RAB yamaganye iby’uko mu Rwanda hagaragaye Muryamo y’Inka

Yanditswe na Habimana James
Kuya 14 Nzeri 2019 saa 09:46
Yasuwe :
0 0

Ikigo cy’Igihugu cy’Ubuhinzi n’Ubworozi (RAB), cyatangaje ko nta kibazo cy’indwara ya Muryamo y’Inka kiri mu Rwanda, nyuma y’amakuru y’ibihuha ngo yagiye akwirakwizwa.

RAB yatangaje ko muri rusange Ishami rya Loni rishinzwe amatungo ku Isi, ryatangaje ko iyi ndwara yarandutse mu 1931.

Ibi bije nyuma y’aho mu karere ka Gatsibo mu Ntara y’Iburasirazuba, bamwe mu borozi b’amatungo magufu arimo Ihene n’Intama, batangaje ko nyuma y’aho bahawe urukingo, amatungo yabo yapfuye.

Hagati ya Nyakanga na Kanama uyu mwaka, RAB ifatanyije n’uturere twa Bugesera, Gisagara, Nyanza, Huye, Nyamagabe, Nyaruguru, Rusizi, Nyamasheke, Gicumbi, Nyagatare, Gatsibo, Kayonza, Ngoma na Kirehe, batanze urukingo rw’indwara ya Muryamo y’amatungo Magufi yuza, ariko rutari urwa Muryamo y’Inka.

Itangazo ryashyizweho umukono n’umuyobozi mukuru wa RAB, Ikigo cy’Igihugu cy’Ubuhinzi n’Ubworozi (RAB) , Dr Karangwa Patrick rivuga ko ibi u Rwanda rwabikoze nyuma y’aho hagaragaye iki kibazo mu bihugu bituranye n’u Rwanda.

Tariki 26 Kanama uyu mwaka, nibwo hagaragaye impfu z’ihene mu karere ka Gatsibo mu Murenge wa Kiziguro mu tugari twa Ndatemwa, Akabagendo na Ryarugema, aho iri kingira ryabereye.

Tariki 29 Kanama mu nama yahuje Akarere ka Gatsibo n’inzego bireba, zemeranyije ko aborozi bapfushije amatungo yabo bazahabwa ingurane vuba cyane, bigizwemo uruhare n’akarere, kandi inzobere mu by’amatungo zavuze ko zigiye kureba ahavutse ikibazo.

Tariki 2 Nzeri iri tsinda ryavuye muri RAB no mu ishyirahamwe rihuje abaganga b’amatungo n’akarere ka Gatsibo, basuye aka gace ka Ndatemwa, Akabagendo na Ryarugema intego ari ukureba aya matungo yapfuye nyuma yo gukingirwa.

Bari kandi bagamije kureba ku makuru yagiye acaracara avuga ko uru rukingo arirwo nyirabayazana, ndetse n’abavugaga ko hari indi ndwara itazwi.

RAB ivuga ko iki kibazo cyagaragaye mu duce tubiri gusa, mu gihe hakingiwe ahantu 603 muri Gatsibo hose harimo Ihene n’Intama 29,609, hapfamo Ihene 6.

Muri rusange Ihene n’Intama 704,261 nibyo byakingiwe mu gihugu, kandi ngo nta handi hagaragaye ikibazo nk’iki.

RAB ivuga ko mu ngo zasuwe muri Kiziguro na Rwimbogo, iperereza ryerekanye ko nta kibazo cy’urukingo rwa Muryamo y’Amatungo Magufi yuza gihari cyangwa Muryamo y’Inka, ko ahubwo basanze ari amakosa yakozwe ajyanye n’ubunyamwuga mu gukingira mu gace ka Ndatemwa.

RAB ivuga ko kugeza ubu ikibazo cy’uwatanze urukingo kirimo gusuzumwa, harebwa amakosa yakozwe n’ibihano byatangwa.

RAB yagaragaje ko Aborozi b’abanyarwanda bagomba kwizera ko nta kibazo cya Muryamo y’Inka kiri mu Rwanda.

Kigaragaza ko Ishami rya Loni ryita ku matungo ku isi, ryatangaje mu 2011 ko Muryango y’Inka yaranduwe ku isi yose.

Kivuga ko inshuro iyi ndwara yagaragaye mu Rwanda ari mu 1931, yongera gukingirwa mu 1983 muri gahunda yari yafashwe n’umugabane wa Afurika, kuva icyo gihe ngo ntirongera kugaragara mu Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza