudufasha gukoresha ikoranabuhanga duteza imbere imiyoborere myiza, abaturage bakagezwaho amakuru mu nzira zoroshye, ibyitwa e-governance bituma umuturage adasiragira ashaka serivisi. Kuri ubu u Rwanda ruri ku mwanya mubi wa 90, ariko nka RGB twifuza ko mbere y’umwaka w’i 2020, tuzaba turi mu bihugu 10 bya mbere.”

Uyu muyobozi yavuze ko icyo bifuza kuri uyu muryango ari ugufasha u Rwanda kugira abantu benshi bafite ubumenyi bwafasha igihugu gutera imbere binyuze cyane cyane mw’ikoranabuhanga, ndetse bakarenga urwego rwo gukorana na Leta gusa, bagatangira gukorana n’abikorera.

Umuyobozi wa KOICA mu Rwanda, Lee Byung Hwa, uzakomeza gukorana n’u Rwanda mu ngeri zitandukanye z’ubuzima.

Yagize ati”Ni iby’agaciro kuri njye gukorera mu gihugu cyiza nk’iki, uyu munsi twateraniye hamwe tureba ibyo uyu muryango wagezeho ndetse tunashaka ibisubizo by’ibibazo twahuye nabyo..[..] Gukorana n’igihugu gishaka gutera imbere nk’u Rwanda ni icyifuzo cy’uyu muryango, twizeye ko tuzagera kuri byinshi dufatanyije.”

KOICA yatangijwe mu w’i 1991, ikaba ifite amashami 44 hirya no hino ku isi. Yatangiye gukorera mu Rwanda mu 2005. Utera inkunga imishinga myinshi ya Leta yiganjemo iterambere ry’icyaro, ubuhinzi n’ubworozi, uburezi, imiyoborere myiza n’ikoranabuhanga, yatwaye 809,660 by’amadolari, kuva mu 2013.

Kuri ubu habarurwa abakoranabushake ba KOICA 32 mu Rwanda, mu mwaka utaha bakaba bashobora kwiyongera bakaba 50 nk’uko umuyobozi wayo yabitangaje.

Abafatanyabikorwa ba KOICA bitabiriye inama
Iyi nama ni ngarukamwaka isuzumirwamo ibyagezweho hakanaganirwa ku bigiye gukorwa
Kamasa Emmanuel wari uhagarariye RGB muri iyi nama
Umuyobozi wa KOICA mu Rwanda, Lee Byung Hwa, uzakomeza gukorana n’u Rwanda mu ngeri zitandukanye z’ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza