RDF irakataje mu guhugura abasirikare b’abanyamwuga ku rwego mpuzamahanga

Yanditswe na Twarabanye Venuste
Kuya 17 Ugushyingo 2019 saa 08:17
Yasuwe :
0 0

Urubyiruko rwasoje amashuri yisumbuye rugakomereza amasomo mu ishuri rya Gisirikare ry’i Gako, aho biga amasomo asanzwe ya Kaminuza n’aya Gisirikare, ruratangaza ko kurinda ubusugire bw’igihugu unacyubaka mu yindi mirimo n’ubuzima bw’abanyarwanda, bitanga icyizere ku bunyamwuga bw’ingabo z’u Rwanda n’ejo hazaza h’umutekano w’igihugu.

Mu 2015 nibwo ishuri rya Gisirikare ry’i Gako ku bufatanye na Kaminuza y’u Rwanda, ryatangije icyiciro cy’abashaka kuba abofisiye b’u Rwanda, bakanasoza bafite Impamyabumenyi y’Icyiciro cya Kabiri cya Kaminuza.

Abakirwa bazwiho kuba baratsinze neza mu mashuri yisumbuye kandi bafite inyota yo kwinjira mu ngabo z’u Rwanda.

Batangira amasomo ya Gisirikari ariko bakiga n’asanzwe mu mashami atandukanye, atangwa n’abasirikare babihuguriwe ndetse n’abarimu muri Kaminuza y’u Rwanda.

Bamwe mu bari kuyiga, bavuga ko kwiga amasomo ya Gisirikare n’amasomo asanzwe, ari akarusho ku muntu wifuza kwitangira igihugu.

Nayituriki Aline arabura umwaka umwe ngo asoze amasomo y’Ubuvuzi rusange. Aganira na RBA yabuze ko kuba umuganga n’umusirikari bizatuma arushaho kumva ko abereyeho umuturage ndetse akaba umuganga ushobora koherezwa aho ariho hose.

Ati “Kuba umuganga ukaba n’umusirikare, ni ibintu byiza cyane kubera ko, umusirikare igihe cyose arihangana kandi yumva ko abereyeho umuturage. Bizamfasha kugira ngo mbashe guhereza wa murwayi cyangwa na wa muturage, ibimugenewe ahantu hose banyohereza mpajye, ntabyinubiye.”

Murigo Daniel wiga mu mwaka wa Gatatu mu ishami ry’Imibanire n’ubumenyi mu bya Gisirikare avuga ko amasomo biga yunganirana kandi ko kwiga yumva ko arinda n’ubusugire bw’igihugu ari ishema rikomeye.

Ati “Icyo wiga aha ngaha usanga kimwe kicyunganira, navuga ko byose bifashanya bikunganirana. Kwicara mvuga nti ndi guharanira kurwanira no kurinda ubusugire bw’igihugu cyanjye ni ibintu binteye ishema cyane.”

Iradukunda Gisele uri gusoza mu bwubatsi n’ubumenyi mu bya Gisirikare, we yagize ati “Nkomoje ku kubihuza n’ibya gisirikare, nacyo gifite amashami ajyanye n’ubwubatsi kuba twafatanya tukaba twakubaka inganda zikomeye mu gihugu, bizanshimisha kuba nzaba ndi umwe muri abo.”

Umuyobozi ushinzwe amasomo mu ishuri rya Gisirikare rya Gako, Lt. Col. David Mutayomba yavuze ko amasomo atangwa n’abasirikare babihuguriwe ku buryo buhagije bunganirwa n’abava muri Kaminuza y’u Rwanda.

Ati “ Hari abasirikare dufite baba batojwe, tukongera tukanabatoza cyane kugira ngo bahugukirwe amasomo bagiye gutanga. Ibyo igisirikare tudashobora, aho tutihagije, baturuka muri Kaminuza y’u Rwanda bakaza bagatanga amasomo hano.”

Umuvugizi w’ingabo z’u Rwanda Lt. Col. Munyengango Innocent atangaza ko gufatanya amasomo asanzwe ya Kaminuza n’aya Gisirikare byubaka umusirikare wujuje ibyangombwa byo gukorera mu Rwanda no mu mahanga.

Ati “Twe tubanza kwiga ibya gisirikare, kuko niwo mwuga wacu ariko na none mu myaka ine higishwa ubuganga twifashisha nk’abasirikare ariko tugafasha n’u Rwanda n’abanyarwanda, aha niho na none tubonera abasirikare bize, iby’ubukanishi, imibare, ubutabire, ibinyabuzima n’ibindi byinshi bituma, umusirikare wacu muri iki gihe, aba yujuje ibyangombwa byo gukora akazi hano mu Rwanda ariko ashobora no kujya kugakorera hanze y’igihugu kandi yujuje ibyangombwa byose bisabwa.”

Ubwo Perezida wa Repubulika Paul Kagame yagezaga impanuro ku ba-Ofisiye bato 320 basoje amasomo ya Gisirikare kuri uyu wa 16 Ugushyingo 2019, yavuze ko kurinda umutekano w’igihugu n’abagituye ari umwuga mwiza, udateye ubwoba, ushimishije kandi ko kuwujyamo ari amahirwe atagira uko asa ku buryo na we yongeye guhitamo icyo yaba yahitamo kuba umusirikare.

Kubaka ubunyamwuga mu gisirikare cy’u Rwanda biratanga icyizere kuri ejo hazaza h’ubusugire bw’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza